1 Mhela wula walanguswa nawamlutila Yesu, nawamuuza, "Yalikohi yawele mkulu ng'hatu kuli undewa wa kilanga?" 2 Yesu nakamchema mwana yumwe, kamwimiza hagati hawo, 3 hamba nakalonga, "Ndanguwalonjelani ndikomya, wone hamgaluche na kuwa kota wana wadodo, hamkwinjila hebu kuli Undewa wa Nguluwi kilanga." 4 Yoneche yochihanyisa kota mwana ayu, ayo ndo yawele mkulu kuli undewa wa kilanga. 5 Yoneche yombochela mwana yumwe kota ayu kwa itagwa lyangu, kangumbochela heni.

6 "Yoneche yomwambuza kudita yumwe wa awa wana wadodo walingung'hunda, yowa inoga yafunjigwe iganga likulu lya lwala na kukabajizwa kuli lwene lwa bahali.Wanhu weli walingutumiya lwala kubalasa sokolo 7 Wochona wanhu wa isi kwa chiwalo cha zila mbuli zilingwambuza wanhu wadite gehile. Kwa vila mbuli azo zanguganigwa zilawile, ila kochona yula munhu yawele yozambuza.

8 "Wone moko ama mgulu wa hegwe ukwambuze kikwang'hwala, uudumule na kuutaga kutali na hegwe. Fola kwa hegwe kwinjila kuli ukomu kuno ulihela moko ama magulu kusinda kutozigwa kuli chiluli cha mazuwa gose ne kuduma kuno uwele na moko meli na magulu meli. 9 Wone iziho lyako likwambuze kudita gehile, lyuse na kulitaga kutali na hegwe. Inoga kwa hegwe kwinjila kuli ukomu kuno uwele na iziho limwe kusinda kutajigwa kuli chiluli cha kuli isi ya wabagame uwele na meho geng'ha meli.

10 "Milole! Mleche kumbeza yumwe wa wadodo wano. Ndanguwalonjelani, wahilisi wa kilanga wabaho mazuwa gose kumwando ha Mhaza wa heni yawele kilanga. 11 Mina mwana wa munhu nakoya kuwalohola wala wajilile. 12 Mwangona ndaze? Munhu nayali na ming'holo miya, wone yajilize limwe, kodita ndaze? Kojileka jila makumi tisa na tisa kuchidunda na kuluta kulipala lila lyajilile. 13 Hoyolipata, ndikomya ndanguwalonjelani, kosangalala kwa chiwalo cha alyo kusinda vyoyosangalala kwa chiwalo cha jila makumi tisa na tisa jiwele hajajilile. 14 Hihyo du, Mhaza wa hemwe wa kilanga halingugana ne yumwe wa awa wadodo yajilile.

15 "Wone mng'holozo yakuditile vibi, ulute ukamlonjele kuno muwele mliyeka. Wone yakuhuliche kowa umpatile mng'holozo. 16 Wone halingukuhulika, mhole munhu yumwe ama weli hamwe na hegwe, leka kwa udedezi wa walolezi weli ama wadatu, chila nongwa yoditikwa. 17 Wone hambe yawahuliche awo, chilonjele chilundo cha wanhu walingumkunda Kilistu. Na wone hambe yahuliche chilundo cha wanhu walingumkunda Kilistu, na yawe kwa hegwe kota wanhu wohawamzelele Nguluwi na wakongoza sendi.

18 "Ndanguwalonjelani ndikomya, chila chomuhinda muisi chohindigwa kilanga, na chila chomchumula muisi chochumuligwa kilanga. 19 Kahi ndanguwalonjelani ndikomya, weli wa hemwe wakundile kuwa hamwe hano muisi kwa mbuli yoneche ya kulanda, Mhaza wa heni wa kilanga kowaditila mbuli yiyo. 20 Kwa vila heng'ha hala walingiting'hana weli ama wadatu kwa itagwa lya heni, heni ndabaho hali hewo."

21 Hamba Petili kamlutila Yesu, kamuuza, "Mkulu, ndaze, mng'holozangu wone yanditile vibi, ndimleche lwa kalinga? Mala saba?" 22 Yesu nakamwidichila, "Silingulonga mala saba hela," Ila makumi saba mala saba. 23 Kwa vila undewa wa kilanga wangiwhana na mndewa yumwe yaganile kulola hisabu ya vitumagwa wa heye. 24 Kukagula lokwaluche, kegalilwa munhu yumwe yawele daigwa sendi elufu kumi. 25 Munhu ayo yalihela chinhu cha kuhilusa, ahyo mkulu wa heye nakagana yaguzigwe heye na mchewake na wanage na vinhu vyeng'ha vyoyalinavyo, kulipila lila deni. 26 Lelo ayo chitumagwa kafugama kumwando ha heye, nakalonga, "Umbeteze na heni ndolipa deni lyeng'ha." 27 Yula mkulu na kamonela isungu, kamlechela lila deni, kamlechela yalute.

28 "Ila ayo chitumagwa nakoka, kamfika yumwe wa vitumagwa wayage yawele na deni lya heye sendi denali miya imwe. Kamibata, kamdinga lumelo yolonga, ‘Ulipe choulingudaigwa!’ 29 Ayo chitumagwa myage kamfugamila, kamlanda, ‘Umbeteze nani ndokulipa!’ 30 Ila heye haviganile, leka kamuwika mchinweng'ho mbaka hoyolipa deni.

31 "Lelo vitumagwa wayage vyowawene mbuli ayo wawa na masinzo ng'hatu, nawaluta kumlonjela mkulu wa hewo mbuli ilawile. 32 Aho yula mkulu kamchema ayo chitumagwa, nakumlonjela, ‘Hegwe kwa chitumagwa wihile ng'hatu! Nakundanda nani ndikulechela ideni lya hegwe lyeng'ha. 33 Ndaze, haikuganile nagwe kumonela isungu chitumagwa muyago kota heni vyondikonele isungu?’ 34 Lelo ayo mkulu nakazudila lukami, nakamlavya ayo chitumagwa yagazigwe mbaka baho hoyolipa deni lyeng'ha."

35 Yesu nakasinda kulonga, "Mhaza wa heni yawele kilanga kowaditilani hihyo wone chila yumwe wa hemwe yolema kumlechela mng'holoze kwa nhumbula ya heye yeng'ha."