Mateus 11

Yesuse ntolea smat ta diwane wlorina pana

20 Fola tina, Yesuse nmulaine ntolea smat ta si mali bendar sifis tasa, ningalena faifise to I npei mujizat mali bendar tina, ga si dailow pa bo diwane wlorina rderera Jou Lahatallana. 21 Yesuse nu, "Ee mew smat Khorazim fare Betsaida! Fkapalange to mew ya! Jou Lahatalla bo nfasale mewna tebtebna gaole, ningalena Ya ipeo mew mujizat, ga mew failou pa bo fiwane wlomewna bo fderera Yana. Gabe laisa popise ina mujizat tina Ya ipeo smat mali bendar Tirus fare Sidon, biarega si wlorina mayai, ga si osta diwane wlorina fare si dising gigiap puis bobokorina fare rpake kabaya karung, fafayal i si rmanyasal mali riri dosana. 22 Flolam famafia e, tomanta mali wol kiamatca, oras ta Jou bo nadili farumi smat, smat Tirus fare Sidon riri salna mayanana foloi mali mewi.

23 Ga mew smat Kapernaumna, mew fu Jou Lahatalla bo nlange mew nais sorogai? Enpa. Ta molangna I bo ntopa mew lali narakaca, ningalena mew feme to Ya ipei mujizatna ga mew failow pa fiwane wlomewnana. Gabe laisa popiseina mujizat tina Ya ipei mali bendar Sodom, osta bendar cia i mana sube dane oras tae. 24 Flolam famafia e, lomanta mali wol kiamatca, oras ta Jou bo nadili farumi smat, smat mayai ta mali batang Sodom tina riri salna mayanana foloi mali mewi smat Kapernaumna."