1 Kuzukam e rigye nana bi de sua yi buki ni nyenteri nja buki ni buredi nsu darigaza ba, toree pirisi nja male ni doka Musa sua bila turiki de su ka Yesu de su kisa yi. 2 Su pala nkye, <<Sede a kwanki buki ni naba,>> <<Dun kede ntani su yi rikishi.>>

3 De Yesu ma a betani e zunwa ma si mbosi a gizi sima de ma kputuru, mase daa zo ni tuni meyi kemeshi ni nardi sere nsu gyolo nyowa, de su yi ni nardi zala, e wokye tuni mayi kemeshi se e nya Yesu nshi a kiya. 4 Worede su ma anya ni yi anwashi su gye nkiya su nkye, <<Mina sa ka yi banza ni tularee mu yomu? 5 E yi kyawu de su la tularee mu see ni gyolo nyowa de su ba potoruwa.>> Se su kobe mase ni anwashi. 6 Yesu gye su nkye, <<Mina sa kwa dama mase mu? Mase mu e yi Ni mbo kyakyawu de e yi. 7 Potoruwa ma nja ku a kowon nana, kwa yi yaa sua su nto kwanki de kwa so, Sede e ni ba kowon kwanki na ni ma nja ku ba. 8 Mase mu yi mbode e yi yaa yi. E shapa Ni mayi a nki de e gyala ni kapi nana bishina na. 9 Mma gye ku gaskye, Guru anya de sua beyi manki ni nabari kyakyawu mu a durinya, mbode mase mu yi sua pala yi, de su turunwa nshi.>>

10 Anya ni Yawuda Isikariyoti, daa a siki ni sha bi, te anya ni toree pirisi de butu Yesu a beyi ba su. 11 De su zi yomu su yi peri siki ari su yi anikowori de su beyi gyolo. Yawuda bila turiki de yaa butu Yesu a beyi ba su.

12 A nana ni pari ni buki buredi de mani darigaza ba, de e ma alada de sua beyi sedeka ni timshiya ni yenteri. Yayagizi Yesu minya nkye, <<Angana ka bila de mu te shiriya ke mbosi ni buki Nyenteri?>>

13 Se Yesu saka yayagizi e yi bi, e gye su nkye, <<Ku te a siki totolo geri, kwa gomu ni nseminji daa keyi tuni ni riki. Ku biya yi. 14 Se ku gye nsu gizi de e yuru nkye, <male nkye mu minya ke: Angana yaa si mbosi ni nyenteri nja yayagizi yi?> 15 Yaa nana ku totolo laki bisi de su gyale yi sobon buki. Ku shiriya mbosi ni buki nyenteri anya ni.>>

16 Se yayagizi Yesu bila anya ni, te a siki totolo geri su sani mbo yiride Yesu gye su, se su shiriya buki ni nyenteri.

17 De nyema yi, Yesu zo nja yayagizi e yi gom sha bi anya ni. 18 De su zunwa su ma si mbosi, Yesu gye su nkye, <<Ni ma gye ku gaskye, daa a siki ku yaa butu ni a beyi nsude yaa si mbosi nja Ni.>>

19 Se yayagizi Yesu para yi beki siki, su ma minya nkiya su dandaa nkye, <<E ni na ba ko?>>

20 Yesu keleba nkye, <<Nseda a siki aku gom sha bi,>> <<Daa de e ma si mbosi nja gongo ni. 21 Yaa Nsebeki yaa te yiride su rubuta a kiya e yi. Sede gbotu ni nseminji de yaa butu yaa Nsebeki a beyi! Yaa pi kyawu de su yapu yi ba,>>

22 De su ma a siki si mbosi, Yesu la buredi, E gbede Mirikisi e lalaba, ba yayagizi e yi nkye, <<Ku keleba; nsu mu na ma kankye nki na.>>

23 Se Yesu la koshiya riki inebi, a beyi de E gbede Mirikisi e ba yayagizi yi, se guru asu su sha a siki yi.

24 Yesu gye su nkye, <<Da mu na ma kankye zini na ni sabuwa anikowori, de nya sobon ntani nyowa,>> 25 <<Mma gye ku gaskye, Na saki sha riki zanki ni yaya ntasi mu kuma gagaba se nana de Na sha sabuwa a siki solota Mirikisi.>>

26 De su yi wonka yobo Mirikisi, su butu te a ogbo ni Zetu.

27 Yesu gye su nkye, <<Guru aku kwa yi gudu bila ni, <<Sobon e ma rubuta a takada Mirikisi nkye,

<<<Na dukwa nsu kiwo,

guru timshiya sua yaapi a woze.

28 Sede a beyi de Ni dege, Na rigye ku te a geba a siki geri Galili.>>

29 Biturusu pala nkye, <<Ko nde guru asu su yi gudu bila ke, Eni na yi gudu ba.>>

30 Yesu keleba nkye, <<Mma gye ku gaskye>> <<A siki ndederi ni yawu mu kapi de zakala yi kala son bi ka yi musu shina Na son wuku.>>

31 Sede Biturusu pala nkye, <<Ko sua kisa ni nja ke, na taba bila ke ba.>> Guru asu su pala yomu.

32 Se Yesu nja yayagizi e yi su te anya de sua sukwa seni yi Gesemani, se Yesu gye yayagizi e yi nkye, <<Ku zunwa anya mu de Ni te yi lepa.>> 33 Yesu la Biturusu, Yakubu, Yaaya nja shi, se E para yi beki siki soseyi nja geni beki. 34 Yesu gye su nkye <<Dishiya na e sika ni beki siki ari kankye na muntu,>> <<Ku zunwa anya mu ku sigeba ni kpanku.>>

35 De Yesu te a geba piri, E bwala kiya e yi a kisi e yi lepa nkye nde e ma dole na de kwanki Genbeki mu e bise Ni. 36 Yesu nkye, <<Aba, Adaa>> <<Kowoni mbo ma nsu yu la anya ke. De ki la koshiya Genbeki mu bila ni. Ba mbode e ni na so ba, sede mbode E ke ka so.>>

37 Se Yesu kuma mbayi te anya yayagizi e yi e san su su mayi kwana e gye Biturusu nkye. <<Sima,>> <<Ku ma yi kwana la? kwa yi yaa kpanku ko ni keripi daa bo? 38 Ku kpanku ku yi lepa de kede ku puari a siki gwada. Aworo mayi memeri, sede nki e man sori ba.>>

39 Se Yesu kuma mbayi, te yi lepa jaja a kiya mbode e yi lepa daa. 40 Se Yesu kuma zo e san su su ma yi kwana jaja, sobon de ndani su sika ni kwana. se su lesa mbode sua pala gye yi.

41 De Yesu kuma ni wuku e gye su nkye, <<Ku tuku yi kwana nja pushe? E deta! kwanki zowo. kone Yaa Nsebeki su leyi beyi a nani nsu lepi. 42 Ku dege! De mu te! Nsu butu Ni a beyi yaa zo ka!>>

43 De Yesu ma a siki beta, Yawuda, daa a siki gom sha bi, e zo. E shi nja ntani nyowa su keikei ni yanki nja gwala, butu dege anya toree pirisi, nja male doka Musa, nja toree geri.

44 Kuzukam Yawuda nsude butu Yesu a beyi rigye shiriya alama nja su nkye: <<Nsude Ni runguma yi nseminji naka; ku keyi te, ku keyi kyakyawu.>> 45 Su te dandani anya Yesu, Yawuda pala nkye, <<Male!>> Se e runguma Yesu. 46 Se woroni ka Yesu nsori. 47 Se daa a siki worede sakisi anya ni butu obalaba e butu kuni bunwa ni tolense pirisi.

48 Se Yesu gye su nkye, <<Ni ma bolowa naba>> <<De ku butu ni obalaba nja gwala de ku ka ni? 49 Ni ma nja ku kowon nana, ku yi yaa ka ni ba, sede e paru yomu na de mbode su rubuta a siki takada Mirikisi e sika. 50 Se guru yayagizi Yesu su yi gudu bila e yi.

51 Se yaa sambari daa biya Yesu, e sa riga nki ba, se domuna ogbodo kede, de sua bila de su keyi, 52 e yi gudu totombolo, bila ogbodo yi,

53 Se su keyi Yesu te a geba tolense pirisi, se guru toree pirisi, nja worosu toree geri nja male ni doka Musa zo gom yere. 54 Biturusu biya Yesu nnyisa, ari a siki papada gizi ni tolense ni pirisi. Anya ni e zunwa nja nsu kpanku, de e zi dimi wuta.

55 Tolense pirisi nja salaki sua bila yiri sheeda de su ka Yesu nlepi de su kisa yi, sede su samu lepi daa a kiya yi ba. 56 Ntani nyowa su pala yaruwa a kiya Yesu, sede baki su zo daa ba.

57 Anya ni worosu su dege a bisi pala sheeda ni yaruwa a kiya Yesu nkye: 58 <<Mu zi nseminji mu yaa pala nkye, <Yaa juru gizi Mirikisi de nani nsebeki gina a beyi nana wuku yaa gina da de su gina ni nani nsebeki ba.>>> 59 Nzun yomu baki su zo daa ba.

60 Se tolense pirisi dege a bisi a geba e minya Yesu nkye, <<Ki ma ni mbode ka pala a kiya sheeda mu bo? Mina ma sheeda mu de ntani sua pala a kiya ke?>> 61 Sede Yesu ma meyi shuru e keleba su ba.

Se tolense ni pirisi minya Yesu jaja nkye, E ke na ki ma Kiristi, Yaa ni Mirikisi nsu anabirika

62 Se Yesu nkye. <<E ni na,>> <<Kwa geni Yaa Nsebeki zunwa a nani dama ni Nsude Pi girima de yaa zo a gidagida ni bisi.>>

63 Se tolense ni pirisi saga riga e yi. E minya. <<Woni sheeda na kwa bila jaja?>> 64 <<Ku zi saba de nseminji mu yi Mirikisi. Mina ma tunani ku?>>

Se guru asu su yanka Shiriya nkye e deta muntu. 65 Se worosu su nya Yesu anyanya, se su domuna e yi ndani, su mamari yi, su nkye, <<Gye mu waa dukwa ke! se dogori leyi te su dukwa yi.

66 Biturusu ma a papada gizi, se daa a siki bunwa mase ni tolense zo anya ni. 67 De e geni Biturusu yaa zi wuta e te kusa nshi e kapa yi ndani.

Yaa mase ni pala nkye. <<E ke ma du ki ma nja Yesu ni Nazere la.>>

68 Sede Biturusu yi musu Nkye, <<Ni shina mbode ki ma yi beta a kiya yi ba,>> Se Biturusu butu gyowe te a baki kolonwa. Se anya ni zakala yi kala

69 De bunwa mase geni Biturusu anya ni, se e gye worede su sakisi anya ni nkye, <<Nse mu ma daa a sika su.>> 70 Biturusu yi musu jaja.

A beyi kwanki piri, worede sakisi anya ni kusa ni Biturusu, su nkye gaskye nseminji mu ma a sika su du, e ke ma ki ma nsu Galiliya la.>>

71 Se Biturusu para melese nja basi kiya yi nkye, <<Ni shina nseminji de kwa yi beta a kiya yi mu ba.>>

72 Dandani zakala yi kala ni bi. Se Biturusu yi tunani kelima de Yesu pala gye yi nkye: kapi de zakala yi kala ni bi ka yi musu shina ni sen wuku.>> Nki yi seni se Biturusu wokye nkuka.