Evangelium Johanes 20

Jesus bejäajent Maria Magdalena

11 Oba Maria stunt buten biem Grauf un hield. Aus see nu hield, bekjt see sikj en daut Grauf nenn 12 un sitt twee Enjel en witte Kjleeda setten, eenen biem Koppenenj un eenen biem Feetenenj, wua Jesus sien Kjarpa jeläajen haud. 13 Un dee sajen to ar: Fru, wuarom hielst du? See sajcht to äant: Wiels see haben mienen Harn wajchjenomen, un ekj weet nich, wua see Am hanjelajcht haben. 14 Aus see dit jesajcht haud, dreit see sikj trigj un sitt Jesus doa stonen un wist nich, daut et Jesus wia. 15 Jesus sajcht to ar: Fru, wuarom hielst du? Wäm sieekjst du? See meend, daut wia de Goadna, un sajcht to Am: Har, hast Du Am wajchjedroacht, dan saj mie, wua Du Am hanjelajcht hast, un ekj woa Am holen. 16 Jesus sajcht to ar: Maria! Dan dreid see sikj om un säd to Am: Rabbuni! Daut meent: Liera. 17 Jesus sajcht to ar: Fot Mie nich aun, wiels Ekj sie noch nich noppjefoaren no mienem Voda. Oba go no miene Breeda un saj to äant: Ekj foa nopp no mienem Voda un junem Voda un no mienem Gott un junem Gott. 18 Maria Magdalena kjeem un säd de Jinja, daut see dän Harn jeseenen, un daut Hee dit to ar jesajcht haud.