1 Hamba Muhe Yelile kamlongoza Yesu kuluta kuli chiwala leka yajezigwe na Limazoga. 2 Naloyesele kulya kwa mazuwa makumi gane (40) nemisi na nechilo, hamba nakona nzala ng'hatu. 3 Hamba Limazoga nalyuya kwa Yesu na kumlonjela, "Wone hegwe ndo Mwana wa Nguluwi, ugadite maganga aga gawe mibumunda." 4 Yesu nakedichila, "Nayandichigwa kuli Maandiko Matakatifu, ‘Munhu hochikala kwa kulya ibumunda hela, ila kwa chila ulonzi ulingulawa kwa Nguluwi.’ "

5 Hamba Limazoga nalimhola na kumhilika mbaka Yelusalemu, Muji Welile, nakamuwika mchanya mwa ilingo lya ng'handa ya Nguluwi liwele ng'wemang'wema ng'hatu, 6 nakedichila, "Wone hegwe ndo Mwana wa Nguluwi witoze hanyi, kwa vila nayandichigwa,

" ‘Nguluwi kowalajiza wahilisi wa heye kwa chiwalo cha hegwe, leka wakwamile,

wokuwika kuli moko ga hewo,

leka magulu ga hegwe galeche kikwang'hwala kuli iganga.’ "

7 Yesu nakedichila, "Kahi nayandichigwa kuli Maandiko Matakatifu, ‘Uleche kumjeza Mkulu Nguluwi wa hegwe.’ " 8 Limazoga nalimhola kahi Yesu na kumhilika kuli chidunda chikulu na kumlajila undewa weng'ha uwele muisi na lufufu lwake. 9 Hamba nalimlonjela, "Avi vyeng'ha ndokupa wone kofugamila heni na kinamiza hali heni." 10 Aho, Yesu nakedichila, "Wuche hano Limazoga! Nayandichigwa kuli Maandiko Matakatifu, ‘Umfugamile Mkulu Nguluwi wa hegwe na umkolele mijito heye yaliyeka.’ "

11 Lelo, Limazoga nalimleka Yesu na wahilisi wa kilanga nawoya kumtanza.

12 Yesu loyahuliche kota Yohani Mbatiza nakebatigwa na kuwichigwa mchinweng'ho, nakaluta Galilaya. 13 Nakoka Nasaleti nakuluta Kapanaumu, muji uwele hafungo na ilamba lya Galilaya, kuli mbaka wa wilaya za Sebuluni na Nafutali, nakekala ako. 14 Ahyo, nawenela wula ulonzi uwele naulonjigwa na mloli Isaya, uwele naulonga,

15 "Isi ya Sebuluni na isi ya Nafutali,

na kulutila kuli bahali kumwambu mwa lwanda lwa Yolodani,

na Galilaya, isi ya wanhu wa isi zeng'ha,

16 na wanhu walingikala kuli jiza,

walona lumuli lukulu.

Kwa hewo wawele nawali wochikala kuli isi ya jiza na lubehelo cha kubagama,

lumuli naluwamwemwesa kwa chiwalo cha hewo."

17 Kulawa mhela wula Yesu nakaluka kudamla yolonga, "Mumgalamchile Nguluwi, kwa vila undewa wa kilanga wa habehi!"

18 Yesu loyawele yojendajenda hafungo mwa ilamba lya Galilaya, nakawona wanhu weli, wawele ndo Simoni, yawele kahi nayali yochemigwa Petili hamwe na Andeleya, mng'holoze. Nawali wotoza utandawala wa hewo kuli ilamba, kwa vila nawali walowa somba. 19 Yesu nakawalonjela, "Mmbinze, nani ndowadita hemwe muwe walowa wanhu." 20 Ahyo, nawauleka utandawala wa hewo, nawamuwinza Yesu.

21 Loyawele yolutilila kujenda, nakawona kahi wanhu wanji, wawele ndo Yakubu na Yohani, wana wa Sebedayo. Awo nawali wekale kuli itumbwi hamwe na mhaza wawo Sebedayo, kuno wowika goya utandawala wawo. Lelo, Yesu nakawachema, 22 ahyo nawoka, nawalileka lila itumbwi hamwe na mhaza wa hewo, nawamuwinza Yesu.

23 Yesu nakakola chila honhu kuli Galilaya yolangusa kuli masunagogi na kudamla Mbuli Inojile kuwala Undewa wa Nguluwi na kuwosela wanhu matamwa gowawelenago. 24 Mbuli za heye nazenela kuli isi yeng'ha ya Siliya. Wanhu weng'ha wawele na matamwa galivinji na wanhu walingugazika magazo galivinji na chijeni na wawele na chijeni na wawele na chinzilisa na vyete, nawahilikwa kwa Yesu, naye nakawosela matamwa wanhu weng'ha. 25 Vilundo vinji vya wanhu kulawa Galilaya na Dekapoli na Yelusalemu na Yudeya na kumwambu mwa lwanda lwa Yolodani, navimuwinza Yesu.