1 Yesu Kilistu nakalawa kuli lukolo lwa Daudi na Daudi nayali wa lukolo lwa Abulahamu na achi ndo chitabu cha lukolo lwa heye.

2 Abulahamu nayali na mwana mlume yawele nayali yochemigwa Isaka. Isaka nayali na mwana mlume, yawele nayali yochemigwa Yakubu na Yakubu nayali na mwana walume, wawele ndo Yudasi na wakulugwe. 3 Yudasi nayali na wana walume, wawele ndo Pelesi na Selahi, mayawo nayali yochemigwa Tamali. Pelesi nayali na mwana mlume, yawele nayali yochemigwa Hesiloni, naye Hesiloni nayali na mwana mlume yawele nayali yochemigwa Lami. 4 Lami nayali na mwana mlume, yawele nayali yochemigwa Aminadabu, naye Aminadabu nayali na mwana mlume, yawele nayali yochemigwa Nashoni, naye Nashoni nayali na mwana mlume, yawele nayali yochemigwa Salimoni. 5 Salimoni nayali na mwana mlume, yawele nayali yochemigwa Boasi, mayake Boasi nayali yochemigwa Lahabu. Boasi na Lutu nawali na mwana mlume yawele nayali yochemigwa Obedi, naye Obedi nayali na mwana mlume, yawele nayali yochemigwa Yese.

6 Yese nayali na mwana mlume, yawele nayali yochemigwa Daudi, yawele nayali mndewa, naye Daudi nayali na mwana mlume, yawele nayali yochemigwa Solomoni, mayake Solomoni nayali yochemigwa Batisheba, yawele nayali ndo mche wa Uliya. 7 Solomoni nayali na mwana mlume, yawele nayali yochemigwa Lohoboamu, naye Lohoboamu nayali na mwana mulume, yawele nayali yochemigwa Abiya. Abiya nayali na mwana mlume yawele nayali yochemigwa Asa. 8 Asa nayali na mwana mlume, yawele nayali yochemigwa Yohoshafati, naye Yohoshafati nayali na mwana mlume yawele nayali yochemigwa Yolamu, naye Yolamu nayali na mwana mlume yawele nayali yochemigwa Usiya. 9 Usiya nayali na mwana mlume yawele nayali yochemigwa Yotamu, naye Yotamu nayali na mwana mlume yawele nayali yochemigwa Ahasi, naye Ahasi nayali na mwana mlume, yawele nayali yochemigwa Hesekiya, 10 naye Hesekiya nayali na mwana mlume yawele nayali yochemigwa Manase, naye Manase nayali na mwana mlume yawele nayali yochemigwa Amoni, naye Amoni nayali na mwana mlume yawele nayali yochemigwa Yosiya. 11 Yosiya nayali na wana walume, wawele ndo Yekoniya na wang'holoze. Awo nawali ndo mhela Wayahudi vyowahilikwe kuli isi ya chijenzi ako Babuloni.

12 Wayahudi vyowahilikwe kuli isi ya chijenzi ako Babuloni, Yekoniya nayali na mwana mlume yawele nayali yochemigwa Sheatieli, naye Sheatieli nayali na mwana mlume yawele nayali yochemigwa Selubabeli, 13 naye Selubabeli nayali na mwana mlume yawele nayali yochemigwa Abiudi, naye Abiudi nayali na mwana mlume yawele nayali yochemigwa Eliyakimu, naye Eliyakimu nayali na mwana mlume yawele nayali yochemigwa Asoli, 14 naye Asoli nayali na mwana mlume yawele nayali yochemigwa Sadoki, naye Sadoki nayali na mwana mlume yawele nayali yochemigwa Akimu, naye Akimu nayali na mwana mlume yawele nayali yochemigwa Eliudi, 15 naye Eliudi nayali na mwana mlume yawele nayali yochemigwa Eleasali, naye Eleasali nayali na mwana mlume yawele nayali yochemigwa Masani, naye Masani nayali na mwana mlume yawele nayali yochemigwa Yakubu, 16 naye Yakubu nayali na mwana mlume yawele nayali yochemigwa Yusufu, yawele nayali ndo mlume wa Maliya, mayake Yesu yalinguchemigwa Kilistu.

17 Lelo nakwali na lulelo kumi na nne kulawa Abulahamu mbaka Daudi na kumi na nne luyage kulawa Daudi mbaka Wayahudi vyowahilikwe kuli isi ya chijenzi ako Babuloni na kumi na nne luyage kulawa vyowahilikwe kuli isi ya chijenzi mbaka mhela wa Yesu Kilistu.

18 Lelo ahi ndo vyoyapondigwe Yesu Kilistu. Maliya, mayake Yesu, nakabanichilwa na Yusufu. Ila lowawele wang'hali kihola kota munhu na mche wake, Maliya nakewona kana himila kwa ludali lwa Muhe Yelile. 19 Yusufu, mzenjele wa Maliya, kwa vila nayali munhu yalingudita ganojile, haganile kumbasa soni hazelu, ahyo nakagana kubena izenjele kwa uviso. 20 Vyoyawele yochijesa mbuli ayo, mhilisi wa Mkulu kamlawila koyawasile nakalota yolonjelwa kota, "Yusufu, mwana wa Daudi, uleche kudumba kumhola Maliya yawe mchewako, kwa vila heye kana himila kwa ludali lwa Muhe Yelile. 21 Naye koponda mwana mlume na hegwe komha itagwa Yesu*, kwa vila heye ndo yowalohola wanhu wa heye kuli gehile ga hewo."

22 Lelo aga geng'ha nagalawila leka kweneza wula ulonzi wa Mkulu loyaulonjile kwa kukolela mloli,

23 "Mdala yohanating'hana na mlume kowa na himila na koponda mwana mlume, nawo womchema itagwa Imanweli,"

Itagwa Imanweli, lina mana ya Nguluwi ka hamwe na hetwe.

24 Yusufu vyoyalilimche nakamhola Maliya kota mhilisi wa Mkulu vyoyamlonjele yadite. 25 Ila Yusufu hawasile na Maliya mbaka loyampondile mwana mlume. Naye Yusufu nakamchema mwana ayo, Yesu.