1 "Milolele, mleche kudita madito ganojile hali wanhu leka wanhu wawone hemwe, kwa vila wone modita ahyo, mhaza wa hemwe yawele kilanga howapa hemwe chonolo.

2 "Lelo lomuwatanza wanzunwa, mleche kitogola hali wanhu kota wadesi vyowalingudita kuli masunagogi na mnzila leka wanhu wawatogole. Ndikomya, ndanguwalonjela kota hewo nawabochela chonolo cha hewo. 3 Ila lomuwatanza wanzunwa, mdite ahyo kwa uviso leka munhu yoneche yaleche kuvizela. 4 Mlavye utanzi wa hemwe kwa uviso, mhaza wa hemwe yalingugona ago, kowapa hemwe chonolo.

5 "Lomlanda, mleche kudita kota wahadi, kwa vila hewo wanguganaga kwima na kulanda kuli masunagogi na hafungo mwa nzila leka woneche na wanhu. Ndikomya, ndangulonga kota hewo nawabochela chonolo cha hewo. 6 Ila homlanda, chila yumwe yenjile kuli chihengo na yahinde lwizi, hamba yamlande Mhaza yawele halingoneka. Naye Mhaza wa hemwe, yalingugona ago, kowapa hemwe chonolo.

7 "Lomlanda, uleche kuhabuka gamwe gago kota wanhu hawamzelele Nguluwi. Hewo wangijesa kota Nguluwi kowahulichiza kwa vila wangulonga ulonzi winji. 8 Mleche kiwhana na hewo, Mhaza wa hemwe kovizela chomgana hala mng'hali ne kumlanda! 9 Lelo ahino ndo mlinguganigwa kulanda.

" ‘Mhaza wa hetwe uwele kilanga,

itagwa lya hegwe litogoligwe,

10 undewa wa hegwe uye,

lyougana likoleche hano mu isi, liwe kota vyoliwele kilanga.

11 Utugalile lehano chilyo cha hetwe chotulingugana.

12 Utusile gala gotuwifile,

kota vila hetwe vyo tuwosele wala watuzudize.

13 Uleche kutwinjiza kuli kujezigwa,

Ila utulohole na yula mwihe.’

(Kwa vila undewa ndo wa hegwe, na ludali, na ukulu mbaka mazuwa gose. Ena.)

14 "Mina lomuwosela wanhu gehile gowaditile, Mhaza wa hemwe yawele kilanga, kowosela hemwe gehile gomditile kahi. 15 Ila wone mleche kuwosela wanhu wanji gehile gowaditile, na heye Mhaza, howosela hemwe gehile gomditile.

16 "Homukwesela kulya, mleche kudita kota wadesi, hewo wangukwisukaga kumeho leka kuwalajila wanji kota nawesela kulya. Ndanguwalonjela ndikomya, kota hewo, nawabochela chonolo cha hewo. 17 Ila hegwe wone wesele kulya, uhovuje kumeho na ubakalize mafuta kumutwi kwa hegwe, 18 leka wanhu waleche kuvizela kota kwesela kulya, ila uzeleche hela na Mhaza wa hegwe halingoneka. Na heye Mhaza wa hegwe yalingona gavisigwe, kokutogola.

19 "Mleche kiwichila lufufu hano muisi kuwele na mifukuzi na ng'angaga ili nguwifya, na wahizi wokwinjila na kuhiza. 20 Miwichile ng'hano kilanga kuwele kuduhu mifukuzi na ng'angaga wolemwa kuwifya, na wahizi hawokwinjila kuhiza. 21 Leka hala hoiwele ng'hano ya hegwe, ndo na nhumbula ya hegwe hoiwa.

22 "Iziho ndo lumuli lwa lukuli. Wone iziho lyako liwe likomu, lukuli lweng'ha lowa mlumuli. 23 Wone iziho lyako liwe litamwa, lelo lukuli lweng'ha lowa lutitile, na wone lumuli luwele mgati mlukuli lwako, luwe kuli jiza, lelo alyo jiza lya kudumbiza ng'hatu!

24 "Haduhu munhu yokola mijito kwa wakulu weli. Kwa vila komzudila yumwe na kumgana yunji, ama kowa yomhulichiza yumwe na kumbeza yunji. Howeza kumfugamila Nguluwi na lufufu.

25 "Ndanguwalonjelani hemwe, mleche kijesa kuli ukomu wa hemwe, molya choni ama monwa choni leka muwe na ukomu, ama movala choni. Ndaze, ukomu unoga kusinda chilyo na lukuli lunoga kusinda nguwo. 26 Mvilole videje, havilingunyala nyhadikwa, havilingubeta nyhadikwa, kahi vyahela ng'hano. Leka ahyo Mhaza wa hemwe kilanga kanguwahombela. Lelo hemwe mnoga kusinda awo. 27 Ndaze, hagati ha hemwe kuna munhu kwa mbuli ya lunhwinhwi yoweza kuhejeza ne saa imwe ya kikala mu isi?

28 "Ndaze mwangijesa chomvala? Mlole uluwa wa kisolo vyoulingutitima! Hagalingukola chinhu choneche. 29 Ila ndanguwalonjelani, na heye Solomoni, na lufufu lwake lweng'ha, nahavalile goya kota uluwa umwenga kuli uluwa umwenga. 30 Wone Nguluwi kangujivaliza ahi misolo ja kumgunda jiwele lehano na mitondo jangutajigwa mchiluli, ndaze, hambe yawavalize goya ng'hatu hemwe muwele na makundo mado?

31 "Leka mleche kuwa na lunhwinhwi. ‘Tolya choni? Tonwa choni? Na tovala choni?’ 32 Mina vyeng'ha vyangugailwa na wanhu hawamzelele Nguluwi. Mhaza yawele kilanga, kavizela kota mwangugana vinhu vyeng'ha avyo. 33 Ahyo mijeseni tandi undewa wa Nguluwi, na gala goyogana heye na ago geng'ha kowapa hemwe na vinhu viyage. 34 Leka, mleche kuwa na lunhwinhwi na ga mitondo. Mitondo yowa na nongwa yake. Nongwa ya zuwa imwe yowatosani kwa zuwa ayo.