1 De nana asibi bise, Meremu Magadaliya, nja Meremu amaa ni Yakubu, nja Salomi su see keikei kemeshi de su shapa nki Yesu. 2 Mbaki sasape ni nana pari ni ladi, kapi de nana e butu, su ma a turiki su ma te ni kumsha 3 se su minya nkiya su, <<Waa kiri dunsi totolo mu bila baki kumsha?>>

4 Sede su keyi anya ni, su dege ndani a bisi, su geni, su rigye kiri dunsi te a keteri. 5 De su yuru a kisi kumsha, su geni yaa sambari domuna angwe peri zuzunwa a nani dama, se su yanzi.

6 E pala nkye. <<Kede ku yi womba,>> <<Kwa bila Yesu ni Nazere la, nsude su gidiri. E dege wo! E ma anya mu kuma ba. ku kone anya de su leyi sa a siki e yi. 7 Sede ku te, gye yayagizi e yi nja Biturusu, <E rigye ku te a geba a Galili, te anya ni kwa geni yi, yiride e gye ku.>>>

8 Se mata woroni butu a kumsha ngudu, sua kakada nja womba. Su gye nseda beta ba, sobon sua zi womba.

9 De Yesu rigye dege nsasape ni nana pari ni asibi, Yesu pelesa kiya yi ba Meremu Magadaliya, nsude Yesu butu arizeni bokwe a nki yi 10 Se e te gye worede su ma yere nja shi sua yi sasa nja kuka. 11 De su zi nkye Yesu man leyi ari meremu Magadaliya geni yi, su ki beigaskye ba.

12 A beyi yomu Yesu nana nki e yi a kamani daa mbom ba ntani bi de sua yi tepiya te a dende geri daa. 13 Su kuma te beyi manki ba yayagizi e yi bi; sede osu ma du su yeda ni beta su ba,

14 Dege beyi Yesu nana kiya yi te nja gom sha daa a kwanki de sua si mbosi; se Yesu kobe su de su ki beigaskye nja lesa zi de su ki yeda ni worede gye su nkye su geni yi, a beyi de e dege.

15 Yesu gye su nkye, <<Ku te a siki durinya guru de ku beyi nabari kyakyawu ba guru ntani. 16 Du nsude beigaskye, su yi tunkwasa yaa sila, sede nsude ki beigaskye yaa bebeta. 17 Da mu nama alama de yaa biya worede su beigaskye nja ni: A seni na sua kula arizeni; sua yi beta ni arishiya mbombom; 18 sua la mesi a nani su; nde su sha guba, yaa dama su ba; sua ja nani su a kiya nsu suwo sua worikye.>>

19 A beyi de Yesu yi beta nja su, Mirikisi leyi te a bisi te zunwa a nani dama e yi. 20 Se yayagizi e yi te beyi manki a kowon anga, Obagizi yi ANKI nja su te kelima beta su nja te turiki yi mbo mamanki.