1 Yesu nakawachema walanguswa wa heye kumi na weli, hamwe nakuwapa ludali lwa kuwinga vijeni vihile na kuwosela wanhu matamwa. 2 Aga hano ndo matagwa ga hewo watumigwa kumi na weli, kwaluka na Simoni yochemigwa Petili na mkulugwe Andeleya na Yakubu na mkulugwe Yohani wana wa Sebedayo. 3 Na kahi Filipo na Batolomeo na Tomasi na Matei nayali mkongoza kodi na Yakubu mwana wa Alufayo na Tadei na 4 Simoni yalawile Kanaani na Yudasi Isikalioti yambelenhuche Yesu.

5 Awa kumi na weli nawalajizwa na Yesu kota hino, "Mleche kuluta kuli wanhu wa isi, na mleche kwinjila kuli muji wa Wasamaliya. 6 Hemwe mlute kwa wanhu wa Isilaeli wajilile kota ming'holo. 7 Mlute mkawalonjele kota ‘Undewa wa kilanga wa habehi.’ 8 Muwosele matamwa wanhu walingutamika na muwahilusile ukomu wabagame na muwalohole wala wawele na uswema na mlavye vijeni. Mpegwa ne kulavya sendi, namwe mlavye ne kuhola sendi. 9 Mleche kuhola zahabu na sendi zeng'ha zila mmihako jenu. 10 Mleche kuhola mhako komluta, na igwanda linji na makwamba na ne ng'hweku ila. Wakola mijito wopegwa chowogana.

11 "Na wone mfiche muji woneche ama chijiji, na wone munhu yowabochela, mikale baho mbaka zuwa homkuka. 12 Homkwinjila mng'handa muwalamse wenyeng'haye. 13 Wone wenyeng'haye wa ng'handa wanguganigwa ulamso awo, kikala goya kopona hamwe na hewo. Ila wone hawalinguganigwa, lelo kikala goya kwa hemwe kowahiluchila hemwe. 14 Wone munhu yoneche yolema kuwabochela ne kuwahulichiza, homkuka kuli ng'handa ayo mkung'hune nhimbwisi iwele mmagulu ga hemwe. 15 Ndanguwalonjelani ndikomya, zuwa lya utaguso, heye kolajila isungu ng'hatu kwa wanhu wa Sodoma na Gomola kusinda awo wanhu wa honhu aho!

16 "Mlole ndanguwalajiza hemwe kota ming'holo hali mibwa ja kisolo. Muwe wasugu kota izoka, na muwe mholile kota ng'hunda. 17 Milolele, wokuya wowebata na kuwahilika kuli vitala vya hewo na kuwatowa kuli ng'handa za kulandila za hewo. 18 Mohilikwa kwa vilongozi na wandewa kwa chiwalo cha heni, leka mlavye ulolezi kwa hewo na wanhu wa isi. 19 Lelo wone wawebate, mleche kuwa na lunhwinhwi kota molonga choni, na molonga ndaze, baho mopegwa choni cha kulonga. 20 Ulonzi womlonga, haulawa kwa hemwe, wolawa kwa ludali lwa heye Muhe wa Mhaza yowa yolonga mgati mwa hemwe.

21 "Walume wowahilika wang'holozawo wakopoligwe, na wahaza wodita hihyo kwa wana wawo. Na wana wowagaluchila wawalelile wakopoligwe. 22 Wanhu weng'ha wowazudilani kwa chiwalo cha itagwa lya heni. Leka heye yokwimilila, mbaka mwiso, koloholigwa. 23 Wone wanhu wawabunze kuli miji umwe, mbilimile kuli muji unji. Ndikomya ndanguwalonjelani hamsinda kujenda kuli miji jeng'ha ja Isilaeli kung'hali Mwana wa munhu kuya.

24 "Mlanguswa hawaga mkulu kwa mlangusa, na kuduhu chitumagwa kawaga mkulu kwa mkulu wa heye. 25 Lelo mlanguswa yafande kota mlangusa na chitumagwa yafande kota mkulu wa heye. Wone nawamchema mkulu wa ivyazi Belisebuli, ndaze, hawowachema wanhu wanji wa ivyazi alyo matagwa gehile lukami?

26 "Mleche kudumba wanhu, cheng'ha chigubikwe, chowa chigubuligwe, na mbuli ya uviso, yowichigwa hazelu. 27 Londiwalonjelani kung'hali kutitu, hemwe mlonje nemisi na mbuli yomuhulika yangupwepwiga kuli makutu ga hemwe, muidamle hazelu. 28 Mleche kuwadumba hewo wawele kukopola lukuli, ila walingulemwela kukopola muhe. Leka hemwe iwagana ng'hatu kumdumba yula yawele kukopola lukuli hamwe na nhumbula kuli chiluli cha Jehanamu. 29 Kwa silinje imwe yougula semembe, na semembe ne imwe yogwa hasi ne kugana Mhaza wa hemwe. 30 Ila kwa hemwe, na mnvili zeng'ha za kumutwi mwa hemwe ziwazigwa. 31 Lelo uleche kudumba, hemwe mhega kusinda semembe wenji.

32 "Chila munhu yalingulonga kwa mlomo wa heye hazelu kota heye wa heni, heni kahi ndomkunda hali Mhaza wa heni yawele kilanga. 33 Ila yoneche yula yombela heni hali wanhu, na heni ndombela hali Mhaza wa heni yawele kilanga.

34 "Mleche kijesa kota mbuya kuwegalilani kikala goya muisi, suyile kigala kikala goya, ila ipanga. 35 Kwa vila nambuya kwambuza kilewa hali munhu na mhaza wa heye na mhinza na mayake na mkasano na mkweye. 36 Wang'honyo wa munhu ndo wanhu wa mng'handa mwa heye.

37 "Yawele ngumgana mhaza ama mayake kusinda heni, silingumgana. Yalingumgana mwana ama mhinza kusinda heni, silingumgana. 38 Munhu wone hapichile msalaba wa heye na kumbinza, silingumgana. 39 Yawele ngibatilila ukomu wa heye, kouwajiliza, ila yawele nguwajiliza ukomu wa heye kwa mbuli ya heni, kowanawo.

40 "Yalinguwabochelani, kangumbochela heni, na yalingumbochela heni, kangumbochela yula yanhumile. 41 Yalingumbochela mloli kwa vila ndo mloli, kobochela chonolo cha mloli. Hoyombochela munhu yanojile, kobochela chonolo cha munhu yanojile. 42 Ndanguwalonjelani ndikomya, yoneche yompa yumwe wa wadodo awa chizombe cha mazi gazizime kwa vila mlanguswa wa heni, kopegwa chonolo cha heye."