1 Mhela wula Yohani Mbatiza loyoyile kuchiwala aku Yudeya, nakaluka kudamla. 2 Nakawalonjela, "Mumgalamchile Nguluwi, kwa vila undewa wa kilanga wa habehi." 3 Ayu Yohani nayali ndo yula yawele mloli Isaya nakasimila kuwala mbuli za heye loyalonjile,

"Munhu yumwe kanguyoweleza kulawa ako kuchiwala.

‘Mumwichile goya Mkulu nzila ya heye,

mgolole nzila ya heye ya kukola.’ "

4 Yohani nakavala nguwo ihonigwe na milaika ja ngamiya na isali lya igozi mchuno. Chilyo cha heye chali nzije na hanombwa ya kumhulo. 5 Wanhu kulawa Yelusalemu na kuli banzi zeng'ha za Yudeya na kuli honhu heng'ha ha hafungo ha lwanda lwa Yolodani nawamlutila, 6 nawalonga gehile ga hewo gowaditile na heye nakawabatiza kuli lwanda lwa Yolodani.

7 Ila loyawawene Mafalisayo na Masadukayo wenji wokuya leka wabatizigwe, nakawalonjela, "Hemwe lulelo lwa izoka! Whaani yawakanyile mbaka muibilime ng'halazi ya Nguluwi iwele ya habehi kuya? 8 Mlajile kwa madito kota namumgalamchila Nguluwi. 9 Mleche kijesa kota sambi moibilima ng'halazi ya Nguluwi kwa kulonga kota sekulu wa hetwe ndo Abulahamu! Ndanguwalonjela kota Nguluwi kana ludali lwa kugadita aga maganga gawe walelwa wa Abulahamu. 10 Iwago naliwichigwa goya kuli mizabi ja igodi, ahyo chila igodi liwele haliweza kulela mafuza ganojile, lyotemangwa na kutajigwa kuli chiluli. 11 Heni ndanguwabatiza hemwe kwa mazi kuwalajila kota namumgalamchila Nguluwi. Ila heye yalinguya kumbele kwa heni, kana ludali kusinda heni, nani silinguganigwa ne kupika makwamba ga heye. Heye kowabatiza hemwe kwa Muhe Yelile na kwa chiluli. 12 Heye kana chinhu cha kupululila nyhule, leka yaipulule nyhule yake na kuiwika ngano kuli ng'hano na mhumba yailakaze kwa chiluli chohambe chizime."

13 Mhela awo Yesu nakalawa Galilaya, nakafika kuli lwanda lwa Yolodani, leka Yohani yambatize. 14 Ila Yohani nakajeza kumlemeza yolonga, "Lekachoni kwanguya kwa heni? Heni ndo ndilinguganigwa kubatizigwa na hegwe!" 15 Ila Yesu nakamwidichila, "Uleche hela iwe hino kuli mhela awu, kwa vila yangutulapa kudita gala geng'ha galinguganigwa." Aho Yohani nakakunda.

16 Lelo Yesu loyasindile kubatizigwa, baho du ulanga naugubuka na nakamona Muhe wa Nguluwi yodulika kota ng'hunda na kwima mchanya mwa heye. 17 Lizi kulawa kilanga nalilonga, "Ayu ndo mwana wa heni ndimganile, nanojezwa na heye."