1 ሶርያ ካቲ በንሀዳድ ባረ ኦላንቻቱዋ ኡባ እትፐ ሺሼዳ። ሀታማነ ላኡ ካተቱዋን፥ ኡንቱንታ ፓራቱዋንነ ፓራ ጋረቱዋን ማደቲደ፥ ፑደ ቢደ ሳማርያ ካታማ ዶዴዳ፤ አ ቦላ ዎራጄዳ። 2 እስራኤልያ ካትያ አካባዉ ካታማ ግዶ አሳ ኪቲደ ሀዋዳን ያጌዳ፤ 3 "በንሀዳድ፥ ‘ነ ብራይነ ነ ዎርቃይ ታዋ ነ ማቼቱዋፐነ ነ ናናቱዋፐ ሎኡዋ ዳርያዋንቱ ታዋ’ ያጌ" ያጌዳ።

4 እስራኤልያ ካቲ ዛሪደ፥ "ኤ፥ ታ ጎዳዉ ካትያዉ፥ ኔን ጌዳዋካ ማላ፤ ታንካ ታዉ ደእያባይካ ኡባይ ነባ" ያጌዳ።

5 ቃይካ ኪተቴዳ አሳቱ ላኤንዋ ዪደ፥ "ኔና በንሀዳድ፥ ‘ታን ካሰ ኔና፥ "ነ ብራነ ነ ዎርቃ፥ ነ ማቼቱዋነ ነ ናና ታዉ እማ" ጋደ ኪታድ። 6 ሽን ዎንት ሀኖደ ነ ጎልያነ ነ ኦሳንቻቱ ጎልያ ፕልግ ጼላና ማላ ታ ኦሳንቻቱዋ የዳና። ኡንቱንቱ ኔን ሎኦባ ጋደ ዎዳዋ ኡባ አኪደ አፋናዋ’ ያጌ" ያጌድኖ።

7 እስራኤልያ ካቲ ሄ ቢታ ጭማቱዋ ኡባ ጼስ ሺሺደ፥ "ሀ ብታኒ ኑና ባይዛናዉ ኮይያዋ በእተ። እ ታ ማቻቱዋነ ታ ናና፥ ታ ብራነ ታ ዎርቃ አካናዉ ኪቴዳ፤ ታን አዉ እጻበይከ" ያጌዳ።

8 ጭማቱካ አሳይካ ኡባይ አካባ፥ "እ ኦድያዋ ስሶፓ! ዎይ አዉ፥ ‘ኤኖ’ ጎፓ!" ያጌድኖ።

9 ሄዋ ድራዉ፥ በንሀዳድ ኪቴዳዋንቶ አካብ፥ "ህንተንቱ ታ ጎዳዉ ካትያዉ፥ ‘ኔን ኮይሮ ኪቴዳ ኪታ ታን ፖላና፤ ሽን ሀ ኪታ ታን ፖላናዉ ዳንዳይከ’ ያጌ ጊደ ኦድተ" ያጌዳ።

ኪተቲደ ዬዳዋንቱ ቢደ ሄዋ በንሀዳዳዉ ኦዴድኖ። 10 ሄዋፐ ጉይያን በንሀዳድ ሀራ ኪታ የዲደ፥ "ታና ካልያ አሳ ሳማርያ ካታማ ባናይ እት እት ኩቻ ጋኮፐ፥ ጾሳቱ ታና ዎና" ያጌዳ።

11 እስራኤልያ ካቲ ኪተቲደ ዬዳዋንታ፥ "ቱሙ ኦላንቻይ ኦላፐ ስሚደ ገሬረፐ አትና፥ ብሮ ቢደ ገሬረና ያጊደ ኦድተ" ያጌዳ።

12 በንሀዳድነ ካተቱ፥ ባረንቱ ዱንካንያ ግዶን ኡሻ ኡሺደ ሄዋ ስሴዳ ዎደ፥ ካቲ ባረ ኦላንቻቱዋ፥ "ኦላናዉ ሳልፕተ" ያጊደ አዛዜዳ። ኡንቱንቱ ካታማ ኦላናዉ ሳልፔድኖ።

13 ሄ ዎደ ትምቢትያ ኦድያ እት ብታኒ እስራኤልያ ካትያ አካባኮ ዪደ፥ "መና ጎዳይ ኔና ሀዋዳን ያጌ፤ ‘ሀ ከንቼቻ ኦላንቻቱዋ ኡባ በአይ? ታን ሀቼ ኡንቱንታ ነ ኩሽያን አደ እማና፤ ታን መና ጎዳ ግድያዋ ኔን ሄዋን ኤራና’ ያጌ" ያጌዳ።

14 አካብ፥ "ኦላ ዶማናዌ ኦኔ?" ያጌዳ።

ትምቢትያ ኦድያዌ፥ "አዉራጃ ሞድያዋንቱ አዛዝያ ያላጋ ኦላንቻቱ ዶማና" ያጌዳ።

ካቲ፥ "አትያ ኦላንቻቱዋ ኦኔ አዛዛናዌ?" ያጌዳ።

ትምቢትያ ኦድያዌ፥ መና ጎዳይ ያጌ፤ "ኔን አዛዛና" ያጌዳ።

15 ሄዋ ድራዉ፥ አካብ አዉራጃ ሞድያዋንቱ አዛዝያ ያላጋ ኦላንቻቱዋ፥ ላኡ ጼታነ ሀታማነ ላአቱዋ ሺሼዳ። ቃይ አቴዳ እስራኤልያ አሳ፥ ላፑን ሻኣ ሺሼዳ።

16 በንሀዳድ ባረና ማዴዳ ሀታማነ ላኡ ካተቱዋና እትፐ ዱንካንያን ኡቲደ ኡሻን ማት ደእሽን፥ ሴታ ጋላስ እስራኤልያ ኦላንቻቱ ኦላዉ ከሴድኖ። 17 አዉራጃ ሞድያዋንቱ አዛዝያ ያላጋ ኦላንቻቱ ኮይሮ ከሲደ ቤድኖ።

በንሀዳድ ጾሞስያዋንታ ኪትና፥ ኡንቱንቱ ስሚደ አዉ፥ "ሳማርያፐ አሳይ ከስ ዪደ ደኤ" ያጊደ ኦዴዳ።

18 እ፥ "ኡንቱንቱ ስጋዉ ዮፐካ ኦላዉ ዮፐካ፥ ኡንቱንታ ፓጻ ኦይቂተ" ያጌዳ።

19 አዉራጃ ሞድያዋንቱ አዛዝያ ያላጋ ኦላንቻቱ ሳልፒደ፥ ካታማፐ ጋጻ ከሴድኖ፤ እስራኤልያ ኦላንቻቱካ ኡንቱንታ ካሊደ ከሴድኖ። 20 ኡባይካ ሁጲያን ሁጲያን ባረናና ኦላ ጋከቴዳ ሞርክያ ዎድኖ። ያትና፥ ሶርያ አሳቱ ባቃቴድኖ፤ እስራኤልያ አሳቱ ካሊደ የደርሴድኖ። ቃይ ሶርያ ካቲ በንሀዳድ ባረ ፓራ አሳቱዋና ባረ ፓራን ከስ አኪደ ቤዳ። 21 እስራኤልያ ካቲ ኦላዉ ከሲደ፥ ፓራቱዋነ ፓራ ጋረቱዋ ኦሞዴዳ፤ ሶርያ አሳቱዋካ ዎዋ ቡዳ።

22 ሄዋፐ ጉይያን ትምቢትያ ኦድያዌ እስራኤልያ ካትያኮ ዪደ፥ "ባ፤ ነ ባጋ ምንሳ። ኦሰታናዉ በስያብ አየንቶ አኬካ። አያዉ ጎፐ፥ ይያ ላይ ቦንያን ሶርያ ካቲ ኔና ላኤንዋ ኦላና" ያጌዳ።

23 ሄዋዳን ደእሽን ሶርያ ካትያ ኦሳንቻቱ አ ሀዋዳን ያጊደ ዞሬድኖ፤ "ኡንቱንቱ ጾሳቱ ደረቱዋ ጾሳቱዋ፤ ኡንቱንቱ ኑዉ ዎልቃሜዳዌካ ሀዋሳ። ሽን ኑን ኡንቱንቱና ደምባን ኦላ ጋከትንቶ፥ ኑን ቱሙ ኡንቱቱፐ ምናና። 24 እትባ ሀና፤ ካተቱዋ ኡባ ኡንቱንቱ አዛዝያ ሳፐ ድጋደ፥ ሀራ ካፓቱዋ ኡንቱንቱ ሳኣን ዎ። 25 ኑን እስራኤላቱዋና ደምባን ኦለታናዉነ ጾናናዉ ዳንዳያና ማላ፥ ነዉ ካሰ ዉሬዳ ኦላንቻቱ ሳኣን ኦላንቻቱዋ፥ ፓራቱዋ ሳኣን ፓራቱዋ፥ ፓራ ጋረቱዋ ሳኣን ፓራ ጋረቱዋ ዎደ፥ ደንናዉ ኮሼ" ያጌድኖ። እካ ኡንቱንቱ ዞርያ ማዪደ፥ ሄዋዳን ኦዳ።

26 ይያ ላይ ቦንያን በንሀዳድ ሶርያ ኦላንቻቱዋ ሺሺደ፥ እስራኤላቱዋና ኦለታናዉ አፌቃ ግያ ካታማ ቤዳ። 27 እስራኤልያ ኦላንቻቱካ ሺቂደ፥ ሽንቃነ ኦላ ሚሻ አኪደ፥ ኡንቱንቱና ኦላ ጋከታናዉ ላኡ ጭታ ግዲደ ከሴድኖ። እስራኤላቱ ላኡ ጉ ዴሻ ዉድያ ማላቲደ፥ ኡንቱንቱኮ ስሚደ ኡቴድኖ፤ ሽን ሶረቱ ጋጻርያ ኡባ ማዬድኖ።

28 ጾሳ አሳ ግያ እት ብታኒ ፑደ ዪደ፥ እስራኤልያ ካትያ፥ "መና ጎዳይ ሀዋዳን ያጌ፤ ‘ሶርያ አሳቱ፥ "ጾሳይ ደረቱዋ ጾሳ ግድያዋፐ አትና ደምባቱዋ ጾሳ ግደና" ያጌዳ ድራዉ፥ ሀ ከንቼቻ ኦላንቻቱዋ ኡባ ታን ነ ኩሽያን አ እማና። ሄ ዎደ ታን መና ጎዳ ግድያዋ ኔንነ ነ አሳይ ኤራና’ ያጌ" ያጌዳ።

29 ሶረቱነ እስራኤላቱ እቱ እቱዋኮ ስሚደ ሳልፒደ፥ ላፑን ጋላሳ ጋምኤድኖ። ላፑን ጋላሳን ኦላ ጋከቴድኖ፤ እስራኤላቱ እት ጋላሳን ሶርያ አሳፐ ጼቱ ሻአ ገድሳ አሳቱዋ ዎድኖ። 30 ኡንቱንቱፐ አቴዳዋንቱ ከስ አክ ቢደ፥ አፌቃ ካታማ ገሌድኖ። ላታማነ ላፑን ሻአ አሳ ቦላ ካታማ ዩሹዋ ግምቢ ኩንዲደ ያን ዎዳ።

በንሀዳድካ ሄ ካታማዉ ባቃቲደ፥ እት ቆልኡዋን ቆሰቴዳ። 31 አ ኦሳንቻቱ አ፥ "እስራኤልያ ካተቱ ማርያዋንታ ግድያዋ ኑን ስሴዶ። ዋሩዋ ኑ ዞክያን ማዪደ፥ ዎዶሩዋ ኑ ቆያን ጻጺደ፥ አነ እስራኤልያ ካትያኮ ቦይተ። ኦን ኤሪ፥ እ ኔና ፓጻ አሻናዌንቶነ" ያጌድኖ። 32 ዋሩዋ ባረንቱ ዞክያን ማዪደ፥ ዎዶሩዋ ባረንቱ ቆያን ጻጺደ፥ እስራኤልያ ካትያኮ ቤድኖ። አ፥ "ነ ቆማይ በንሀዳድ ኔና፥ ‘ሀይ ታና ዎፓርኪ’ ያጌ" ያጌድኖ።

ካቲ፥ "እ ሀኖ ጋካናስካ ፓጻ ደኢ? እ ታ እሻ" ያጌዳ።

33 አሳቱ ሎኦ ማላታዳን አ ሃሳያ ኤሌል አኪደ፥ "ኤ፥ ነ እሻይ በንሀዳድ ፓጻ ደኤ" ያጌድኖ።

እ ኡንቱንታ፥ "ቢደ አ ታኮ አኪደ ዪተ" ያጌዳ። በንሀዳድ ከሲደ ዪና፥ አካብ አ ፑደ ባረ ፓራ ጋርያ ቦላ ከሲደ ኡትሴዳ።

34 ያትና፥ በንሀዳድ አካባ ሀዋዳን ያጌዳ፤ "ታ አዉ ነ አዉዋፐ አኬዳ ካታማቱዋ ታን ነዉ ዛራና። ታ አዉ ሳማርያን ገያ ኤሴዳዋዳን ኔንካ ዳማስቆ ካታማን ገያ ኤሳና" ያጌዳ።

አካብ አ፥ "ታን ሀ ጫቁዋን ኔና የዳና" ያጌዳ። አናና ጫቁዋ ጫቀቲደ አ የዴዳ።

35 ትምቢትያ ኦድያዋንቱ ጩጉዋፐ እት ብታኒ መና ጎዳ ቃላን አዛዘቲደ እት ባረ ላግያ፥ "ታና ሾጫ" ያጌዳ፤ ሽን ሄ ብታኒ ሾጨናን እጼዳ። 36 ትምቢትያ ኦድያዌ አ፥ "ኔን መና ጎዳዉ አዛዘተናን እጼዳ ድራዉ፥ ኔን ታፐ ሻከታደ ቢና ኤለካ ኔና ጋሙ ዎና" ያጌዳ። ብታኒ ትምቢትያ ኦድያዋፐ ሻከት ብና ኤለካ ጋሙ ጋከቲደ ዎ ባሼዳ።✝

37 ትምቢትያ ኦድያዌ ቃይካ ሀራ እት ብታንያ ደሚደ፥ "ታና ሾጫ" ያጌዳ። ብታኒ አ ሾጬዳ፤ ትምቢትያ ኦድያዌ ማዱንጼዳ።

38 ቢደ፥ ካትያ ናጊደ ኦግያ ዶናን ኤቄዳ። ኤረተናን አታናዉ ባረ ዴሙዋ ጎዜዳ። 39 ካቲ ኦግያና አያ ዎደ፥ ትምቢትያ ኦድያዌ ካትያ ጼሲደ ሀዋዳን ያጌዳ፤ "ታን ነ ቆማይ ኦላን ኦለትሽን እት ብታኒ ታኮ ዪደ፥ ‘ሀ ኦሞደቴዳ ብታንያ ናጋ። ሀ ብታኒ ባቃትያዋ ግዶፐ፥ ነ ሸምፑ አ ሸምፑዋና ጋደ፥ ዎይ ሄዙ ሻአ ጻጋራ ብራ ጭጋሳ’ ያጌዳ። 40 ታን ነ ቆማይ ኪታይ ዳርና፥ ያነ ሃነ ጊሽን፥ ብታኒ ከስ አኪደ ብ ክቼዳ" ያጌዳ።

እስራኤልያ ካቲ፥ "ኔን ኔረካ ፕርዳዳ፤ ነ ፕርዳይካ ሄዋ ግዳናዋ" ያጌዳ።

41 ትምቢትያ ኦድያዌ ባረ ዴሙዋ ጎዜዳ ጫርቂያ ፖሽ የጌዳ። ፔና እ ትምቢትያ ኦድያዋንቱፐ እቱዋ ግድያዋ ካቲ ኤለካ ኤሬዳ። 42 ትምቢትያ ኦድያዌ ካትያዉ፥ "መና ጎዳይ፥ ‘ታን፥ "እ ሀይቃና በሰ" ጌዳ ብታንያ ኔን የዳ አጋዳ። ሄዋ ድራዉ፥ ነ ሸምፑ አ ሸምፖ ኮታ ጊዳና፤ ነ አሳይ አ አሳ ኮታ ግዳና’ ያጌ" ያጌዳ። 43 እስራኤልያ ካቲ ሀንቀቲድነ ላንጪደ፥ ባረ ሶ ሳማርያ ካታማ ቤዳ።