14 wooväl mea woat Christus sien Bloot, dee derch dän eewjen Jeist sikj selfst onen Fäla to Gott opfad, ons Jewessen reinjen von de doodje Woakjen, om däm läwendjen Gott to deenen? Heb 1:3; 1Pe 1:18-19; 1Joh 1:7; Opb 1:5

15 Un doawäajen es Hee een Vemedla von daut niee Testament, daut derch dän Doot, waut jeworden es to de Erleesunk von de Äwaträdungen, dee unja daut ieeschte Testament wieren, daut de Beroopne muchten de Vespräakjunk von daut eewje Oafgoot kjrieen. Heb 12:24; 1Tim 2:5