1 A beyi kwanki piri, de Yesu sakye yuru a kapanawu, ntani zi nkye e zo a gizi. 2 Ntani Nyowa tala ari anya ma ba, ko a woze ni kopa, se Yesu ba su manki ni Mirikisi. 3 Worosu su ntani wuru, la nsude nki yi sha ruwa zo nshi. 4 Tunde su samu turiki de sua keyi zo anya Yesu ba sobon yowa ntani, su bure lenda a bisi laki de Yesu ma a siki e yi, beyi de su bure lenda su sonka kalanga de nsu nki sha ruwa nja mbode e kwakwana asikye yi. 5 De Yesu geni beigaskye asu, e gye nsu nki sharuwa nkye, <<Yaa na, Ni yape lepi ke. 6 Kuzukam worosu su male ni kokoyi doka Musa zunwa anya ni, su meyi tunani a dishiya su nkye, 7 <<Mina sa de nse mu e meyi beta yomu? Yaa saba Mirikisi! Waa ma sori yape lepi mba Mirikisi e shi dandaa ba?>> 8 Dandani Yesu shina a siki aworo e yi mbode sua yi tunani a siki dishiya asu, se e gye su nkye, <<Mina sa de kwa yi tunani yomu? 9 Wona pi soki: De su gye nsude nki sharuwa nkye, <Su yape lepi ke,> ko su nkye, <Dege a bisi, la kalanga ake de ki yi tepiya>? 10 Sede ku shina nkye Yaa nsebeki mani sori de yaa yape lepi a durinya.>> E gye nsude nki sharuwa nkye, 11 <<Na gye ke, Dege a bisi, la kalanga ke de ki te a gizi.>> 12 Nsude nki sharuwa dege a bisi, la kalanga butu a geba guru ntani. Mbo mu ba konwawa mamanki se su yobo Mirikisi, nkye, <<Mu taba geni mbodaa yomu ba!>>

13 Jaja Yesu kwa sakye ta baki ndani miya ni Galili. Ntani nyowa biya yi se e para kokoyi su. 14 De Yesu ma a siki tepiya, e geni Lawi nsu keleba gendu yaa ni Halipa, zunwa anya keleba gendu. Yesu gye yi nkye, <<Biya ni>> Se Lawi dege biya e yi.

15 De Yesu ma si mbosi nyema a gizi Lawi, nsu keleba gendu nja <<Nsu lepi>> Sua si mbosi nja yayagizi e yi, anya ni ntani nyowa biya e yi. 16 De male doka Musa de su ma Parisiyawa su geni Yesu yaa si mbosi nja <<Nsu lepi>> Nja nsu keleba gendu, su minya yayagizi e yi: nkye <<Mina sa de Yesu yaa si mbosi nja nsu keleba gendu nja <<Nsu lepi>?>>

17 De Yesu zi yomu, e gye su nkye, <<Ba nsu lapiya na sua bila nsu megeni ba, sede nsu suwo. Ba Ni zo de nsukwa ntani gangasi na ba, sede nsu lepi.>>

18 Kuzukam yayagizi Yaaya nja Parisiyawa su ma yi azimi, worosu su ntani zo minya Yesu nkye <<Mina sa de yayagizi Yaaya nja yayagizi Parisiyawa sua yi azimi, sede na ke sua yi ba?>>

19 Yesu keleba su nkye, <<Yaya na oboki ango sua yi azimi a kwanki ni buki amere tunde ango tuku ma nja su? Sua yi ba tunde e tuku ma nja su. 20 Sede kwanki yaa zo de sua la minzi okeshe bila su, a nana ni sua yi azimi.

21 <<Yesu pala nkye ba nsude yaa la kukukyo riga wuri dumki ni sabuwa. Nde e yi yomu, sabuwa keikei yaa saga bila wuri, saga yi yaapi ni da mungu. 22 Ba nsude yaa nya kunu zanki a siki gwala wuri, nde e yi yomu wuri riki yaa wokye gwala riki yaa nya yaa lesa riki nja gwala, sobon sabuwa riki sua nya yi a sabuwa gwala la.

23 Nana asibi daa Yesu meyi tepiya a siki bikiya ni alikama, se yayagizi e yi su para watala kiya ni alikama murishe sua suku. 24 Parisiyawa gye Yesu nkye, <<Kone, mina sa yayagizi ake sua yi mbode doka nana nkye kede su yi a nana asibi?>>

25 Yesu keleba nkye, <<Ku taba karanta de Dowuda nja oboki tepiya e yi su yi kwanki de sua zi nyunwa bo? 26 De e yuru a laki Mirikisi a kwanki ni Abiya tolense ni pirisi, de e suku mbode doka nkye e suku ba. se e kwa ba nsu oboki tepiya yi suku.>>

27 Se Yesu gye su nkye <<Su yi nana asibi ba nsebeki la, ba su yi nsebeki sobon nana asibi ba. 28 Sobon yomu Yaa nsebeki e ma Obagizi ari ni nana asibi.>>