1 Yesu loyawawene wanhu wenji, nakakwina kuli chidunda na kikalisa. Walanguswa wa heye nawaluta kwa heye. 2 Naye nakaluka kudamla,

3 "Nawatambichizwa wawele ng'hochele kuli nhumbula,

kwa vila undewa wa kilanga ndo wa hewo!

4 Nawatambichizwa wala walingulombocheza,

kwa vila Nguluwi kowahembuliza.

5 Nawatambichizwa wawele waliholile,

kwa vila woihalila isi!

6 Nawatambichizwa wawele na nzala na ng'halu ya kudita gatanganiche,

kwa vila Nguluwi kowagutiza.

7 Nawatambichizwa wawele na isungu kwa wanji,

kwa vila Nguluwi kowonela isungu.

8 Nawatambichizwa wawele na nhumbula zilihela nongwa,

kwa vila womona Nguluwi.

9 Nawatambichizwa walinguwahanyisa wanhu,

kwa vila wochemigwa wana wa Nguluwi.

10 Nawatambichizwa walingugazika kwa chiwalo cha kudita gatanganiche,

kwa vila undewa wa kilanga ndo wa hewo.

11 "Namtambichizwa hemwe, wone wanhu wowaliga hemwe na kuwagaza hemwe na kulonga wihe kuwala hemwe, kwa chiwalo cha heni. 12 Msangalale na kutowa luchenze, kwa vila chonolo chompegwa chowa chikulu kilanga. Ahi ndo vyowalinguwabunza waloli wawalongole hemwe.

13 "Hemwe ndo mwino wa isi, wone mwino wajilize unojenoje wake, wohilulwa ndaze unojenoje awo? Haiwa chinhu kahi, yoboholwa kunze na kubijigwa na wanhu.

14 "Hemwe mwa lumuli lwa isi yeng'ha! Muji uwele nauzenjigwa mchanya mwa chidunda, hauchivisa. 15 Wanhu hawalingubwina chenje na kuchigubika na chidoto, ila wanguchiwikaga honhu ha kuwichila chenje leka chiwalangazile weng'ha wawele mng'handa. 16 Hihyo du lumuli lwa hemwe lwanguganigwa lulangaze hali wanhu, leka wagone madito ga hemwe ganojile, leka wamtogole Mhaza wa hemwe yawele kilanga.

17 "Mleche kijesa kota nambuya kusa malajizo ga Musa na malanguso ga waloli. Suyile kusa ila kweneza. 18 Ndikomya ndanguwalonjela hemwe, mbaka aho ulanga na isi hovikola, haduhu honhu hado hawele nahandichigwa kuli malajizo hawele hokusigwa mbaka geng'ha hogokwenela. 19 Lelo, yoneche yawele kobena mzilo woneche na kuwalangusa wanhu wanji wadite ahyo, munhu ayo kowa mdodo ng'hatu kuli undewa wa kilanga. Ila yula yawele kobatilila na kuwalangusa wanji, ayo kowa mkulu kuli undewa wa kilanga. 20 Ahyo ndanguwalonjela hemwe, wone kutanganika kwa hemwe hakupulute kula kwa Mafalisayo na kwa walangusa wa malajizo ga Musa, hamkwinjila kuli undewa wa kilanga.

21 "Namhulika kota wanhu wa katali nawalonjelwa, ‘Uleche kukopola! Heye yawele kokopola koganigwa kutagusigwa.’ 22 Ila ndanguwalonjela hemwe kota munhu yoneche yawele komzudila mng'holoze, munhu ayo koganigwa kutagusigwa na yalingumbeza mng'holoze, kohilikwa kwa watagusa. Yalingumchema mng'holoze, ‘Hegwe kwa mpoka,’ ayo kanguganigwa kutagusigwa kwinjila kuli chiluli cha Jehanamu. 23 Lelo, wone kohilika nhambiko ya hegwe hali honhu ha kulavila nhambiko na wone kokumbuchila kota kuna kilewa na mng'holozo, 24 ileche ayo nhambiko hali honhu ha kulavila nhambiko, uhiluche leka wihanyise na mng'holozo, hamba uhiluche kulavya nhambiko.

25 "Mihanyise himahima hegwe na munhu yawele nakakulonjeleza kuno muwele mnzila kulutula kuli chitala. Wone haudita ayo homuwa mluta kuli chitala, munhu ayo kokuhilika kwa mtagusa, naye mtagusa kokuwika mmoko wa wamizi, nawo wamizi wokuwika mchinweng'ho. 26 Ndikomya, ndangukulonjela, huweza kulawa amo mbaka houlipa sendi yeng'ha.

27 "Namhulika kota wanhu nawalonjelwa, ‘Mleche kudita ung'hondwa!’ 28 Ila ndanguwalonjela hemwe, yoneche yalingumlola mdala kwa kumgana, kowa yaditile ung'hondwa mnhumbula mwa heye. 29 Wone iziho lyako lya kudilo lyokwambuza kudita gehile, ulyuse na kulitoza kutali. Fola munhu yajilize chitomo chimwe cha lukuli lwa heye, kusinda lukuli lweng'ha kwinjila kuli chiluli cha Jehanamu. 30 Wone moko wa hegwe wa kudilo wokwambuza kudita gehile, udumule na uutoze kutali. Fola uwe ulihela chitomo chimwe kuli lukuli, kusinda lukuli lweng'ha kwinjila kuli chiluli cha Jehanamu.

31 "Kahi katali nailonjigwa, ‘Yalingumleka mchewake, naimgana yamwandichile kalatasi ya luleko.’ 32 Ahyo ndanguwalonjela hemwe wone mlume komleka mchewake kwa mbuli yohaiwele ya ung'hondwa, kangumdita mchewake yawe mng'hondwa na munhu yoneche yawele komhola mdala yalechigwe, kangudita ung'hondwa.

33 "Namhulika kota wanhu wa katali nawalonjelwa, ‘Uleche kilaha kwa udesi, ila weneze chila chilaho choulahile kwa Mkulu.’ 34 Lelo, ndanguwalonjela, mleche kilaha, haiwele kwa kilanga, kwa vila ulanga ndo chigoda cha undewa cha Nguluwi, 35 ne kwa isi, kwa vila ndo honhu ha heye ha kuwichila magulu, ne kwa Yelusalemu kwa vila ndo muji wa mndewa Mkulu. 36 Na mleche kilaha kwa vitwi vya hemwe, kwa vila hamuweza kuidita mnvili imwe iwe nzelu ama iwe nhitu. 37 Houlonga, ‘Ena’ iwe ‘Ena,’ na houlonga, ‘Hebu,’ iwe ‘Hebu.’ Choneche chiwele ndo mzidi wa ago, changulawa kwa yula mwihe.

38 "Namhulika kota nailonjigwa. ‘Iziho kwa iziho na izino kwa izino.’ 39 Ila heni ndanguwalonjela hemwe, mleche kitwanza na mwihe. Wone munhu yakuzabule izeze lya kudilo, mgalamlile kahi na lya kumoso. 40 Wone munhu kokulonjeleza kuli chitala yogana kuhola igwanda lyako, mleche yahole kahi na ikoti lyako. 41 Wone munhu kokulonjela widwiche momholo ya heye kwa lupichi kwa utali wa kilomita imwe, widwiche kilomita mbili. 42 Umhe yalingulanda, uleche kumha chigosi yalingugana umwaziche chinhu.

43 "Namhulika nailonjigwa kota. ‘Mgane yalingikalasa habehi na hegwe na umzudile mng'honyo wa hegwe.’ 44 Ila lelo ndanguwalonjela hemwe, muwagane na wang'honyo wa hemwe, na kuwalandila walinguwagaza hemwe, 45 leka muwe wana wa Mhaza wa hemwe yawele kilanga. Heye kanguwalangazilaga lumuli lwa isanya wehile na wanojile na kuwatowela nhonya watanganiche na wehile. 46 Ndaze, mopegwa chonolo chachi wone mowagana walinguwagana hemwe hela? Mbaka wakongoza sendi za kodi wanguwaganaga wayawo! 47 Wone namwe mowalamusa wang'holozenu hela, ndaze, mwangudita choni mzidi wa wanji? Ndaze, wanhu wohambe wamzele Nguluwi hawalingudita ahyo? 48 Ahyo muwe welile kota Mhaza wa hemwe yawele kilanga vyoyawele yelile.