4 Bumosi mpe ku yeno zimpangi zani, lweka bantu bafwa ha ntadisi yi Misiku bu lweka kintwadi na nitu yi Klisto. Muntu wuhiika bwabu wuluvwidi, ni yondowo wufuluka mu bafwa, mwanki tubuta mimbutu mu dyambu di Nzambi. 5 Mu dyambu ti mu ntangu yitwedi teka zinganga mu kimuntu, mpwila zi masumu mu luyaalu lu Misiku zedi salanga mu binama byeto, mwanki zibuta mimbutu mikwe natanga ku lufwa. 6 Kansi bwabu tweka mu kimpwanza ha ntadisi yi Misiku mu dyambu ti, tweka bafwa mu myo myedi tukanganga mu kinkole, mwanki tusadila mu nsalulu yimoona yi Mpeve, kansi ka mu luyaalu luntama lu Misiku misonama ko.