1 Yesu bila anya ni e kuma mbayi te a geri e yi, yayagizi e yi su te nja shi. 2 De nana Asibi zo, e para kokoyi a kolonwa, ntani nyowa de su zi yi su yi mamanki.

Su minya nkye, <<Anga na nseminji mu e samu mbo worosu mu?>> <<Woni simi na su beyi, de ari ema yi mbo mamanki yomu! 3 Da mu nama yaa ni kapinta ni bo? Yaa ni Meremu yayiwa ni nsu Yakubu, Yusupu ni Yawuda nja Sima bo? Ba yayuwa yi mata na su ma nja mu mu bo?>> Se su zi anwashi yi.

4 Se Yesu gye su nkye, <<Anebi yaa lesa dereja ba, se a geri yi, a siki yayuwa yi nja siki gizi yi.>> 5 Yesu yi ANKI mamanki daa anya ni ba, sede Yesu worikye worede su man lapiya ba piri la te anya ja su nani a kiya. 6 Yesu yi mamanki sobon ni ki beigaskye asu.

Se Yesu gyewe geri dende e ma kokoyi ntani. 7 Yesu sukwa yayagizi yi gom sha bi, e saka su bi bi e ba su sori a kiya ni mumungu aworo.

8 Da mu nama doka de Yesu ba su: <<Kede ku la mbodaa sobon tepiya aku sede gwala kede, ko mbosi, ko Angala, ko gyolo a siki arijiwu ku ko mbo shompa. 9 Ku sa takalami sede kede ku keyi riga bi ba. 10 Guru gizi de ku yuru, ku zunwa anya ni ari kwanki de kwa bila geri ni. 11 Guru anya de su keleba ku ba ko su ki zi beta aku, ku kekebe kula seni aku kwanki de kwa butu bila geri ni, yaa ma sheeda a kiya asu.>>

12 Yomu na su butu te beyi manki gye ntani nkye su juyi bila mungu mbo asu. 13 Su butu arizeni nyowa su shapa worede man lapiya ba mayi se su worikye.

14 De Seleki Yiridu zi nabari mu, sobon seni Yesu gyewe ko anga. Worosu su ma nkye, <<Yaaya nsu tunkwasa na su dege yi dege kumsha, mbode sa de e ma yi ANKI mamanki naka.>>

15 Worosu su nkye, <<E ma Iliya la.>>

Worosu su kwa ma nkye, <<E ma anebi la, dege siki nsu anebi daa la.>>

16 Sede de Yiridu zi beta mu, e pala nkye, Yaaya, de ni butu yi kiya, na e dege a kumsha!>>

17 Sobon Yiridu beyi doka su ka Yaaya, e sa su domuna yi sa a siki jaru, Yiridu yi yomu na sobon Yirudiya, mata ni yayiwa e yi Pilibu, de Yiridu amere yi. 18 Sobon Yaaya ma te pala gye Yiridu nkye, <<Doka nkye e yi kyawu de ki amere mata yayiwa ake ba.>> 19 Sobon Yirudiya ema zi anwashi Yaaya a dishiya yi e bila turiki de e kisa e yi. Sede e samu turiki de yaa kisa yi ba, 20 sobon Yiridu ema zi womba Yaaya, e shina nkye Yaaya ma nse gangasi la nsuseki. Nde Yaaya ma yi Yiridu beta, ema suwe yi a dishiya soseyi; nzun yomu Yiridu yaa yi peri siki de yaa zi beta Yaaya.

21 A karishe dama zo ba Hirudiya. A nana buki yapu ni Yiridu yi mbosi ba nsu akimi yi, nja toree shoja yi nja toree kesa Galili. 22 De yaa mase ni Yirudiya yi wasa a geba ni Yiridu, Yiridu nja bakwe yi guru su zi dadi.

Anya ni seleki gye yaa mase ni nkye, <<Minya guru mbode ki ma so, na ba ke.>> 23 Seleki yi anikowori ni melese, <<Guru mbode ki minya ni na ba ke, ko rebi ni solota na na la ba ke.>>

24 E butu te a woze anya ni amaa yi e minya nkye, <<Mina na pata yi?>>

Amaa yi keleba nkye, <<Kiya ni Yaaya nsu tunkwasa,>>

25 Dandani yaa mase ni yi seseberi kuma mbayi te anya seleki e gye nkye: <<Kukuzum ni bila de ki ba ni kiya Yaaya nsu tunkwasa a siki tiree.>>

26 De seleki zi yomu e damu soseyi, sede sobon ni melese de e rigye yi nja bakwe de ma anya ni, e so de e nana yi ba. 27 Dandani seleki saka yayagizi yi de su butu kiya Yaaya zo nshi. Nseminji ni te, e butu kiya Yaaya a siki ni jaru, 28 e keyi zo nshi a siki tiree, e ba yaa mase ni, e shi kuma e la ba amaa e yi. 29 De yayagizi Yaaya zi nabari mbode paru, su zo la nki e yi bishina.

30 Yaya manki de Yesu saka su kuma mbayi zo anya Yesu su pala gye yi guru mbode su yi nja mbode su kokoyi. 31 Sobon ntani nyowa de su ma zo sua te su samu dama de su si mbosi ba, e pala gye su nkye, <<Ku zo mu te anya de nseda ma ba de ku pushe.>>

32 Anya ni su yuru a siki kwanto su te anya de nseda ma a siki e yi ba. 33 Sede ntani nyowa de geni su su ma bila anya ni su biya su ngudu a seni dege geri geri nyowa su rigye su te anya ni. 34 De Yesu sonka e geni ntani tala nyowa, Yesu zi toseyi asu soseyi, sobon su ma kankye timshiya de su mani nsu kone su ba. Se e para kokoyi su mbo nyowa.

35 De nyema e yi, yayagizi e yi gye yi nkye, <<Anya mu ntani ma a siki e yi ba,>> <<Nana kusa puari. 36 Seleme ntani de su te a siki geri nja dende geri kusa de su bila mbosi de su si.>>

37 Sede Yesu keleba nkye, <<Oku ku ba su mbodaa de su si.>>

Yayagizi e yi gye yi nkye, <<Da mu yaala nsebeki wonta takusi ni ANKI gyolo de sua biya yi! Mua kisa gyolo nyowa mu a kiya mbosi de mua ba su de su si?>>

38 Yesu minya su nkye, <<Buredi kona ku ma nshi?>> <<Ku te de ku geni.>>

De su te kone, su nkye, <<Buredi biyari nja gunda bi.>>

39 Se Yesu gye Yayagizi e yi de su gye ntani su zuzunwa kunji kunji a kiya sanwa. 40 Su zunwa a kisi kunji kunji worosu su deri deri worosu amsin amsin. 41 De Yesu la buredi guda biyari e kone bisi, e gbede Mirikisi se e sua buredi. Se e ba yayagizi e yi de su ba ntani. E kwa laba gunda bi ni ba su guru. 42 Guru asu su si su koshi, 43 yayagizi e yi su kwa yi obubu gom sha bi de sika ni buredi nja gunda de rigye. 44 Yowa ni ntani de su si mbosi su keyi menza dupu biyari.

45 Dandani Yesu sa yayagizi e yi yuru a siki kwanto de su rigye yi geba te a Beseda, e shi kuma e seleme ntani. 46 A beyi de Yesu seleme ntani, e nunwa kiya ni ogbo de e yi lepa.

47 De nyema yi, kwanto ma sisika totolo miya, Yesu ma meyi eshi ndandaa yi a kesa. 48 De Yesu geni yayagizi yi su ma yi pama ni kwanto, sobon akusuka meyi geba nja su. Kyakya keripi wuru nsape na Yesu butu te anya su, e meyi tepiya a kiya riki. E ma so de e bise su, 49 sede su geni yi meyi tepiya a kiya riki, su ma geni kankye potoruwa la. Su yi kuruwa nsori, 50 sobon guru asu de su geni yi su yi womba.

Dandani Yesu yi beta nja su nkye, <<Ku yi sori dishiya! Eni la. Kede ku yi womba.>> 51 Anya ni Yesu nunwa kwanto nja su, akusuka kuma sakisi sip. Guru asu su yi mamanki, 52 sobon su gane mina ma maana ni ntani dupu biyari de Yesu ba su mbosi si mu ba; sobon su gane a dishiya su ba.

53 De Yesu nja yayagizi yi su nyenteri ndani ruwa, su sonka a kyekeri kesa ni ganesere su domuna kwanto anya ni. 54 De su butu a siki kwanto, ntani su gane Yesu. 55 Su butu a woze ngudu dege siki kesa ni, su kwa yi worede su meyi suwo a kiya kalanga asu te anya de su zi nkye Yesu ma. 56 Guru anya de Yesu te a siki dende geri ko totolo geri ko beyi geri su ma la nsu mere lapiya kwakwana a keteri baki bije. Su ma ologba Yesu de nsu mere lapiya mu su kpa baki riga e yi, guru nsude kpa Yesu e worikye.