Matius 22

Yesuse nfafcule ga smat ta rmatna osta rpaling hawe

23 Wol cia to, smat agama Yahudi diranca ta rderera sogaro Saduki rlafo Yesus. Fatfato tae ni fatfatona, smat ta rmatna osta rpaling panto. Gabe si rfautno Yesus laitane, 24 "Guru, tantuba nabi Musa nfabinga, man ise be ta nfasawe to ga nmat ntu pa, i tenoca nane nfasawa i ni balo cia bo teno ta nmat cia en ni durina. 25 Ga tina sal pana ndadi i to mali amam i tane laitane: En manna smat sifit rfatenow. Ta uatica nfasaw ga nmat ntu pa, gabe ta papapo napca nfasawa ta nmatca ni balo. 26 Ga i ma denabe nmate ntu pa. Laina bena re ta faicolica denabe ta faifiti cia, si le ma rmate ndumi nturi pa. 27 Gabe morco napna maping cia ma nmat.

28 Gabe, oras tae amame bo kfautan, lomanta mali wol kiamatca oras ta smat ta rmat rpaling hawe, ta manca i molang mali smat sifit tasa ta ndadi maping cia ni uati? Ningalena, smat sifit ta rfatenow tasa farumi rfasawa i to!"

29 Gabe Yesuse nua si laitane, "Mewe fsalna gaole, ningalena mew ftaif Jou ni Kitabca pa, fare mew fto pa Jou Lahatalla ni kawasa. 30 Ga lomanta oras Jou Lahatalla nfapaling hawe smat ta rmatna, si rfasaw panto, ga si rtub farerer re malaikatna mali sorogai. 31 Ga smat ta rmate ga rpaling hawe, rasa mew fbaca to mali Jou ni Kitab cana. Ta Jou Lahatalla nu laitane, 32 ‘Ya tane to Jou Lahatalla ta Abraham, Ishak fare Yakub biasa rcuba Ya.’

Oras ta Jou Lahatalla nu tina, Abraham, Ishak fare Yakub rmate to, ga si rpaling hawe re Jou Lahatalla ga rcuba I. Gabe Jou Lahatalla cia smat ta rmatna riri Jou i pa, ga smat ta rtubna riri Jou i."

33 Oras smat lalo ta si manana rlonga ahai ta Yesuse nuna, si rherang ningalena si wlori lolona gaole I ni sogaro tina.