1 Yesu kwa para kokoyi a baki totolo riki. Ntani de su gomu gyowe yi su ma nyowa, de sa ari Yesu yuru a siki kwanto te zunwa, sede guru ntani su zunwa a karishe a keteri riki. 2 E kokoyi su mbo nyowa ni abenshi, a siki kokoyi e yi e gye su nkye: 3 <<Ku zi! Nsu bikiya te de nyunkwa yiri a bikiya e yi. 4 De e ma kiya yaapi yiri, worosu su puari a kiya turiki, se nsusuwa zo kwa yi suku. 5 Worosu su puari anya dunsi, de mani kesa nyowa ba. Dandani su butu sobon kesa yi nyowa anya ni ba. 6 Sede nana zo a bisi, zapi nana yi yowa se nyokoshi, su kyekeri sobon ririnya su ta kisi ba. 7 Worosu su yiri puari a siki ankwanya, ankwanya dege yi girima e kapa su, ari su yi yaya ba. 8 Worosu su puari a siki kesa kyakyawu. E butu, e dege a bisi ari e yi yaya, talatin, sitin, ari sen deri.>>

9 Se Yesu pala nkye, <<Nsude mani kuni zi, se e zi.>>

10 De Yesu ma e shi dandaa e yi, yayagizi e yi gom sha bi nja worosu nsu biya yi su minya Yesu maana abenshi mu. 11 Se Yesu gye su nkye, <<Mbode ma boyi a siki solota bisi Mirikisi ba ku de ku shina. Sede worosu su ntani sua gye su ni abenshi, 12 Sobon de,

<Sua kone nja kone

sede sua geni; ba,

sua zi nja zi.

sede sua gane ba.

sobon kede su juyi de Mirikisi e yape su ba!>>>

13 Se Yesu gye su nkye, <<Oku ku gane abenshi mu bo? Yaya na kwa gane ni abenshi worosu su? 14 Kelima Mirikisi la e ma kankye yiri de nsu bikiya nunkwa. 15 Worosu su ntani su ma kankye yiri de puari a kiya turiki, nde su zi kelima Mirikisi. Dandani de su zi, obiri zo la kelima de su nunkwa a siki asu. 16 Worosu su, ma kankye yiri de puari a kiya dunsi, de su zi kelima dandani su yeda ni nshi ni perisiki. 17 Sede tunde su man ririnya ba, su dede ni kwanki piri. De genbeki ko gwada zo sobon kelima ni dandani sua puari. 18 Worosu su, su ma kankye yiri de su nunkwa a siki ankwanya, su zi kelima; 19 sede ngala durinya mu, nja so keikei durinya, nja kode yi worosu su mbo zo la kelima mu, e sa yi yapu yaya ba, 20 Worosu su, su ma kankye yiri de su nunkwa a siki kesa kyakyawu, su zi kelima, su yeda nshi, su yapu yaya, talatin, sitin ari sen deri pi mbode su nunkwa.>>

21 Yesu gye su nkye, <<Kwa la pitila ripe ni gongo ko boyi a kisi gbodo? ba kwa lete yi a kiya gwala de su ma lete pitila na bo? 22 Sobon kowon mbo de ma a boyi sua pelesa yi, nja kuma ba mbode e ma ni asiri de sua bure yi a pili ba. 23 Nsude mani kuni zi se e zi.>> 24 <<Se Yesu sigeba gye su nkye. Ku zi kyakyawu,>> <<Gongo de ku yi gonta nshi, e shina sua gonta ku nshi, ari sua ja ku nshi. 25 Nsude manshi sua ja yi nshi; nsude manshi ba, ko mbode e manshi sua keleba bila e yi.>>

26 Yesu kwa pala nkye, <<Solota gizi Mirikisi ma kankye. Nseminji de yaapi yiri a bikiya e yi. 27 Ndederi nja nnana, ko e yi kwana ko e pelenka, yiri tompa yi girima, kode nkye e shina ko yaya na e tompa ba. 28 Kesa nkiya yi yaa beyi girima nja yaa yi yaya; tompa e shiya mani pari, se e butu nkiya, se a karishe yaa ma saba. 29 Sede ampani nunu, yaa sa rije a siki e yi, sobon kwanki ni kwa yi keikei bikiya zo.>>

30 Yesu kwa sakye pala nkye, <<Minana mua gwada solota gizi Mirikisi nshi? ko woni misali la mua yi abenshi nja shi? 31 E ma kankye saba mosta, de e ma dende yiri de muma nunkwa a kesa. 32 Nzun yomu nde su nunkwa yi, yaa yi girima yaa pi guru ntasi bikiya, yaya nani yi yaa yi girima de nsusuwa sua yi gizi asu a wurinya e yi.>>

33 Yesu gye su beta nyowa ni abenshi, yiride sua gane. 34 Yesu taba gye su mbodaa ba se ni abenshi. Sede nde e ma nja yayagizi e yi, yaa gye su mbo guru.

35 Nana ni de nyema yi, Yesu gye yayagizi yi nkye, <<Mu nyenteri ta keteri ni.>> 36 De su bila ntani a beyi, su te yere nja Yesu a siki kwanto, worosu su kwanto su ma anya ni nja shi. 37 Se bisi yi beki kili nja totolo akusuka, ari e ma dege riki totolo riki ma dukwa kwanto, ari yaa bila de e wokye. 38 Yesu ma a beyi ni kwanto la kiya jaa mbo kwana yaa yi kwana. Yayagizi e yi dege yi su nkye, <<Male, mua muntu ko e suwo ke?>>

39 Se Yesu pelenka, E kwabe akusuka se e gye riki nkye, <<Yi shuru! de ki sakisi!>> Se akusuka sakisi sip.

40 Yesu gye yayagizi yi nkye, <<Mina sa de kwa yi womba? Ari kuzukam ku mani beigaskye bo?>>

41 Su zi womba soseyi su minya nkiya su nkye, <<Waa ma nseminji mu? De ari akusuka nja agaguwa sua beyi girima!>>