Paulus sien ieeschta Breef aun de Korinta 7

32 Ekj well oba, daut jie onen Sorjen sent. De Onbefrieda sorcht fa de Dinja, waut däm Harn aunjehieren, woo däm Harn to jefaulen. 33 Oba de Befrieda sorcht fa de Dinja von de Welt, woo hee siene Fru jefaulen mucht. 34 Doa es een Unjascheet tweschen eene Ehefru un eene Junkfru. De Onbefriede sorcht fa däm Harn siene Dinja, daut see mucht heilich sennen, beides, em Kjarpa un em Jeist. Oba de Befriede sorcht fa de Dinja von de Welt, woo see äarem Maun jefaulen mucht. 35 Daut saj ekj oba fa junen ieejnen Nutzen; nich, daut ekj eene Schlenj äwa junt schmiet, oba om daut jie aunstendich un onjehindat däm Harn deenen.