1 Yesu nakapondigwa kuli muji wa Betelehemu, mkowa wa Yudeya mhela Helodi loyawele Mndewa. Baho du loyapondigwe, walola nhondwe kulawa kolilawilaga isanya nawoya Yelusalemu 2 nawauza, "Kakohi mwana yawele nakapondigwa leka yawe Mndewa wa Wayahudi? Natuyona nhondwe ya heye ilawile kolilawilaga isanya, ahyo natuya kumfugamila."

3 Mndewa Helodi loyahuliche mbuli ayo nakadeula ng'hatu na wanhu weng'ha wawele nawali Yelusalemu kahi nawadeula. 4 Lelo, nakawachema hamwe watambika wakulu na walangusa wa malajizo ga Musa na kuwauza, "Yesu Kilistu kopondigwa kohi?" 5 Nawo nawedichila, "Kuli muji wa Betelehemu uwele ako Yudeya. Nayandichigwa na mloli wa Nguluwi,

6 " ‘Gwa Betelehemu uwele kuli isi ya Yuda,

hauwele mdodo ng'hatu hali wanhu wa Yuda,

kwa vila kwa hegwe kolawa chilongozi,

yawele kowalongoza wanhu wa heni, Isilaeli.’ "

7 Ahyo, Helodi nakawachema wala walola nhondwe kwa uviso, nakawauza kuwala mhela uwele yila nhondwe nayoneka. 8 Hamba nakawalajiza Betelehemu yolonga, "Mlute mkampale mwana na wone mmone, muye kundonjela nani ndute ndikamfugamile."

9 Lowamhulichize mndewa, wala walola nhondwe nawaluta na yila nhondwe iwele nawayona kula kolilawilaga isanya naiwalongola, nawo nawaiwinza mbaka hala loyimile, honhu hoyawele mwana. 10 Lowaiwene yila nhondwe, nawasangalala lukami. 11 Lelo, nawenjila mng'handa, nawamona yula mwana hamwe na Maliya mayake, nawenamiza na wamfugamila. Hamba nawamha ndolendole za hewo zowegale, ziwele ndo zahabu na ubani na mafuta galinguguzigwa kwa sendi nyinji galinguchemigwa manemane.

12 Nguluwi nakawakanya kuli kulota kota waleche kuhiluka kwa Helodi, ahyo nawahiluka haluga ha hewo kwa kukolela nzila yinji.

13 Wala wajenzi lowochile, mhilisi wa Mkulu nakamlawila Yusufu kuli kulota, nakamlonjela, "Winuche! Mhole mwana na mayake, mbilimile Misili. Mikale kuko mbaka hondikulonjela, kwa vila Helodi kangumpala ayu mwana leka yamkopole."

14 Ahyo, Yusufu nakenuka na kumhola mwana na mayake nawoka nechilo, nawaluta Misili. 15 Nawekala kuko mbaka Helodi loyabagame. Mbuli ayo naikoleka leka ulonzi woyalonjile Mkulu kwa kukolela mloli wenele, loyalonjile, "Nandimchema mwana wa heni kulawa Misili."

16 Helodi loyavizele kota wala walola nhondwe nawamhada, nakazudila ng'hatu. Nakalajiza wana wadodo wasongolo wawele kuli muji wa Betelehemu na honhu heng'ha hawele habehi na Betelehemu wawele wadodo ng'hatu mbaka miyaka mili wakopoligwe, kwa kiwhana na wula mhela woyalonjelwe na wala walola nhondwe. 17 Ahyo, wula ulonzi uwele naulonjigwa kwa kukolela mloli Yelemiya nawenela, uwele naulonga,

18 "Lizi nalihulikwa ako kuli muji wa Lama,

kulombocheza na kulila kwa usungu.

Laheli kangulila kwa chiwalo cha wanage,

halingugana kuhembulizwa,

kwa vila weng'ha nawabagama."

19 Helodi loyabagame, mhilisi wa Mkulu nakamlawila Yusufu kuli kulota kula Misili, 20 nakamlonjela, "Winuche! Umuhole mwana na mayake mhiluche kuli isi ya Isilaeli, kwa vila wala wawele nawagana kumkopola mwana, nawabagama." 21 Lelo, Yusufu nakenuka, nakamhola mwana na mayake, nawahiluka kuli isi ya Isilaeli.

22 Ila Yusufu loyahuliche kota Alichelausi, mwana wa Helodi, nakahola chigoda cha mhaza wa heye, nakawa mndewa wa Yudeya, nakadumba kuluta ako, kwa vila nakakanyigwa kuli kulota, ahyo nakaluta Galilaya 23 na kikala hali haluga ha heye halinguchemigwa Nasaleti. Ahyo ndo nawenela ulonzi ulonjigwe kwa kukolela waloli, ulingulonga, "Munhu kochemigwa Mnasaleti."