1 Kwanki daa Yesu yuru a kolonwa, nseminji de nani yi sharuwa ma anya ni. 2 Worosu su ntani sua bila turiki de sua basi Yesu, sua kone ko yaa worikye ntani a nana asibi. 3 Yesu gye nseminji de nani yi sharuwa, <<Dege a bisi a geba ni konwawa.>>

4 Se Yesu minya su nkye, <<Mina ma doka nana asibi: mu yi kyakyawu ko mumungu, mu sila nleyi ntani na ko mu kisa ntani na?>> sede su zunwa shuru.

5 Yesu kone su ni anwashi, e kwa yi beki siki ni loni dishiya, e gye nseminji ni nkye, <<Munka nani ke.>> Nseminji ni munka nani yi dandani e samu worikye. 6 Se Parisiyawa bila kolonwa butu a woze de su te gama baki su nja worosu ntani Yirudiya yiride sua kisa Yesu.

7 Yesu nja yayagizi e yi te a kesa ni Galili, se ntani nyowa su kwa biya e yi dege Yawudiya. 8 Wurishelima, nja Edom, nja gunduma de nyenteri Joda nja gyewe ni Taya nja Sidon, de su zi guru mbode Yesu yaa yi. 9 Sobon yowa ntani Yesu gye yayagizi e yi su keyi kwanto dende, de kede ntani su yi yowa ba. 10 Yesu worikye ntani nyowa, sobon yomu na nsu suwo sua bila de su kpa yi. 11 Guru kwanki de mungu aworo geni yi, sua puari a geba e yi ni kuruwa nkye, <<E ke ki ma Yaa Mirikisi la.>> 12 Sede Yesu ba su gila nsori nkye kede su pala ko waa ma e shi ba.

13 Yesu te nyunwa kiya ogbo dunsi e sukwa worede yaa so, se su zo anya e yi. 14 E zabi gom sha bi, e sa de su ma yaya manki, de su ma nja shi de e saka su te ni manki 15 de su mani sori ni kula arizeni. 16 Gom sha bi de Yesu zabi su osu nama: Sima de Yesu sa yi seni Biturusu; 17 Yakubu yaa ni Zabedi nja yayiwa e yi Yaaya, e ba su seni Buwanaji, de mane yi ma yaya ni akpala; 18 Anduru, Pilibu, Batalomi, Matiyu, Tomasi, Yakubu yaa ni Alipasu, Tadiyu, Sima nsude meyi topula sobon ntani yi, 19 nja Yawuda Isikariyoti nsu de butu Yesu a beyi.

20 Se Yesu yuru a gizi daa, jaja ntani tala nyowa, de Yesu nja yayagizi e yi su iya si mbosi ba. 21 De ntani gizi e yi zi mbom, su te de su keyi te nshi a gizi, su nkye, <<E meyi somiya.>> 22 Se male ni doka Musa de su zo dege Wurishelima nkye, <<E mani arizeni! butu anya seleki arizeni mbode sa de yaa yiya kula arizeni naka.>>

23 Sobon yomu na Yesu sukwa su e yi su abenshi nkye, <<Yaya na obiri yaa butu obiri? 24 Nde solota sua yi geba ni nkiya su solota ni yaa sakisi ba. 25 Nde gizi te laba bi, gizi ni yaa sakisi ba. 26 Nde obiri yaa yi geba nja nki yi ari e la nki yi yaa sakisi ba; karishe yi zo naka. 27 Nseda yaa yi yaa yuru a gizi ni nsude mani sori de kwa yi keyi ba sede e domuna yi. tuku yaa yi yaa kwa yi keikei a gizi e yi. 28 Yesu nkye Mma gye ku gaskye, guru lepi nja saba de ntani su mayi Mirikisi sua yape su nshi. 29 Sede nsude saba Aworo Nsuseki sua taba yape yi ba; E yi lepi ni gbogbo.>>

30 Yesu pala yomu sobon su nkye, <<E mani mumungu aworo.>>

31 Se amaa ni Yesu nja yayuwa e yi su zo. Sakisi a woze, su saka nseda de e sukwa yi. 32 Ntani nyowa su zunwa gyewe Yesu, se su gye yi nkye, <<Amaa ke nja yayuwa ke sua bila ake a woze.>>

33 Yesu minya su nkye, <<Waa ma amaa na nja yayuwa na?>>

34 Se Yesu kone worede zunwa gyewe yi nkye, <<Amaa na nja yayuwa na osu na ka anya mu! 35 Guru nsude yi mbode Mirikisi yaa so e shiya ma yayuwa naa menza nja mata nja amaa naa nja adaa naa.