Jó 26

ኢዮብ ዛሪደካ ሃሳዬ

1 ኢዮብ ሀዋዳን ያጊደ ዛሬዳ፤ 2 "ዎልቃይ ባይና አሳ ኔን አያ ማዱዋ ማዳዲ! ዳቡሬዳ ቀሰቱዋ ኔን አያ አሹዋ አሻዲ! 3 አዳ ኤራተይ ባይናዋ አያ ዞርያ ዞራዲ! አይ ኬሻ ዎልቃማ ኤራተ ቆንጭሳዲ! 4 ኔን ሀ ቃላ ሃሳያናዳን ኔና ኦኔ ማዴዳዌ? ቃይ ሀዋዳን ሃሳያናዉ ኔና ደንዳዌ ኦ አያኔ?" ያጌዳ።

ብልዳደ ባረ ሃሳያ ዉርሴ

5 ብልዳደ፥ "ሀይቄዳዋንቱ ሞይትለቱ ቢታፐ ጋርሳ ባጋና ሃ ግዶን ኮኮሪኖ። 6 ጾሳ ስንን ስኦሊካ ቆንጨ፤ አያይነ አ ገንናዉ ዳንዳየና። 7 ጾሳይ ሁጲሳ ባጋ ሳሎቱዋ ምጬዳ፤ ሳኣካ አየንቶ ባይና ሳን ካቄዳ። 8 እ ሻረቱዋን ሃ ኩን፤ ሃ ዴጹዋን ሻረቱ ዳከትክኖ። 9 ዶይሴዳ አግና እ ባረ ሻርያን ካሜ። 10 ፖኡዋ ማፐ ሻካናዉ፥ ሳሉ ሳኣና ዳንትያ ሳኣን ቃማይነ ጋላሳይ ላመትያ ዛዋ ጾሳይ ኤሴ። 11 እ ሴርያ ዎደ፥ ሳሎቱዋ ቱቀቱ ዳጋማዉ ኮኮሪኖ። 12 ባረ ዎልቃን አባ ጮኡ ኦዳ፤ ባረ አኬካን ራኣባ ግያ ዳዊያ ይሴዳ። 13 እ ሸምፕያ ሸምፑዋን ሳሎቱ ጌዬድኖ፤ አ ኩሺካ ጾንገትያ ሾሻ ዎዳ። 14 ሀዋንቱ ኡባይ ጾሳይ ኦዳ ኦሶቱዋፐ አማሬዳዋንታ፤ ኑን ስስያዌ ሳሱከ ጻላላ። ያትና፥ አ ዎልቃ ግታተ አኬካናዉ ዳንዳይያዌ ኦኔ?" ያጌዳ።