1 Ntani nyowa su yi kokori de su rubuta manki a kiya mbode paru a sisika amu. 2 Su rubuta mbo mu yiride mu zi anya worede su ma dege pari su geni a ndani asu su yi doka manki Mirikisi. 3 Nkayomu, tolense Tiyopolu, eni nkiya na ni bishinkye guru mbode e paru npari, Ni geni e man kyawu de ni rubuta manki mu keyi ke, 4 de ki ma tebeshi a kiya ni mbode su kokoyi ke.

5 Kwanki de Yiridu e ma seleki ni Yawudiya, muman Pirisi de seni yi e ma Zakariya, e ma ntani gizi Abija. Seni mata e yi e ma Elisabatu; e shi ma e butu a gizi Aruna. 6 Guru asu su yi zunwa mere lepi a geba Mirikisi, sua biya doka nja kayida mbode Obagizi pala guru. 7 Sede Su man yaya ba sobon de Elisabatu e taba yapu ba, guru asu su sopa.

8 Nana da Zakariya yaa yi ANKI yi ni pirisi, de ANKI juyi zo a tala su, Zakariya yaa yi ANKI e yi a geba Mirikisi, 9 Su zabi yi sobon alada de su juriya nsu pirisi su biya, de yuru a siki laki lepa ni Obagizi de e yi ayaki nsu kemeshi. 10 Kwanki de Zakariya yaa yi ayaki zo, guru ntani nyowa tala sua yi lepa a woze.

11 Se Meleku Mirikisi butu ta anya yi, sakisi a keteri nani dama ni anya beyi sedeka anya de sua yi ayaki. 12 De Zakariya geni Meleku Mirikisi, e nyanji se womba keyi. 13 Sede meleku Obagizi gye yi nkye: <<Kede ki zi womba, Zakariya; su zi lepa ake. Mata ake Elisabatu yaa man siki yaa yapu ke yaa minzi, ka beyi seni Yaaya. 14 Yaama ke mbo muruna nja perisiki, ntani nyowa sua yi peri siki sobon de su yapu yi, 15 yaa ma totolo anya ni Obagizi. Yaa sha giya ko mbode yaa sa bugu ba, sede yaa sika nja Aworo Nsuseki tunde e ma a siki ni Ama yi. 16 Ntani nyowa ni Izireyila yaa kuman nsu mbayi zo anya Obagizi Mirikisi asu. 17 Yaa rigye Obagizi geba, a siki ni Aworo nja sori ni Iliya, yaa juyi dishiya ni nsu Adaa te anya yaya asu nja juyi worede sua yi lesa zi ta shina zunwa gangasi, de sa ntani sua zunwa nshiri pekye Obagizi.>>

18 Zakariya e minya Meleku ni Obagizi nkye, <<Yaya na Na shina nkye ema yomu? Kuzukam ni ma susupe nseminji. Mata na kwa sopa du.>> 19 Meleku Obagizi keleba, <<Eni ni ma Gebire. Ni ma sakisi a geba Mirikisi, su saka ni de gye ke beta ni nabari kyakyawu mu. 20 Se kuzukam ka man shuru ka yi yaa beta gagaba se nana de anikowori mu sika, sobon de ki ki yeda beta na, de yaama gaskye a dede kwanki.>>

21 Nkaa yomu, ntani su zunwa pekye Zakariya de e butu a siki laki Mirikisi su ma siki mamanki mina sa de e dede a siki laki Mirikisi. 22 De Zakariya butu a woze, e yi su beta ba. Se su shina nkye e geni wahayi a siki laki Mirikisi, e ma nana su nani sede e yi beta ba.

23 De kwanki ni yi bowuta e yi yaa, e kuma te a gizi. 24 A beyi su samu mata e yi Elisabatu e man siki e boyi kiya yi wonta biyari. 25 <<Alisabatu nkye,>> Obagizi e yi ni mbo mu. <<A nana mu e nana ni aniyeri e la ni kumnya butu anya ni ntani.>>

26 A siki wonta shida, Mirikisi saka meleku seni ma Gebire ta Nazare, a totolo geri ni Galili, 27 ta anya yaa mase de puari nse minji ba de su yi anikowori de sua yi amere seni yi ma Yusupu, ni gizi Dowuda. Seni ni yaa mase ni ma Meremu. 28 Meleku Mirikisi ta anya yi e gye yi nkye, <<Gesuwa, e ke de su nana ke aniyeri! Mirikisi e man nja ke.>>

29 Selema de Meremu e zi e suwo yi a dishiya e pala nkye woni yiri gesuwa ma nsu mu. 30 Sede Meleku Mirikisi gye yi nkye, <<Kede ki zi womba, Meremu, ki samu aniyeri anya Mirikisi. 31 Ka yi siki de ka yapu yaa minzi, ka sa yi seni Yesu. 32 Yaama tolense sua sukwa yi Yaa nsu de man girima. Obagizi Mirikisi yaa beyi kingbolo ni Adaa e yi Dowuda, 33 yaa yi solota gizi ni Yakubu ni gbogbo; solota yi mma ya gagaba.>>

34 Meremu minya Meleku Mirikisi nkye, <<Yaya na mbo mu yaama yomu,>> <<Tunde ni puari nseminji ba?>>

35 Meleku Mirikisi keleba yi nkye, <<Aworo Nsuseki yaa sonka a kiya ake, sori ni nsu de pi girima yaa ripe ke. Sobon yomu Yaa nsuseki de sua yapu yi mu sua sukwa yi nkye Yaa Mirikisi. 36 Ko Elisabatu yayiwa ake a siki sopa yi yaa mani yaa, e shi de su nkye e ma awari mase de taba yapu ba e man siki wonta shida. 37 Mbodaa ma de yaa gagara Mirikisi ba.>>

38 <<Eni ni ma bunwa Mirikisi la,>> Meremu keleba nkye. <Emayomu yiride ki pala.>> Se meleku Mirikisi bila yi.

39 A kwanki ni Meremu yi shiri; seseberi te a geri de ma ogbo ni Yawudiya, 40 Anya ni de e yuru a gizi ni Zakariya e geshe Elisabatu. 41 De Elisabatu zi gesuwa ni Meremu se yaa yi moshi asikye yi, se Alisabatu sika ni Aworo nsuseki. 42 Elisabatu yi kuruwa ni totolo murinya nkye: <<Ki ma nsu anabirika la a siki mata, yaa de ka yapu ema nsu anabirika na! 43 Sede mina sa de ni ma nsu aniyeri, de amaa ni Obagizi na e zo anyana? 44 De ni zi murinya gesuwa ake a kuni na, yaa de ma siki na e yi moshi ni peri siki. 45 Anabirika ema nsu de yeda ni mbode Obagizi pala gye yi yaa shika!>>

46 Se Meremu nkye:

<<Dishiya na yaa yobo Obagizi

47 Bila de aworo na yi perisiki nja Mirikisi nsu sila ni,

48 sobon e turunwa nni

kode nkye ni ma bunwa yi de ma mbodaa ba.

Dege kuzukam te a geba guru ntani sua sukwa ni nkye nsu anabirika,

49 sobon Mirikisi nsu girima yi ni mbo totolo.

seni yi ema nsuseki.

50 Toseyi yi ema nja worede sua zi womba yi,

butu a sana ta sana.

51 E yi mbo nsu girima ni nani yi;

e kula nsu dege dolo a siki dishiya asu.

52 E sonka seleki a kingbolo solota asu

sede e dege worede la kiya asu ma mbodaa ba.

53 E sika nsu zi nyunwa ni mbo kyakyawu

nsu nani e seleme su ni nnani kwakwani.

54 E sua bunwa yi Izireyila nto,

e turunwa ni ntani yi de yi su aniyeri

55 te anya ni Abireyi nja ntani yi ni gbogbo,

ko yiride e gye nsu Adaatolo amu>>.

56 Meremu ma nja Alisabatu ni wonta wuku tuku e kuma ta gizi.

57 De kwanki ni Elisabatu yi de yaa yapu yaa e yi, e yapu yaa minzi. 58 Dengeri yi nja dengi su zi nkye Obagizi nana yi aniyeri totolo, su yi peri siki beyi.

59 Nana ni takusi su zo de su yi yaa yanka, su bila de su sa yi seni ni adaa yi Zakariya, 60 sede amaa yi gye su nkye, <<Ayi! Sua sukwa yi nkye Yaaya na.>>

61 Su gye yi nkye, <<Nseda a siki dengi ake e man seni mu ba.>>

62 Se su yi adaa ni yaa ni beta nnani, de e gye su seni de sua saa yaa ni. 63 E minya asu nkye su ba yi teburu dende de e rubutu, se e rubuta seni yi nkye Yaaya, <<Guru ntani de su ma anya ni su yi mamanki.>> 64 Dandani baki Zakariya bure yi beta, e yi wonka yobo Mirikisi. 65 Dengeri de su ma anya ni guru su yi Womba, ntani su ma pala nabari ni mbode paru guru a kesa ni Yawudiya. 66 Guru nsu de zi mbo su yi tunani a dishiya asu kiya yi, e minya nkye, <<Mina na yaa mu yaa ma?>> De nani Obagizi ma kiya yi.

67 Adaa yi Zakariya sika ni Aworo nsuseki yaa yi aneshi:

68 <<Yobo te nja Obagizi, Mirikisi ni Izireyila,

sobon e zo de sila ntani yi.

69 E dege nsu sori de sila mu

A gizi ni bunwa yi Dowuda

70 Ari e pala a baki ni anebi yi nsuseki a kwanki de bise,

71 De sila mu anya obokigeba mu

nja anya guru worede sua ki mu

72 sua ta nana aniyeri ba nsu adaatolo amu

de turunwa ni anikowori yi nsuseki de yi su, 73 melese de yi adaa mu Abireyi:

74 de butu mu a nani ni obokigeba amu,

de mu biya yi ba womba

75 De muma nsuseki nja zunwa gangasi anya Mirikisi guru kwanki de muman shi.

76 <<Eke, yaa na, sua sukwa ke anebi ni Mirikisi nsu girima;

eke ka te a geba ni Obagizi de ki gyala turiki yi,

77 de ki ba ntani yi shina ni sila

te anya ni yape lepi su,

78 sobon yowa ni toseyi Mirikisi mu,

nana de yaa zo mu dege bisi

79 sobon de yaa beyi asikye ba worede su ma a siki dopuwa

nja worede ma lelenga ni muntu,

de biya mu a turiki ni selema.>>

80 Se Yaaya yi girima a siki sori ni aworo; e zunwa a siki denka ari nana de e butu a pili te a Izireyila.