1 Yesu vyoyaduliche kulawa kuli chidunda, vilundo vinji vya wanhu navimuwinza. 2 Lelo nakoya munhu yumwe yawele na uswema, kafugama kumwando kwa heye na kulonga, "Mkulu, wone ulingugana, kwanguweza kunyeliza." 3 Yesu nakagolola moko, nakamdoliza yula munhu, nakamlonjela, "Ndangugana welizwe," Baho du yula munhu, nakelizwa uswema wake. 4 Hamba Yesu nakamlonjela ayula munhu kata, "Ulole, uleche kumlonjela munhu yoneche, ila ulute kilajila kwa mtambika na ulavye ndolendole yoyalajize Musa leka utawize kota nakupona."

5 Yesu loyaliyokwinjla kuli muji wa Kapanaumu, kating'hana na mkulu wa wamizi, Mloma, kamlutila nakamdedeza, 6 yolonga, "Mkulu, chitumagwa wa heni, kawasa kaye, kazilika lukuli na kangutamika lukami."

7 Yesu nakamlonjela, "Ndokuya kumlohola." 8 Ayo mkulu wa wamizi Mloma nakamlonjela, "Mkulu, siganigwe winjile mng'handa ya heni. Ila ulonje ulonzi hela na chitumagwa wa heni kowa mkomu. 9 Mina, na heni nani nda munhu mbele hasi ha ludali lwa wanji, ndanawo wamizi hasi ha heni. Ndangumlonjela yumwe, ‘Ulute’ na heye kanguluta, na yunji, ‘Uye’ na heye kanguya, na chitumagwa wa heni, ‘Udite chinhu chino,’ na heye kangudita."

10 Yesu vyo yahuliche ago, na kabubuwala, na kuwalonjela wanhu wawele womuwinza heye, "Ndanguwalonjelani ndikomya, sinamona munhu yawele na makundo kota aga, kweng'ha Isilaeli. 11 Lelo ndanguwalonjela kota wanhu wenji wokuya kulawa kolilawila isanya na kolizinjila, na kikala hanyi hali ndiya hamwe na Abulahamu, na Isaka, na Yakubu kuli undewa wa kilanga. 12 Ila hewo wawele kuganigwa kuli undewa awo, wotozigwa kunze kuli kutitu, ako ndo kowolila na kujejeda mizino." 13 Yesu na nakamlonjela ayula mkulu Mloma, "Ulute kaye na go ukundile gowa gakoleche kwa hegwe." Na ayula chitumagwa wa heye kawa mkomu bahala.

14 Yesu nakafika kaye kwa Petili, nakamfika mkweye Petili yotamika yawasile mchinhanda, yapwituche lukami. 15 Lelo, Yesu nakamdoliza yula mamo kuli moko, utamwa naumleka, nakenuka na kwaluka kuwakolela mijito.

16 Vyoifichile matinazo, wanhu wawegala wanhu wenji wawele na vijeni, na heye kwa ulonzi hela nakaviwinga vijeni avyo. Nakawosela wanhu weng'ha matamwa ga hewo. 17 Nakadita hino kukomya gala goyalonjile Mloli Isaya genele.

"Heye yuye nakauhola ung'hochele wa hetwe,

Nakapika matamwa ga hetwe."

18 Yesu vyoyachiwene chilundo cha wanhu chimzungulute, nakawalonjela walanguswa wa heye walute kumwambu mwa ilamba. 19 Mlangusa yumwe wa malajizo ga Musa kamlutila nakumlonjela, "Mlangusa, heni ndokuwinza koneche kouluta." 20 Yesu kamwidichila, "Mibwa ja kisolo jina mhalika, na videje vya kuulanga vina vimvulila, ila Mwana wa munhu, kahela honhu ha kuwasiliza mutwi na kwesela."

21 Hamba munhu yunji, yawele mli walanguswa wa heye, nakamlonjela, "Mkulu, ung'hundize tandi ndute ndikamtile mhaza wa heni." 22 Ila Yesu nakamlonjela, "Umbinze heni! Waleche wabagame wawatile wayao wabagame."

23 Yesu nakenjila kuli itumbwi na walanguswa wa heye nawamuwinza. 24 Baho du, nhigu ng'hulu nailawila kuli ilamba, nhigu nazaluka kuligubika itumbwi, ila Yesu nayali yawasile. 25 Walanguswa na waluta akula koyawasile, nawamlanda wolonga, "Mkulu yawalohole na aila nhigu." 26 Yesu kawalonjela, "Hemwe wanhu muwele na makundo mado, leka choni mwangudumba?" Hamba nakenuka na kuilonjela yila nhigu na mbeho nayali iputa, inyamalile na inyamalila tulu. 27 Wanhu weng'ha nawabubuwala, walonga, "Ayu munhu wachi? Mbaka Nhigu na mbeho vyangumuhulichiza."

28 Yesu loyoyile kuli isi ya Wagadala, kumwambu na alila ilamba, nakating'hana na walume weli walawile kuli mipalika kuwele na vilaga. Wanhu awa wali na chijeni kumutwi, chiwang'ang'aze heko mbaka wanhu wawele wodumba kukola nzila ayo. 29 Na hewo bahala nawayowa, "Kwangugana choni na hetwe, hegwe mwana wa Nguluwi? Ndaze, kuya kutugaza mhela haunoya?"

30 Habehi na honhu aho, kwali na migubi minji jidimwa. 31 Lelo avyo vijeni navimdedeza, "Wone ulingugana kutulavya, utukundize twinjile kuli jila migubi." 32 Yesu nakavilonjela, "Aya mlute." Baho vijeni naviwalawa wanhu wala, na kwinjila kwa migubi. Chilundo cheng'ha cha migubi jichina mnyenje na kwinjila milamba, na migubi jeng'ha jibagama.

33 Wadimi wa ajo migubi nawabilima, waluta kaye. Ako walavya mbuli zeng'ha loziwalawile na mbuli ziwalawile wala wanhu wawele na vijeni vihile. 34 Leka wanhu weng'ha wa ula muji nawalawa, nawamlutila Yesu, na lowamuwene wamlonjela kota yoche kuli isi ya hewo.