1 A kwanki ni ntani nyowa su kwa tala. Tunde su mani mbosi ba, Yesu sukwa yayagizi e yi nkye, 2 <<Ni ma zi toseyi ni ntani mu; su ma nja ni kwana su wuku naka su si mbosi ba. 3 Nde Ni seleme su te a gizi ni nyunwa, sua lense leyi a turiki, sobon worosu su asu su zo dege anya nsu nyisa.>>

4 Yayagizi e yi keleba, <<Sede angana a siki sanwa mu mua samu mbosi nyowa de yaa deta ntani mu?>>

5 Yesu minya asu, <<Buredi kona ku ma nshi?>> Su nkye,

<<Bokwe.>>

6 Yesu gye ntani su zuzunwa a kisi. De Yesu la buredi gunda bokwe e gbede Mirikisi, se Yesu sua buredi ni se e ba yayagizi e yi de su ba ntani, osu kuma su yi mbode Yesu gye su. 7 Su man worosu su gunda dende du; Yesu gbede Mirikisi sobon nsu e kwa gye yayagizi e yi su laba ba ntani. 8 Ntani su suku ari su koshi. Yayagizi Yesu su kwa yi worede rigye obubu bokwe. 9 Yowa ntani de su ma anya ni su keyi menza dupu wuru se Yesu seleme su, 10 anya ni Yesu nja yayagizi e yi su dege yuru a siki kwanto su te a kesa Dalmanuta.

11 Parisiyawa su zo su ma minya Yesu beta. Sua bila de su gwada Yesu, su minya Yesu alama dege bisi. 12 Se Yesu shika aminshi nsori nkye, <<Mina sa de ntani kwanki mu su ma minya alama ni mbo beyi mamanki? Na gye ku gaskye, ba alama de sua ba su ba.>> 13 Se Yesu dege meyi bila su, e kuma mbayi te yuru a siki kwanto nyenteri te a keteri totolo Minya daa.

14 Yayagizi Yesu su moshi de su keyi buredi, sede buredi ndandaa de ma nja su a siki kwanto. 15 Yesu kobe su nkye. <<Ku yi ankeli,>> <<Ni ali ntani Parisiyawa nja Yiridu.>>

16 Su pala yomu na, <<Sobon su mani buredi ba.>>

17 De Yesu gane beta asu, Yesu minya asu nkye: <<Mina sa de kuma yi beta a kiya de ku mani buredi ba? Ari kuzukam ku tuku geni ko gane wobo? Dishiya aku tuku yi tori la? 18 Ku mani ndani sede kuma geni ba, ku mani kuni sede kuma zi bo? Kua turunwa bo? 19 A kwanki de ni sua buredi biyari ba ntani dupu biyari, obubu kona de sika ni buruburu de ku kwa yi?>>

20 <<De Ni sua buredi bokwe ba ntani dupu wuru, obubu kona de ku kwa yi ni buruburu de rigye?>>

Su keleba nkye, <<Obubu bokwe.>>

21 Yesu gye su nkye, <<Ku tuku gane wobo?>>

22 De Yesu nja yayagizi e yi su zo a kesa Beseda, worosu su ntani keyi nseda makapi zo anya Yesu su yi ologba Yesu de e kpa yi. 23 Yesu ka makapi ni nani e keyi te a beyi dende geri. De Yesu nya nseminji makapi ni anyanya a ndani se e ja e yi nani yi, Yesu minya e yi nkye, <<Ki ma geni mbodaa?>>

24 Makapi ni dege ni ndani kone bisi nkye, <<Ni ma geni ntani; su ma kankye ntasi sua yi tepiya gyewe.>>

25 Yesu sakye kpa nani e yi a ndani makapi ni. Se e bure ndani e yi ndani yi worikye, e ma geni sere. 26 Yesu seleme yi te a gizi, nkye, <<Kede ki te a siki dende geri.>>

27 Yesu nja yayagizi e yi su keyi dende geri de ma a siki kesa Keseriya Pilibi. A kiya turiki Yesu minya su, <<Ntani su ma pala nkye Ni ma waa?>>

28 Su keleba nkye, <<Worosu su su nkye Yaaya nsu Tunkwasa la; worosu su nkye Iliya la; worosu su su ma nkye, daa a siki ririgye anebi la.>>

29 Yesu minya asu nkye, <<Sede oku pa>> <<Ku nkye ni ma waa?>>

Biturusu keleba nkye, <<Ki ma Kiristi la.>>

30 Yesu gila su kede su gye nseda a kiya e yi ba

31 Se Yesu para kokoyi yayagizi e yi nkye e ma dole na de Yaa Nsebeki yaa Genbeki a kiya mbo nyowa, toree nja tolense pirisi nja male doka Musa sua ki yi, ari su kisa yi a beyi kwana wuku yaa dege a kumsha. 32 Yesu yi beta mu a pili, se Biturusu za yi te a keteri e para kwabe yi.

33 Sede Yesu juyi kone yayagizi e yi, e kwabe Biturusu nkye. <<Dege anya na, e ke Obiri!>> <<Ki mani mbodaa ni Mirikisi a siki dishiya ake ba, sede tunani nsebeki la.>>

34 Se Yesu sukwa ntani zo anya e yi nja yayagizi e yi nkye: <<Guru nsude e ma so de e biya ni, e ma dole na e ki kiya e yi de e la gidiri e yi de e biya ni. 35 Guru nsude ma so leyi e yi yaa lesa yi, sede guru nsude lesa leyi yi sobon e ni nja nabari kyakyawu yaa sila ni leyi e yi. 36 Mina yi nsebeki kyawu nde e samu durinya mu guru, se e lesa leyi e yi? 37 Mina nsebeki yaa la beyi a kiya ni leyi e yi? 38 Guru nsude meyi kumnya na nja beta na a siki mungu kwanki ni mere aminshi nja nsu yowa lepi mu, Yaa nsebeki ma yaa zi kumnya e yi a kwanki de yaa zo a siki girima ni Adaa e yi nja ni meleku nsuseki.>>