1 Da mu nama nabari kyakyawu a kiya Yesu Kiristi, Yaa ni Mirikisi. 2 E ma rubuta a siki takada Anebi Ishaya nkye:

<<Na saka yaa manki na te a geba ke,

nsude yaa gyala ke turiki.>>

3 <<Murinya nsu sukwa a siki denka nkye,

<Ku gyala turiki ba Obagizi,

ku gyala turiki tiriri beyi.>>>

4 Se Yaaya zo, yaa yi ntani tunkwasa a siki denka nja beyi manki tunkwasa ni juyi bila lepi nja yape lepi. 5 Se guru ntani kesa Yawudiya nja guru ntani Wurishelima butu te woze anya yi. Sua pala lepi su, Yaaya yaa yi su tunkwasa a siki totolo minya ni Joda. 6 Yaaya sa keyi ni gesa nakurimi, e yi shompa ni pata a goto yi, ema suku ngirinya nja sha riki zuma. 7 Yaaya ema beyi manki nkye: <<A beyi na nseda de pi ni Yaa zo, de ko angwe takalami e yi ni deta de Na dure kunshe ba. 8 Ni yi ku tunkwasa ni riki, sede eshi yaa yi ku tunkwasa ni Aworo Nsuseki.>>

9 A kwanki ni Yesu zo a Nazere ni kesa Galili se Yaaya yi Yesu tunkwasa a totolo minya ni Joda. 10 De Yesu ma butu dege siki riki, e geni bisi bure se Aworo Mirikisi sonka a kiya yi kankye nkurisha. 11 Se murinya butu a bisi nkye: <<Ki ma Yaa na la, de Na so; Na yi peri siki nja ke soseyi.>> 12 Dandani Aworo Mirikisi te ni Yesu a siki denka, 13 Yesu ma siki denka nana aribeni, Obiri ma gwada yi. Yesu ma nja nama bikiya, sede meleku zo ma kula nshi.

14 A beyi de su sa Yaaya a jaru, Yesu te a Galili, yaa beyi manki kyakyawu ni solota Mirikisi. 15 Nkye, <<Kwanki yi wo,>> Ku juyi de ku yeda ni nabari kyakyawu. Solota gizi Mirikisi e yi kusa!>> 16 De Yesu meyi tepiya a keteri totolo riki ni Galili, e geni Biturusu nja yayiwa e yi Anduru su ma kutiri eya a siki totolo riki, sobon su ma nsu ka gunda la, 17 Yesu gye su nkye, <<Zo, de ku biya ni,>> <<Na sa ku de kuma nsu keyi ntani zo anya na.>> 18 Dandani su bila eya asu su biya Yesu. 19 De e sigeba piri, e geni Yakubu yaa ni Zabedi nja yayiwa e yi Yaaya a siki kwanto, sua gyala eya asu. 20 Dandani Yesu sukwa su, se su bila adaa asu Zabedi a siki kwanto nja nsu ANKI gyolo anya na su biya Yesu.

21 Yesu nja yayagizi yi te Kapanawu, de nana asibi yi, Yesu te a siki kolonwa e para kokoyi. 22 Ntani su yi mamanki ni mbode yaa kokoyi, sobon e kokoyi su kankye nsude mani yiko, ba kankye male ni doka Musa ba. 23 Dandani nseda de mani mumungu aworo a siki kolonwa yi kuruwa nkye, 24 <<Yesu ni Nazere, mina ka bila nja mu? Ki zo de ki kisa mu la? Ni shina waa ma e ke, Nsuseki ni Mirikisi. 25 Se Yesu kwabe mungu aworo nkye. <<Ripe baki ke!>> <<Ku butu bila yi!>> 26 Mumungu aworo kiriba yi a kisi ari nki yi yaa kakada se e butu bila yi ni kuruwa. 27 Ntani su yi mamanki su ma minya nkiya su nkye, <<Kai! mina ma da mu? nsum ma sabuwa kokoyi aba, yaa yi beta ni yiko! Ari yaa ba mungu aworo doka sua biya.>> 28 Dandani nabari Yesu kakada guru gunduma ni Galili.

29 Dandani de Yesu bila siki kolonwa, su te nja Yakubu nja Yaaya a gizi ni Biturusu nja Anduru. 30 Amaa ni mata Sima yaa yi suwo ni mashapo, se su gye Yesu mbode paru nshi. 31 Se Yesu te anya e yi, e keyi nani e dege yi a bisi. se dandani mashapo bila e yi ari e yi su mbosi. 32 De nyema yi, nana puari, ntani keyi Yesu guru nsu worede su man suwo yiri yiri nja nsu arizeni. 33 Se guru ntani geri gomu a baki kopa de Yesu ma shi, 34 se Yesu worikye ntani nyowa worede man suwo yiri yiri. E kwa butu nsu arizeni nyowa, sede e bila arizeni yi beta ba sobon su shina ko waa ma shi.

35 Nsasape, de anya tuku yi dopuwa, Yesu dege a bisi, bila gizi e te anya de ntani ma shi ba, de yi lepa. 36 Biturusu nja nsu oboki e yi su te de su bila e yi, 37 de su geni yi, su nkye: <<Ntani sua bila ke.>> 38 Yesu keleba nkye, <<Bila de mu te anya daa mbom, a dende geri de ma kusa, de Ni beyi manki anya na du. Mbode keyi ni zo naka.>> 39 Yesu gyowe guru kesa Galili, yaa beyi manki a siki kolonwa asu yaa butu ntani arizeni.

40 Nseminji nsu kputuru zo dure anya Yesu yaa ologba yi nkye, nde ki yeda, ki worikye ni.>>

41 Yesu sika ni toseyi, e munka nani kpa nseminji ni. nkye <<E ni yeda,>> <<Ki worikye!>> 42 Dandani kputuru bila e yi se e worikye.

43 Yesu gila yi soseyi, dandani e seleme yi: 44 <<Nkye kone kede ki gye nseda ba. Sede ki te, de ki nana kiya ke ba Pirisi de ki ba su sedeka de Musa beyi doka sobon ni wonka rebi ke, de ema sheeda ba su.>> 45 Sede e sigeba ni pala nabari gye ntani mbode paru, a kiya yomu Yesu yuru a geri a pili gagaba sede e boyi a woze anya de nseda ma ba. Nzun yomu ntani su ma zo anya yi butu a kowoni geri.