1 Yesu dege anya ni e te a kesa ni Yawudiya e nyenteri totolo riki ni Yoda. Ntani nyowa su zo tala anya e yi, Yesu kokoyi su yiri de e saba.

2 Se worosu Parisiyawa zo de su gwada yi su minya yi nkye, <<Eman kyawu na a siki doka Musa de nseminji e shika mata yi?>>

3 Yesu keleba nkye, <<Mina doka Musa pala?>>

4 Su keleba nkye, <<Musa ba mu dama de mu rubuta takada ni kisa amere de mu shika mata mu.>>

5 Yesu keleba, <<Sobon tori kiya ku na Musa rubuta ku doka mu.>> 6 <<Sede a pari takada Mirikisi e yi <su ma nseminji nja mase la.> 7 <Sobon yomu nseminji yaa bila adaa yi nja Amaa yi yaa mala nja mata yi, 8 Yomu la osu bi sua ma kankye nki daa.> Sua ma nki bi gagaba, sede daa. 9 Nkayomu mbo de Mirikisi gama, kede nsebeki e laba.>>

10 De su ma a gizi, yayagizi Yesu minya yi a kiya mbom jaja. 11 Yesu keleba nkye, <<Du nseminji de kula mata yi de amere mase daa e yi lepi ni kwana nja mata nseda nja e sa mata yi de yi lepi. 12 Nde mase kisa amere nja minji e yi de e yi amere nja nseminji daa, e yi lepi kwana nja mata nseda aka.>>

13 Ntani su ma zo yaya dende anya Yesu de sa su anabirika, yayagizi e yi kwabe su. 14 De Yesu geni yomu, e yi anwashi, E gye su nkye, <<Ku bila yaya dende de su zo anya na, kede ku nana su ba, sobon solota Mirikisi e ma ni yiri asu la. 15 Ni ma gye ku gaskye, du nsude yeda ni solota Mirikisi yiride yaya dende sua yi ba yaa yuru a siki gizi Mirikisi ba.>> 16 Se Yesu la yaya dende, e ja su nani yaa sa su anabirika.

17 De Yesu dege bila anya ni, se nseminji daa butu ngudu zo anya e yi zo dure a geba e yi e minya nkye. <<Male kyakyawu,>> <<Mina na yi de na samu leyi ni gbogbo?>>

18 Yesu keleba nkye, <<Mina sa ki sukwa ni male kyakyawu?>> <<Ba nseda de ma male kyakyawu ba sede Mirikisi dandaa e yi. 19 Ki shina doka: Kede ki yi lepi kwana nja mata nseda, kede ki yi bolowa, kede ki beyi sheeda ni yaruwa, kede ki shushe nse da ba, ki ba Adaa ke nja Amaa ke girima.>>>

20 E gye yi nkye, <<Male>> <<Guru mbo mu ni ma yi tunde ni ma yaa dende.>>

21 Yesu kone yi ni so nkye, <<Mbo daa kin na ki lesa.>> <<Te de ki la guru mbode ki ma nshi see de ki ba potoruwa, yomu na ka mani bogolo a bisi. tuku de ki zo de biya ni.>>

22 Anya ni e domuna ndani yi. E dege ta meyi ni beki siki sobon e ma ni mbo nani nyowa.

23 Yesu kone yayagizi yi nkye, <<Yaa man wuya de nsu mbo nani su yuru a solota gizi Mirikisi!>>

24 Yayagizi e yi su yi mamanki a kiya kelima yi. Sede Yesu gye su jaja nkye, <<Yaya na, woni yiri wuya yaa ma de nsebeki yaa yuru a siki solota Mirikisi! 25 Yaa pi soki de nakurimi te biya ndani aromuna nja de nsu mbo a nani yaa yuru a siki solota gizi Mirikisi.>>

26 Yayagizi e yi su yi mamanki soseyi, se su gye nkiya su nkye, <<Waana yaa sila?>>

27 Yesu kone su nkye, <<Anya nsebeki yaa yiwu, sede anya Mirikisi yaa yiwu ba; sobon guru mbo yaa yiwu anya Mirikisi.>>

28 Biturusu gye yi nkye, <<Mu bila guru mbo de mua yi mu biya ke!>>

29 Yesu keleba nkye, <<Ni ma gye ku gaskye,>> <<Ba nsude bila gizi ko yayuwa e yi menza ko yayuwa e yi mata ko Adaa ko Amaa ko yaya ko bikiya sobon ni manki kyakyawu mu. 30 De yaa lesa samu nani wuta e yi sen deri a kwanki mu, ni <gizi, ko yayuwa menza, ko yayuwa mata, ko Amaa, ko yaya nja bikiya, sede nja Genbeki nja sana nsu zo yaa samu leyi ni gbogbo. 31 Sede ntani nyowa de su ma ni pari sua ma ni karishe, ni karishe kuma sua ma ni pari.>>

32 De su ma a turiki su ma te ni Wurishelima, Yesu la geba asu, yayagizi e yi su ma biya e yi su meyi mamanki, worede ma biya su a beyi su ma zi womba. Yesu sakye la yayagizi yi gom sha bi mu a keteri e ma gye su mbode yaa a paru nja nshi nkye. 33 <<Mua te a Wurishelima,>> <<Yaa nsebeki sua butu yi a beyi ba tolense ni pirisi nja male ni doka Musa. Sua yi shiriya ni muntu nja sua leyi beyi a nani worede su ma Yawudawa ba, 34 sua yi dala nene nja sua nya yi anyanya. sua dukwa e yi ari su kisa yi. A beyi kwana wuku yaa dege nleyi.>>

35 Se Yakubu nja Yaaya, yaya ni Zabedi, zo anya Yesu su nkye. <<Male,>> <<Mua bila de mu pata ke mbodaa.>>

36 Yesu nkye, <<Mina kwa bila de ni yi ku nshi?>>

37 Su keleba nkye, <<Bila de daa a siki amu e zunwa a nani dama ake daa kuma a nani guni ake a siki nana solota ni dereja ake.>>

38 Yesu nkye, <<Ku shina mbode kwa minya ba,> Kwa yi yaa sha a koshiya Genbeki de na sha ko kwa yi yaa yi tunkwasa ni yiri tunkwasa de sua yi ni nshi?

39 Su keleba nkye, <<Mua yi yaa,>> Yesu gye su nkye, <<Kwa yi yaa sha a koshiya de na sha nja yiri tunkwasa de Ni yi, 40 sede zunwa a nani dama ko a nani guni e ni na na beyi ba. Anya mu e ma ni worede su rigye shiriya su nshi la.>>

41 De ririgye yayagizi e yi gom zi yomu, su zi anwashi Yakubu nja Yaaya. 42 Yesu sukwa su anya daa e gye su nkye, <<Ku shina nkye a siki worede su ma Yawudawa ba de su shina su ni solota su ma nana ntani yiko, nja toree asu su ma nana yiko a kiya su. 43 Sede yomu na yaa ma nja ku ba. Sobon du nsude yaa bila de e ma totolo dole na e ma bunwa aku, 44 yomuna guru nsude yaa bila de e ma ni pari dole na e ma bunwa ni konwawa. 45 Sobon Yaa nsebeki e zo de su bowuta e yi na ba, sede de e yi ntani bowuta, nja de e beyi leyi e yi de e sila ntani nyowa

46 Se su zo a Yeriko. Yesu nja yayagizi e yi nja ntani nyowa, sua bila de su butu a geri ni, makapi daa de seni yi ma Batimawus yaa ni Timawus, e zunwa a keteri turiki e ma yi pata. 47 De e zi nkye Yesu ni Nazere na e ma bise e dege murinya nsori nkye, <<Yesu Yaa ni Dowuda, ki zi toseyi na!>>

48 Ntani nyowa su kwabe yi nkye yi shuru, sede e dege murinya nsori nkye, <<Yesu Yaa ni Dowuda, ki zi toseyi na!>>

49 Yesu sakisi nkye, <<Sukwa yi de e zo.>> se su sukwa makapi ni su nkye, <<Yi perisiki! Dege a bisi ni seni ake! Yaa sukwa ke.>> 50 Anya ni e la ogbodo yi kutiri, e tirimi ni te anya Yesu.

51 Yesu minya yi nkye, <<Mina ka bila de ni yi ke nshi?>>

Makapi nkye, <<Male, Na bila de ni geni anya.>>

52 Yesu gye yi nkye, <<Ki te,>> <<beigaskye ake worikye ke.>> Dandani e ma geni anya se e biya Yesu te.