1 Mafalisayo na Masadukayo nawamlutila Yesu, na kwa kumjeza, wamlanda yawalajile ulajilo kulawa kilanga. 2 Ila Yesu nakawedichila, "Hoifika matinazo mologa, ‘Luhela lunoga kwa vila kilanga kudung'uwala.’ 3 Na lufuku mwangulonga, ‘Lehano nhonya yotowa, kwa vila kuulanga kudung'uwala na ng'hungugu igubika.’ Lelo hemwe mvizela ng'hatu luhela kwa kulola kilanga vyokuli kilanga, ila kuvizela ulajilo wa luhela alu hamvizelele. 4 Lulelo lwihile lulingulema kumkunda Nguluwi kwangugana ulajilo, halupegwa ulajilo woneche ula, ila ulajilo wa Yona."

Lelo nakawaleka, nakaluta.

5 Walanguswa wa heye lowalochile kumwambu mwa ilamba, wefika wasemwa kuhola mibumunda. 6 Yesu kawalonjela, "Milole na muwe meho na usaso wa Mafalisayo na Masadukayo." 7 Ila hewo wawa wochilonjelela, "Kangulonga hino kwa vila hatuholile mibumunda." 8 Yesu nakagazela majesa gawo, kawalonjela, "Hemwe wanhu muli na makundo mado! Lekachoni mwangulonga kuwala kuwahela mibumunda? 9 Ndaze, mng'hali kuvizela? Ndaze, hamlingukumbuka londimogole ajila mibumunda jihano kwa chiwalo cha wanhu elufu zihano? Ndaze, nammemeza vidoto vilinga vya upumunizo? 10 Ama, ajila mibumunda saba jowapegwe wala wanhu elufu zine, ndaze, nammemeza vidoto vilinga vya upumunizo. 11 Hambi hamlinguvizela kota sali ndilonga kwa mbuli ya mibumunda? Mwilole na usaso wa Mafalisayo na Masadukayo!" 12 Ahyo walanguswa na wavizela kota nakawalonjela welole haiwele usaso wa mibumunda, ila na malanguso ga Mafalisayo na Masadukayo.

13 Yesu loyafichile nzingo ya Kaisalia Filipo, nakawauza walanguswa wa heye, "Wanhu wangulonga Mwana wa munhu ka whaani?" 14 Nawamwidichila, "Wanji wangulonga hegwe ndo Yohani Mbatiza, wanji wangulonga hegwe ndo Eliya, na wanji wangulonga hegwe ndo Yelemiya ama yumwe wa waloli." 15 Yesu nakawauza, "Na hemwe ndaze, mwangulonga heni nda whaani?" 16 Simoni Petili nakedichila, "Hegwe ndo Kilistu Mlohozi, Mwana wa Nguluwi yawele mkomu." 17 Yesu nakalonga, "Kubweda hegwe Simoni mwana wa Yona," "Kwa vila hawele munhu yakugubulile mbuli ino, ila Mhaza wa heni yawele kilanga. 18 Na heni ndangukulonjela, hegwe Petili na hali italawe ali ndokwimiza chilundo cha wanhu wa heni walingumkunda Kilistu na mong'ho wa kubagama hauweza kuusumya. 19 Ndokupa chichumulilo cha undewa wa kilanga, chila chouhinda muisi, chohindigwa kilanga na chila chouchumula muisi, chochumuligwa kilanga." 20 Hamba nakawalemeza walanguswa waleche kumlonjela munhu yoneche kota heye ndo Kilistu Mlohozi.

21 Kulawa mhela awo Yesu nakaluka kuwalonjela walanguswa wa heye ne kuvisa, "Ndanguluta Yelusalemu, na ako wakulu, watambika wakulu na walangusa wa malajizo ga Musa, wongaza ng'hatu. Wong'hopola ila zuwa lya kadatu, ndozilipuka." 22 Aho Petili kamhola Yesu hafungo, nakaluka kumng'hanuchila, "Uleche kulonga hino Mkulu! Mbuli ayi haikufika hebu!" 23 Ila Yesu kahinduka, nakamlonjela Petili, "Uche kumwando kwa heni, Limazoga! Hegwe ndo ngwamo kwa heni. Majesa ga hegwe hagawele ga chinguluwi ila ga chiwunhu."

24 Hamba Yesu nakawalonjela walanguswa wa heye, "Munhu yoneche yogana kumbinza heni, imgana yeleme yuye, yahole msalaba wa heye, yambinze. 25 Mina, munhu yogana kuulohola ukomu wa heye yuye, kouwajiliza. 26 Ila munhu yokwajiliza ukomu wa heye kwa mbuli ya heni, kogapata. Ndaze, munhu kowa na choni chinojile wone koihalila isi yeng'ha hanga youkwajiliza ukomu wa heye? 27 Kwa vila, Mwana wa munhu kokuya kuli ukulu wa Mhaza wa heye hamwe na wahilisi wa kilanga wa heye, na ahyo ndo chila munhu kopegwa kota vyoyaditile. 28 Ndanguwalonjelani ndikomya, wowa wanji bahano hawobagama wang'hali kumona Mwana wa munhu yokuya kuli undewa wa heye."