1 Mhela awo, Yesu loyali yokola mmigunda Zuwa lya Kwesela, walanguswa wali na nzala na waluka kubenanga miso ja uhemba wolya. 2 Mafalisayo vyowagawene ago, na wamlonjela Yesu, "Ulole walanguswa wa hegwe, wangudita mbuli zohambe zikundigwe kudita kuli zuwa lya Kwesela."

3 Yesu nakawalonjela, "Ndaze, hamsomile choyaditile Daudi na wayage howawele na nzala? 4 Heye nakenjila mng'handa ya Nguluwi na kulya jila mibumuda ja nhambiko jiwichigwe helile ha Nguluwi. Heye ne awo wayage hambe wakundigwe kulya mibumunda ajo ila watambika waliyeng'ha. 5 Ama ndaze, hamsomile kuli chitabu cha malajizo ga Musa kota, Zuwa lya Kwesela, watambika wawifyaga kuli Ng'handa ya Nguluwi, na hawalingijesa kota wawifya? 6 Lelo ndanguwalonjelani kuta hano hana chikulu kusinda Ng'handa ya Nguluwi. 7 Wone na muwe mvizelele ulonzi uno, ‘Ndangugana isungu haiwele nhambiko,’ Na mwahawataguse kwa wihe wanhu walihela nongwa. 8 Mina Mwana wa munhu ndo Mkulu kana ludali na Zuwa lya Kwesela."

9 Yesu na koka aho, nakenjila mng'handa ya kusalila ya hewo. 10 Kwali na munhu yawele na moko uziliche. Lelo wanhu nawamuuza Yesu, "Ndaze, yowa goya kulohola wanhu Zuwa lya Kwesela?" Nawamuuza ahyo leka wapate nongwa ya kumlonjeleza.

11 Ila Yesu nakawalonjela, "Yalikohi hali hemwe, yawele na ing'holo lila linjile mlikulubila. Ndaze, homibata na kumlavya amo Zuwa lya Kwesela? 12 Ila, munhu kahega kusinda ing'holo! Lelo iwa goya kudita ganojile Zuwa lya Kwesela?" 13 Hamba nakamlojela ayula munhu, "Ugolole moko wa hegwe." Nakaugolola, nawo uwa mkomu ng'hatu kota ula uyage. 14 Lelo Mafalisayo nawalawa kunze, nawaluka kupwepwa ndaze vyowomkopola Yesu.

15 Ila Yesu loyavizelele mbuli ayo, nakalawa honhu hala. Wanhu wenji nawamuwinza, nakawalohola watamwa weng'ha, 16 nakawalemeza waleche kuwalonjela wanhu mbuli za heye, 17 leka gala goyalonjile mloli Isaya genele.

18 "Mlole chitumagwa wa heni yondimhagule,

ndimganile heni yawele ngunojeza mnhumbula.

Ndowika muhe wa heni kwa heye,

na heye kodamla utaguso wa heni kuli isi zeng'ha.

19 Holema hebu, na hotowa iyowe,

na lizi lya heye haluhulikwa kuli nzila.

20 Hobena idenje lifinangwe,

utambi ulingufung'ha iyosi howeza kuuzimya,

mbaka hoyoidita hachi isumye.

21 Kwa heye isi zeng'ha zochitumbila."

22 Aho wanhu wamigala munhu yawele yohambe yalole na yawele yolemwela kulonga kwa vila nayali na chijeni. Yesu kamlohola ayula munhu na baho kaluka kulonga na kulola. 23 Wanhu weng'ha wamemile hala nawabubuwala na kulonga, "Ndaze, yowa ayu ndo Mwana wa Daudi?" 24 Ila Mafalisayo lowahuliche ago, walonga, "Munhu ayu kangulavya vijeni kwa ludali lwa Belisebuli mkulu wa vijeni."

25 Yesu, yawele yavizelele majesa ga hewo, kawalonjela, "Undewa woneche ugawanuche vilundo vilingitwanza, haulingikala hebu, na mji woneche ama nhanzi yoneche igawanuche vilundo vilingilewa, vyosumigwa. 26 Wone Limazoga lyoliwinga Limazoga, lyowa lyangilema liliyeka. Lelo undewa wake wokwima ndaze? 27 Wone heni ndilingulavya vijeni kwa ludali lwa Belisebuli, lelo wala vitumagwa wa hemwe walavyaga vijeni kwa ludali lwani, lwa Limazoga? Hebu! Ahyo, vitumagwa wa hemwe wokunda kuwatagusa hemwe kota mwiha. 28 Ila wone heni ndanguwinga vijeni kwa ludali lwa Muhe wa Nguluwi, lelo mvizele kota Undewa wa Nguluwi mina ukuyilani hemwe.

29 "Ama, koweza ndaze munhu kwinjila mng'handa ya munhu yawele na mong'ho na kumsukula lufufu lwa heye, ne kwaluka kumuwoha ayo munhu yawele na mong'ho? Aho ndo koweza kumsukula lufufu lwa heye.

30 "Yoneche hambe yebande na heni, kangundema, na yoneche hambe yekungajize hamwe na heni, kangusambalula. 31 Kwa mbuli ayo, ndanguwalonjelani, wanhu wokusilwa gehile na ukovuzi wa hewo weng'ha, ila hawokusilwa wihe wa kumkovula Muhe Yelile. 32 Kahi, yawele ngulonga ulonzi wa kumkovula Mwana wa munhu kolechigwa, ila yula yawele ngulonga ulonzi wa kumlemela Muhe Yelile, hokusilwa hebu, iwe kuli isi ino, ama kuli isi ikuya.

33 "Mdite igodi liwe linojile na mafuza gake gowa ganojile, mdite uwe wihile na mafuza gake gowa gehile. Igodi lizelekaga kwa mafuza gake. 34 Hemwe ulelo wa izoka! Molonga ndaze mbuli zinojile hanga hemwe mli na wihe? Mina munhu hulongaga kwa gala gamemile mnhumbula. 35 Munhu yawele na isungu hulavyaga mbuli zinojile kuli ng'hano za heye zinojile, na munhu yehile hulavyaga mbuli zihile kuli ng'hano ya heye yihile.

36 "Lelo ndanguwalonjelani, zuwa lya utaguso wanhu woganigwa kwidichila mbuli ya chila ulonzi wihile walingulonga. 37 Mina kwa ulonzi wa hegwe kokundigwa kuwa kutanganika, na kwa ulonzi wa hegwe kotagusigwa kuna nongwa."

38 Hamba wamwe wa walangusa wa malajizo ga Musa na Mafalisayo nawamlonjela Yesu, "Mlangusa, twangugana kuwona ulajilo kulawa kwa hegwe." 39 Na heye kawedichila, "Lulelo lwihile lulingulema kumkunda Nguluwi!" Mwangugana ulajilo, hampegwa ulajilo ila ulajilo wa mloli Yona. 40 Kota vila Yona loyekale mazuwa gadatu nayali mgati mwa lida lya somba ng'hulu, ndo vyoiwa kwa Mwana wa munhu yochikala hasi mazuwa gadatu. 41 Wanhu wa Ninawi wolawila mhela wa kutagusigwa kwa wihe, na hewo wochitagusa chilelo achi kota china wihe. Kwa vila Waninawi nawamgalamchila Nguluwi kwa mbuli ya kudamla kwa Yona, na hano hana chikulu kusinda Yona! 42 Malikiya wa kusini kulawila mhela lulelo awu houtagusigwa kwa wihe, na heye kochitagusa kota china wihe. Mina heye nakajenda kulawa isi ya kutali, nakuya kuhulichiza ulonzi wa luhala wa Solomoni, na hanga hano kuwele na chikulu kusinda Solomoni.

43 "Chijeni chihile lochiwinjigwa kwa munhu, chibemelaga kugunuche chipala honhu ha kwesela, chilemwela. 44 Ahi chochilonjelela, ‘Ndohiluka kaye kondawile.’ Ila lochihiluka na kuhafika hazelu halihela chinhu na kunoligwa, 45 vyangulutaga kuvihola vijeni viyage saba, vihile kusinda heye, na weng'ha huyaga kumwinjila ayo munhu. Na munhu ayu huwaga yagaziche lukami kusinda aho hamwande. Ndo vyoiwa kwa lulelo alu lwihile."

46 Yesu nayali yang'hali yolonga na chilundo cha wanhu mhela mayake na wang'holoze lowoyile na kwima hanze, nawagana kulonga na heye. 47 Lelo munhu yumwe nakamlonjela, "Mayako na wang'holozo wa kunze, wangugana kulonga na hegwe." 48 Ila Yesu kamwidichila munhu ayo, "Mayangu yalikohi? Na wang'holozangu ndo walikohi?" 49 Hamba kaugolola moko wa heye kwa walanguswa wa heye, nakulonga, "Awa ndo mayangu na wang'holozangu! 50 Mina yoneche yalingudita vyoyogana Mhaza wa heni nayali kilanga, ayo ndo mng'holozangu, na lumbulyangu, na mayangu."