1 Mbaki sasape, toree pirisi nja toree, male ni doka Musa nja guru salaki su yi showura. Se su domuna Yesu, te nshi a geba Bilatu.

2 Bilatu minya nkye. <<Eke na ki ma seleki Yawudawa?>>

Yesu keleba nkye. <<Ee, yomuna yiri de ki pala.

3 Toree Pirisi su yi yaruwa ja Yesu a kiya mbo nyowa. 4 Se Bilatu sakye minya Yesu nkye. <<Eke ka keleba bo? geni yiride su ma sua yaruwa ja ke.>>

5 Sede Yesu keleba ba, se Bilatu zi mamanki.

6 Mbode Bilatu saba yi a kwanki buki nyenteri e ma shika su yaa jaru daa de ntani su pata yi. 7 Se nseminji daa de seni e yi ma Baraba yaa jaru nja worosu su ntani de sua yi geba ni solota Roma su ma nsu kisa ntani a kwanki de su ma yi rikishi. 8 Ntani nyowa zo su ma pata Bilatu de yi su yiri mbode e saba yi su nshi.

9 Bilatu minya nkye, <<Kwa bila de ni shika ku seleki Yawudawa?>> 10 Bilatu shina nkye sobon kishi na toree pirisi su la Yesu beyi a nani e yi. 11 Sede toree pirisi su worosu ntani de Bilatu e shika su Baraba.

12 Bilatu minya su nkye. <<Mina kwa bila de ni yi ni seleki Yawudawa?>>

13 Ntani yi kuruwa nkye, <<Gidiri yi!>>

14 Bilatu minya nkye. <<Mina ma delili? woni Mungu mbo na e yi?>>

Sede su dege Murinya nkye, <<Gidiri yi

15 Bilatu bila de e jima ntani, se Bilatu shika Baraba ba su, se e dukwa Yesu, e la Yesu ba su de su gidiri.

16 Se shoja su la Yesu te a siki kolonwa seleki, su sukwa guru ririgye ni shoja. 17 Se su sa Yesu arikimba nsu ruwa gawura kankye ni seleki, su yi lendee ni ankwanya su sa yi nshi a kiya. 18 Se su geshe Yesu nkye, <<Leyi ke e dede, seleki ni Yawudawa!>> 19 Se su sigeba ni kwala yi gwala a kiya nja su nya yi anyanya. Su dunkye ni guyam asu a kisi, su geshe yi yiride su ma geshe seleki. 20 Se su yi Yesu siya, su butu arikimba nsu ruwa gawura su sa yi riga e yi. Se su te nshi a woze de su gidiri.

21 Se nseminji daa dege Sayiri, nsu seni Sima, adaa ni Alezanda nja Rupus, yaa bise a turiki de butu a kesa daa, shoja su sa Sima dole de e la gidiri ni Yesu. 22 Se su zo Yesu anya de sua sukwa yi goligota de ma anya ni keshi kwankwa kiya. 23 Se su ba Yesu riki ni ntasi inebi yada ni mayi mur, sede e sha ba. 24 Se su gidiri Yesu. su laba keyi yi, su yi kuriya de su geni nsude yaa shi.

25 A dede keripi wuku na su gidiri Yesu. 26 Se su rubuta doka lete a kiya e yi nkye: SELEKI NI YAWUDAWA 27 Su gidiri bolowa bi nja Yesu, daa a nani dama daa a nani guni 28 nsum na shika mbode su rubuta a siki beta Mirikisi nkye, <<Su kiriga yi a siki nsu lepi.>> 29 Guru worede sua bise su ma basi Yesu, su zizika kiya su pala nkye, <<E ke de ki nkye ka juru laki Mirikisi de ki gina yi a kwana wuku, 30 sonka dege gidiri zo a kisi de ki sila nkiya ke!>>

31 Yomuna toree pirisi nja male ni doka Musa su yi Yesu siya nkye. <<E sila ni worosu su,>><<Sede eya sila nkiya yi ba! 32 Bila de Kiristi, seleki ni Izireyila, e sonka a kisi kuzukam dege gidiri, de mu geni tuku na mua beigaskye!>> Worede su gidiri su nja Yesu yere osu ma su gye yi beki beta.

33 A kyakya sisika nana dopuwa ripe kesa kpataka ari keripi wuku ni nyema. 34 De keripi wuku yi se Yesu yi kuka ni totolo murinya nkye, <<Eloi, Eloi, lama sabatana?>> woto, <<Mirikisi na, Mirikisi na, mina sa ki moshi ni yomu?>>

35 Se worede su sakisi anya ni zi yomu, su pala nkye, <<Ku zi, e ma sukwa anebi Iliya.>>

36 Se yaa minzi daa yi gudu te, e sika soso ni riki inebi de musha, e sukwa a gwala, se e ba Yesu de e sha nkye. <<Ku bila de mu geni ko anebi Iliya yaa sonka yi dege gidiri.>>

37 Ni totolo murinya, Yesu shika aminshi ni karishe.

38 Se labile ni Laki lepa Mirikisi laba bi dege bisi zo a kisi. 39 De tolense shoja Roma de sakisi a geba gidiri Yesu, geni yiride yi kuka nja yiride e muntu, e pala nkye, <<Ni yeda gaskye nseminji mu e ma Yaa ni Mirikisi la!>>

40 Worosu mata de su sakisi nyisa sua kone mbode yaa paru. A siki asu Meremu Magadaliya, nja Meremu amaa ni Yakubu dende ni Yusupu, nja Salomi. 41 Mata woromu su biya Yesu tun dege Galili de su ma kula nshi. Worosu mata nyowa de su sa yi te A Wurishelima su ma anya ni du.

42 De nyema yi, sua yi shiri kapi nana asibi, 43 Se Yusupu ni Arimatiya, tolense a siki salaki, de ema pekye zo ni Solota Mirikisi, e te minya Bilatu de beyi ganga nki ni Yesu de bishina ba womba. 44 Bilatu zi mamanki de Yesu rigye muntu, se Bilatu sukwa tolense shoja daa, e minya yi ko Yesu rigye muntu. 45 De e zi dege anya ni tolense shoja Roma nkye yomuna, se Bilatu ba Yusupu nki Yesu. 46 Yusupu see woriki peri, e sonka ni nki Yesu, e lende yi a siki woriki peri e sa yi a siki kumsha de su yanka a siki dunsi, se su kiri dunsi totolo ripe baki kumsha. 47 Meremu Magadaliya nja Meremu amaa ni Yusupu su geni anya de su la nki Yesu sa.