1 Se Yesu gye su nkye, <<Na gye ku gaskye, worosu de su sakisi anya mu sua taba muntu ba ari de solota Mirikisi te zo nsori e yi.>>

2 A beyi kwana shida Yesu la Biturusu, nja Yakubu nja Yaaya nja shi e keyi su te a kiya ogbo dunsi, anya ni kame yi shenja a geba asu. 3 Riga de e sa e juyi peri shari, de ba nseda a durinya de yaa yiya wonkye keyi ni yomu ba. 4 Se anebi Iliya nja anebi Musa, su butu sakisi nja su sua yi beta nja Yesu.

5 Biturusu gye Yesu nkye, <<Male, e yi kyawu de mu ma anya mu. Bila de mu yi rugwa wuku daa ma na ke, daa ma ni Musa nja daa ma ni Iliya.>> 6 E lesa mbo de yaa pala, su zi womba soseyi.

7 Se gidagida butu zo ripe su, se su zi murinya a siki gidagida: <<Nsum e ma Yaa na la, de mma so, ku zi yi!>>

8 Dandani, su kone gyewe, su geni nseda anya ni nja su ba sede Yesu.

9 De su ma sonka dege kiya ogbo dunsi, Yesu gila su kede su gye nseda mbo de su geni ba se a kwanki de Yaa nsebeki dege a kumsha. 10 Se su keyi beta ni a siki dishiya asu, sua gye nkiya su nkye <<Mina ma dege ni kumsha.>>

11 Se su minya yi, <<Mina sa male ni doka Musa pala nkye dole na Iliya yaa zo a pari tuku?>>

12 Yesu keleba nkye, <<Gaskye na, Iliya yaa para zo, de e gyala guru mbo. Sede e ma a rubutu a siki beta Mirikisi nkye Yaa nsebeki yaa Genbeki soseyi sua ki yi? 13 Sede ni ma gye ku, Iliya rigye zo, nja su yi mbo de su geni dama, yiri de su rubuta a kiya e yi.>>

14 De su kuma zo anya ririgye yayagizi e yi, se su geni ntani nyowa tala gyewe nja nsu male doka Musa sua yi musu nja su. 15 De guru ntani geni Yesu, su yi mamanki soseyi se su yi gudu te a geba e yi su ma geshe yi.

16 Yesu minya su. <<Mina kwa yi musu a kiya e yi nja su?>>

17 Se nseda a siki worede su tala anya ni pala nkye, <<Male, ni zo yaa na. De e ma nsu arishiya loni anya ke mungu aworo yaa nani yi beta. 18 Du kwanki de e dege yi, yaa leyi kutiri a kisi. yaa butu ni kumpa a baki yi, yaa suku ankuri nja sangala ankuri. Ni gye yayagizi ke de su butu yi su yi yaa ba.>>

19 Yesu gye su nkye, <<Oku ntani sana de ku ki beigaskye,>> <<Ari woshe la Na zunwa a siki ku? Ari woshe la Na yi takuwa nja ku? ku zo yaa ni kayi ni de Ni geni.>>

20 De su keyi yaa ni zo nshi de mungu aworo geni Yesu, dandani e la yaa ni kutiri a kisi nki e yi ma kakada. E puari a kisi yaa butu kumpa a baki e yi.

21 Yesu minya Adaa ni yaa ni nkye, <<Tun woshe la mbo mu saa nshi?>> Adaa e yi keleba nkye,

<<Tun dege kwanki de e ma yaa den.>> 22 <<Yaa leyi kutiri a siki wuta nja riki de e kisa e yi. Sede nde ka yi yaa yi mbodaa, zi toseyi mu de ki sua mu nto.>>

23 Yesu pala nkye, <<<Mina sa de ki minya nkye nde ka yi yaa>>> <<Guru mbo ema nsu yu la anya nsu de beigaskye.>> 24 Dandani Adaa ni yaa mu nkye, <<Ni ki beigaskye, sua ni nto de ni yeda!>>

25 De Yesu geni ntani sua yi gudu zo anya ni, e gye mungu aworo nkye, <<E ke aworo kuruma nja nsu arishiya loni,>> <<Ni ba ke doka, ki butu a siki e yi kede ki sakye yuru a siki e yi gagaba.>>

26 Mungu aworo yi kuruwa, e dukwa e yi se e butu. Sua kone Yaa mu kankye gan ntani nyowa sua nkye, <<E muntu la>> 27 Sede Yesu keyi nani, se e dege sakisi a bisi.

28 A beyi de Yesu bila anya ni, yayagizi e yi minya yi nkye, <<Mina sa de omu mu yi yaa butu arizeni mu ba?>>

29 Yesu keleba nkye, <<Yiri aworo mu yaa butu ba se te anya lepa.>>

30 Se Yesu nja yayagizi e yi su bila anya ni su biya kesa ni Galili. Yesu bila de nse daa e shina anya de su ma ba, 31 sobon Yesu ma kokoyi yayagizi e yi. E gye su nkye, <<Sua la Yaa nsebeki a beyi a nani ntani. De su kisa yi, a beyi kwana wuku yaa dege.>> 32 Sede su gane ni beta de yaa yi nupi ba kuma sua zi womba de su minya yi.

33 De Yesu nja yayagizi su zo a Kapanawu. De su yuru a gizi, e minya su nkye, <<Mina kwa yi musu a kiya e yi a turiki?>> 34 Sede su yi shuru sobon a turiki su ma yi musu a kiya waa ma totolo.

35 Yesu zunwa a kisi, e sukwa gom sha bi e gye su nkye, nsude yaa bila de e ma ni pari, dole na yaa kuma ma ni karishe nja bunwa ni guru>>

36 Yesu la yaa dende e sa yi sakisi a sisika asu. E runguma yaa ni, e gye su nkye, 37 Du nsude keleba yaa dende mu a siki seni na e ni na e keleba; nsude keleba ni ba e ni na e keleba ni ba sede nsude saka ni na e keleba.>>

38 Yaaya gye Yesu nkye, <<Male>> <<Mu geni nseda yaa butu arizeni a siki seni ke mu nani yi, sobon e ma a siki mu na ba.>>

39 Yesu pala nkye, <<Kede ku nani yi,>> <<Ba nsude yaa yi mbo mamanki a siki seni na de yaa pala mbo mumungu a kiya na a beyi ba, 40 Du nsude yaa yi geba ngye mu ba e ma namu la. 41 Ni ma gye ku gaskye, du nsude e ba ku koshiya ni riki a siki seni na sobon ku ma ni Kiristi yaa lesa nani wuta e yi ba.

42 <<Nde nseda yaa sa daa a siki yaya dende de su yeda nja ni su yi lepi, yaa pi yi kyawu de su domuna yi anpirinya a wuya de su leyi kutiri ta siki totolo riki. 43 Nde nani ke yaa sa ke lepi, ki yenkye yi kutiri. Yaa pi ke kyawu de ki yuru anya Mirikisi ni nani daa nja de ki yuru a siki wuta ni nani bi, wuta de yaa muntu ba. 44 Anya ni osunso de sua suku su sua muntu ba, wuta ni kwa sua kisa yi ba. 45 Nde seni ke yaa sa ke yi lepi, ki yenkye yi kutiri. yaa pi ke kyawu de ki yuru anya Mirikisi ni yeyenkye seni daa, nja de ki yuru gizi wuta nja seni bi. 46 Anya ni osunso de sua suku su sua muntu ba, wuta ni kwa sua kisa yi ba. 47 Nde ndani ke yaa sa ke yi lepi, ki butu yi. Yaa pi ke kyawu de ki yuru a siki gizi Mirikisi ni ndani daa nja de ka yuru a gizi wuta ni ndani ke bi, 48 Anya ni

<<<osunso de sua suku su sua muntu ba,

wuta ni kwa sua kisa yi ba.>>> 49 Konse sua serikekye yi ni wuta kankye giri. 50 <<Giri e man kyawu, sede nde zanki e yi yaa, ni mina kwa gyale yi? Se ku mani giri a dishiya aku, ku yi zunwa selema nja guru ntani.>>