1 "Mleche kuwatagusa wanhu wanji, mleche namwe kutaguswa na Nguluwi. 2 Kwa vila vyomuwatagusa wanji, namwe vyomtagusigwa hihyo na Nguluwi, chipimilo chichila cho mpimila kwa wanji, ndo Nguluwi choyopimila kwa hemwe. 3 Lekachoni, kwanguchona chibanzi chiwele miziho lya mng'holozo, ila uleka kuchona ching'anzi chiwele miziho lya hegwe? 4 Ama, koweza ndaze kumlonjela mng'holozo kota, ‘Mng'holozangu tandi ndikuse chibanzi chiwele miziho lya hegwe,’ Akuno nagwe uwele na ching'anzi chiwele miziho lya hegwe? 5 Kwamdesi hegwe! Use tandi chibanzi chiwele miziho lyako ndo koweza kulavya ching'anzi chiwele miziho lya mng'holozo.

6 "Mleche kujitozela mibwa vinhu viwele vyelile, leka jileche kugaluka na kuwaluma ne kujitozela migubi maganga ga sendi nyinji ga hemwe, leka jileche kugabiga.

7 "Mlande namwe mopegwa, na mpale namwe movyona, na mhodize lwizi, namwe mochumulilwa. 8 Kwa vila yoneche yalingulanda kangupegwa na yalingupala kanguchonaga na yalinguhodiza lwizi, kanguchumulilwaga. 9 Ndaze, hana yoneche hali hemwe yawele mwana wa heye hoyomlanda ibumunda, komha iganga? 10 Ama hoyomlanda somba, komha izoka? 11 Lelo, wone hemwe muwele wehile mwanguvizela kuwapa wana wa hemwe ndolendole zinojile, ndaze, hawele mhaza wa hemwe wa kilanga kodita mzidi. Kowapa ganojile wala walingumlanda.

12 "Geng'ha gomlingugana wanhu wawaditile, namwe muwaditile hewo hihyo. Kwa vila aga ndo malajizo ga Musa na malanguso ga waloli.

13 "Mwinjile kukolela lwizi luzisili. Kwa vila nzila ilikulongoza kuli kudumigwa ngazi, na lwizi lwa kwinjilila amo lugazi, walinguluta nzila ayo wenji. 14 Ila nzila ilikulongoza kuli ukomu nzisili, na lwizi lwa kwinjilila amo luzisili, wanhu wachefu hela ndo wovizela nzila ayo.

15 "Mwilole na waloli wa udesi. Hewo wanguya kwa hemwe wokoneka kota ming'holo kwa kunze, ila kwa mgati mibwa ja kisolo jing'hang'hale. 16 Mowazela kwa madito ga hewo. Ndaze, wanhu hubawaga ububu hali migodi ja miwa na misada kuli mbijili? Hebu! 17 Leka, igodi linojile lilelaga mafuza ganojile, na igodi lihile lilelaga mafuza gehile. 18 Igodi linojile halilelaga mafuza gehile, na igodi lihile halilelaga mafuza ganojile. 19 Chila igodi lyohambelilele mafuza ganojile, lyotemigwa na kutozigwa mchiluli. 20 Ahyo mowazela waloli wa udesi kwa madito ga hewo.

21 "Haiwele chila munhu yondonjela, ‘Mkulu, Mkulu’ kokwinjila kuli Undewa wa Nguluwi, leka yula yokweneza yaganile Mhaza wa heni yawele kilanga. 22 Wenji wondonjela zuwa lila lya utaguso, ‘Mkulu, Mkulu! Kwa itagwa lyako natwali tulangusa usenga wa hegwe na kwa itagwa lyako tulavya vijeni na kukola vinduzanduza vinji.’ 23 Aho, ndowalonjela, ‘Nasiwazelele hemwe ng'oo, muche kumwando kwa heni, hemwe mlingudita gehile.’

24 "Chila munhu yohulika gondilonga, na kugawika mnhumbula, kewhana na munhu yawele na nyhala yazenjile ng'handa hali italawe. 25 Nhonya itowa na nzanda zimema tendema, mbeho iputa, kuigwisa aila ng'handa. Ila ng'handa haigwile kwa vila na izenjigwa mitalawe.

26 "Ila yoneche yalinguhulika gondilonga ne kugawika mnhumbula, kewhana na munhu mpoka yazenjile ng'handa hali sangalaza. 27 Nhonya itowa na nzanda zimema na mbeho iputa nakuitigasa ng'handa, nayo igwa luu! Kahi kugwa ako kwali kukulu."

28 Yesu vyoyasindile kulonga ulonzi awo, wanhu weng'ha na wamemile honhu hala nawabubuwala na ulanguso wa heye. 29 Hawele kota walangusa wa malajizo ga Musa, ila nakalangusa kwa ludali.