1 መና ጎዳይ ሙሳ ሀዋዳን ያጌዳ፤ 2 "እስራኤልያ አሳዉ ሀዋዳን ያጋደ ኦዳ፥ ‘እስራኤልያ አሳፐ ግድና፥ ዎይ በቲደ ዪደ እስራኤልያ ግዶን ደእያ ሀራ ቢታ አሳፐ ግድናካ፥ ኦንነ ባረ ናናቱዋፐ እቱዋ ሞሎካ ግያ ኤቃዉ አደ እሞፐ፥ ሄ አሳይ ሀይቆ፤ ሄ ቢታ አሳይ አ ሹቻን ጫዲደ ዎ። 3 ታን ሄ ብታንያ እጻና፤ አ አሳ ግዶፐ ሾዳደ አ ይሳና። አያዉ ጎፐ፥ እ ባረ ናናቱዋፐ እቱዋ ሞሎካ ግያ ኤቃዉ እምያዋን፥ ታ ዱንካንያ ቱንሴዳ፤ ታ ጌሻ ሱንካ ካዉሽሴዳ። 4 ሄ ብታኒ ባረ ናናቱዋፐ እቱዋ ሞሎካዉ እምያ ዎደ፥ ሄ ቢታ አሳይ በኢደ፥ ሸነኮ ጎፐ፥ ቃይ ብታንያካ ዎናን አጎፐ፥ 5 ታን ታ ሁጲያዉ ሄ ብታንያነ ሄ ሶ አሳ እጻና፤ ሞሎከና ሻርሙጻናዉ አ ካልያ ኡባቱዋ ኡንቱንቱ አሳ ግዶፐ ቦህተ።

6 " ‘አይ አሳይነ ታናን አማነተናን እጺደ፥ ሞይትልያ ሃሳይስያዋንታነ ሻሬቾቱዋ ኦቻናዉ ቦፐ፥ ታን አ እጻና፤ አ አሳ ግዶፐካ ይሳና።

7 " ‘ታን፥ መና ጎዳይ፥ ህንተ ጾሳ ግድያ ድራዉ፥ ስም ህንተ ህንተና ዱማይተ፤ ቃይ ጌሻ ግድተ። 8 ታ ህግያ ናግተነ ኦተ። ታን ህንተና ጌሽያ መና ጎዳ።

9 " ‘አይ አሳይነ ባረ አዉዋ ዎይ ባረ ዳዮ ሸቆፐ ሀይቆ። እ ባረ አዉዋ ዎይ ባረ ዳዮ ሸቄዳ ድራዉ፥ አ ሱ አጩ አ ቦላና።✝20:9 ከሳ 21:17፤ ማቶሳ 15:4፤ ማር. 7:10

10 " ‘እት አሳይ ባረ ሾሩዋ ማቻትና ግሶፐ፥ ሄ ግሴዳ ብታኒነ ምሽርታ ላኡካ ሀይቂኖ።✝20:10 ከሳ 20:14፤ ዎጋ 18:20፤ ዛረ. 5:18 11 ባረ አዉዋ ማቻትና ግሴዳ አሳይ ባረ አዉዋ ካዉሽሴዳ፤ ኡንቱንቱ ላኡካ ሀይቂኖ። ኡንቱንቱ ሱ አጩ ኡንቱንቱ ቦላና።✝20:11 ዎጋ 18:8፤ ዛረ. 22:30፤ 27:20 12 እት አሳይ ባረ ናኣ ማቻትና ግሶፐ፥ ኡንቱንቱ ላኡካ ሀይቂኖ። ኡንቱንቱ ቱናባ ኦድኖ። ኡንቱንቱ ሱ አጩ ኡንቱንቱ ቦላና።✝20:12 ዎጋ 18:15

13 " ‘እት አቱማ አሳይ ማጫ አሳና ግስያዋዳን አቱማ አሳና ግሶፐ፥ ኡንቱንቱ ላኡካ ቱናባ ኦዳ ድራዉ ሀይቂኖ። ኡንቱንቱ ሱ አጩ ኡንቱንቱ ቦላና።✝20:13 ዎጋ 18:22 14 እት አሳይ ናቶነ አቶነ እትፐ አክያዋ ግዶፐ፥ ሄዌ ቱናባ፤ ህንተ ግዶን ቱናተይ ደኤና ማላ፥ እነ ኡንቱንቱነ ታማን ጹገትኖ።✝20:14 ዎጋ 18:17፤ ዛረ. 27:23

15 " ‘እት አሳይ መህያና ግሶፐ፥ እ ሀይቆ፤ ሄ ማጫ መሀቶካ ዎተ።✝20:15-16 ከሳ 22:19፤ ዎጋ 18:23፤ ዛረ. 27:21 16 እት ማጫ አስ መህያና ግሶፐ ሄ ምሽራቶነ ሄ መህያ ላኡዋካ ዎተ፤ ኡንቱንቱ ሀይቂኖ። ኡንቱንቱ ሱ አጩ ኡንቱንቱ ቦላና።

17 " ‘እት አሳይ ባረ ምቻቶ ባረ አዉዋ ናትና ዎይ ባረ ዳይ ናትና ግሶፐ፥ ሄዌ ፖኮባ። ኡንቱንቱ ባረንቱ አሳ ግዶፐ ቦሄትኖ። እ ባረ ምቻቶ ካዉሼዳ ድራዉ፥ እ ባረ ናጋራን ኦሸቴ።✝20:17 ዎጋ 18:9፤ ዛረ. 27:22 18 እት አሳይ ፒላይ ዬዳ ማጫን ካሉዋ ቃሪደ ኢናና ግሶፐ፥ ኡንቱንቱ ላኡካ ባረንቱ አሳ ግዶፐ ቦሄትኖ። አያዉ ጎፐ እ እዝ ሱይ ጎግያ ፑልቱዋ ካሎዬዳ፤ እዛካ ባረ ሱይ ጎግያ ፑልቱዋ ካሎያዱ።✝20:18 ዎጋ 18:19

19 " ‘ነ ዳይ ምቻትና ዎይ ነ አዉዋ ምቻትና ግሶፓ፤ አያዉ ጎፐ፥ ሄዋ ኦያዌ ባረ ማታ ዳቡዋ ካዉሽያዋ። ህንተ ላኡካ ህንተ ናጋራን ኦሸታና።✝20:19-20 ዎጋ 18:12-14 20 እት አሳይ ባረ አዉዋ እሻ ማቻትና ግሶፐ፥ እ ባረ አዉዋ እሻ ካዉሽሴዳ። ኡንቱንቱ ባረንቱ ናጋራን ኦሸታና፤ ኡንቱንቱ ላኡካ ናኣ የለናን ሀይቃና።✝20:20 ዎጋ 18:16 21 እት አሳይ ባረ እሻ ማቻቶ አኮፐ፥ ሄዌ ቱናተ። እ ባረ እሻ ካዉሽሴዳ፤ ኡንቱንቱ ላኡካ ናኣ የልክኖ።

22 " ‘ስም ህንተ ደአናዳን፥ ታን ህንተና ገልስያ ቢታይ ህንተና ጩቼና ማላ፥ ህንተ ታ ህግያነ ታ አዛዙዋ ናግተነ ኦተ። 23 ታን ህንተ ስንፐ ይስያ አሳቱዋ ደኡዋ ዎጋ ካሎፕተ። ኡንቱንቱ ሀዋ ኡባ ኦዳ ድራዉ፥ ታን ኡንቱንታ ሸነታድ። 24 ሽን ታን ህንተና፥ "ኡንቱንቱ ቢታ ህንተ ላታና፤ ህንተ ሄ ቢታ ህንተዋ ኦናዳን፥ ሄ ማይነ ኤሳይ ጎግያ ቢታ ታን ህንተንቶ እማና" ያጋድ። ታን ህንተና ሀራ አሳቱዋፐ ዱማያ ከሴዳ መና ጎዳ ህንተ ጾሳ።

25 " ‘ሄዋ ድራዉ ህንተ ጌሻ ግዴዳ መሄቱዋነ ካፎቱዋ ጌሻ ግደናዋንቱፐ ሻኪደ ኤርተ። ታን ሀዋንቱ ህንተንቶ ቱና ጋ ዎዳ መሄቱዋን፥ ካፎቱዋንነ ሳኣን ቃጸረትያባቱዋን ኡባን ህንተ ሁጲያ ቱንሶፕተ። 26 ታን መና ጎዳይ ጌሻ ግድያ ድራዉነ ህንተ ታዋ ግዳና ማላ ህንተና ሀራ አሳፐ ዱማዬዳ ድራዉ፥ ህንተካ ታዉ ጌሻ ግድተ።

27 " ‘እት አቱማ አሳይ ዎይ ማጫ አሳይ ሞይትልያና ሃሳይያዋ ዎይ ሻሬቾ ግዶፐ፥ ኡንቱንቱ ሀይቃናዉ በሰ። ኡንቱንቱ ሹቻን ጫደትኖ። ኡንቱንቱ ሱ አጩ ኡንቱንቱ ቦላና’ ያጋ" ያጌዳ።