1 De Yesu butu bila Laki lepa, daa a siki yayagizi yi gye yi nkye, <<Male, kone! yiri totore dunsi nja kyakyawu gini worosu mu!>>

2 Se Yesu keleba nkye. <<Ku kone guru totolo gini woromu?>> <<Ba dunsi daa de yaa kwana a kiya daa ba; sua juru su guru.>>

3 De Yesu zunwa a kiya dunsi zetu de ma kone Laki lepa Mirikisi, anya ni Biturusu, Yakubu, Yaaya, nja Anduru su minya Yesu a boyi, 4 <<Gye mu, woshe na mbo mu yaa paru? nja mina ma alama de yaa nana de mbo worosu mu yaa bila paru?>> 5 Se Yesu gye su nkye: ku kone de kede nseda e shishirigye ku. 6 Ntani nyowa sua zo a siki seni na, sua nkye, <Eni na ni ma Yesu sua shishirigye ntani nyowa. 7 Nde ku zi sua yi yanki nja nabari yanki, kede dishiya ku e dege, dole na mbo mu sua paru, sede karishe tuku zowo ba. 8 Kesa daa yaa yi geba ni kesa daa, solota daa yaa yi geba ni solota daa. Sua yi totolo zizika kesa anya nyowa, sua yi totolo nunwa. Nsu mu ma kankye pari ni Genbeki yapu yaa la.

9 <<Sede ku kpanku nkiya ku. Sobon sua la ku beyi ba salaki de su dukwa ku a kolonwa. sobon e ni sua te nku a geba ni nsu gomuna nja nsu seleki de ku sakisi beyi sheeda ni nabari kyakyawu mu a geba su. 10 Sede dole nabari kyakyawu ni solota gizi bisi sua pala nabari yi a konaga a guru durinya. 11 Nde su te zo nku a geba shiriya, kede e dama ku a kiya mbode kwa pala. ku pala mbode su ba ku a kwanki ni, sobon oku na kwa yi beta ba, sede Aworo Nsuseki.

12 <<Yayiwa yaa butu yayiwa e yi a beyi de su kisa yi, adaa yaa butu yaa e yi a beyi, yaya sua yi geba ni nsu adaa su ari sua sa de su kisa su. 13 Guru ntani sua ki zini ku sobon eni, sede nsude sakisi ni sori ari karishe yaa samu sila.

14 <<Nde ku geni mbo rebi de yaa zo ni bebeta mbo kyakyawu de sakisi anya de kamata ba, bila de nsu karanta e gane, worede su ma a Yawudiya su yi gudu te a kiya totolo dunsi. 15 Kede nsude ma a kiya lenda e sonka kisi ko e yuru a gizi de e la mbodaa a siki yi ba. 16 Kede nsude ma a bikiya e kuma de e la ogbodo yi ba. 17 Gbotuma mata nsu siki nja worede sua ba yaya su nono a kwanki de mbo mu yaa paru! 18 Ku yi lepa de kede mbo woromu su paru kwanki ni yari, 19 Sobon yaa ma kwanki ni Genbeki la soseyi de su taba geni yiri yi ba tun de Mirikisi yi durinya ari zo a kuzukam nja sua kara yi yiri gagaba. 20 Nde ba Obagizi na rigye kwanki ba, ba nsude yaa taba sila ba. Sede sobon yaya e yi, worede e zabi su, na rigye kwanki ni. 21 A kwanki ni nde nseda gye ku nkye, <Kone, anya mu na Kiristi ma> ko <kone, anya ni e shiya ka!> kede ku yeda. 22 Sobon Kiristi ni yaruwa nja anebi ni yaruwa sua butu, sua nana alama nja yi anki mamanki de su shishirigye worede su zabi su nde yaa yi yaa ma yomu. 23 Sobon yomu ku kone nkiya ku, Eni rigye gye ku guru mbode yaa paru a geba.

24 <<Sede a nana ni, a beyi Genbeki mu. <<<Nana yaa yi dopuwa, wonta yaa beyi asikye yi ba; 25 kemu yaa puari dege bisi, sua kuma zizika yiko ni bisi. 26 <<A kwanki ni ntani sua geni Yaa nsebeki de yaa zo a siki a gidagida nja totolo sori nja girima. 27 Yaa saka meleku yi de su tala guru worede su zabi su dege keteri ni durinya guru, dege karishe ni durinya zo te a karishe ni bisi.

28 Kuzukam ku kokoyi abenshi anya ni yaya ntasi bori: Nde ku geni genya e yi para nya, ku shina nkye damina kusa. 29 Yomuna, nde ku geni mbo worosu mu yaa paru, ku shina nkye ema baki kopa. 30 Mma gye ku gaskye, ntani sana mu sua taba bise ba se guru mbo worosu mu paru. 31 Bisi nja kisi yaa bise, sede kelima na yaa taba bise ba.

32 Sede nseda shina nana ko woni kwanki na yaa zo ba, ko meleku ni bisi, ko Yaa, sede adaa ndandaa yi kin. 33 ku kone kiya ku, ku zunwa ni shiri! sobon ku shina nana ko kwanki de yaa zo ba. 34 Ema kankye nseminji de yaa yi tepiya, e bila gizi yi a nani nsu bunwa e yi, e ba konwawa ANKI de yaa yi, na gye nsu kpanku kopa de e sigeba ni kpanku. 35 Nkayomu ku sigeba ni kone sobon ku shina nana de nsugizi aku yaa kuma mbayi ko nyema, ko nsisika ndederi, ko de zakala yaa yi kala, ko mbaki sasape. 36 Nde e te zo dandani, kede e san ku ma yi kwana. 37 Mbode Ni ma pala gye ku, Ni pala gye konwawa la: <Ku zunwa ni kpanku>>>