Marcos 6

22 Mwana wu Elodiade wu mukento wukota na wukina, wutoma yangidika Elode na bantu ba katumisa ku mukembo andi. Buna ntinu wuta ku ndumba ti: «Ndomba kyonso-kyonso kima ki wutiidi, mpe kya nina kuhaana.» 23 Mpe wudya ndefi ti: «Nina kuhaana kyonso-kyonso kima ki waandomba, ni kiba ndambu yi nsi yi kimfumu kyani.» 24 Mwana ndumba wuduuka na wuteela wo ngudi andi: «Nki nalendi lomba e?» Ngudi andi wumuvutudila ti: «Mutu wu Yoane Mumbotiki.» 25 Wutumbu vutuka mu muswalu ku ntinu na wumulomba ti: «Ntiidi ti wumpana, butusidi bubu, mutu wu Yoane Mumbotiki mu ndonga!» 26 Ntinu wukota mu kyadi, kansi kalendi bisa ko, mu dyambu di ndefi yi kadya ha ntadisi yi bantu ba katumisa. 27 Ntinu wutumbu tambika mbulu-mbulu yimosi na lutumu lwe nata mutu wu Yoane Mumbotiki. Mbulu-mbulu yiyenda tabula mutu wu Yoane mu boloko. 28 Mboki wutwala mutu mu ndonga, na wuhaana wo ku mwana ndumba, mpe yandi wuhaana wo ku ngudi andi.