1 Nana da Yesu yaa yi lepa anya da. De e gama, da a siki yayagizi e yi gye yi nkye, <<Obagizi, kokoyi mu yiri de mwa yi lepa, yiri de Yaaya kokoyi yayagizi e yi. >>

2 Yesu gye su nkye, <<Nde kwa yi lepa, ku nkye:

<<<Adaa,

seni ake e ma seki,

solota ake e zo.

3 Ki ba mu mbo si ni yawu nja ni kowoni nana.

4 Yape mu lepi amu,

yomu na omu ma muma yape worede de yi mu lepi.

Kede ki ka yi mu te a siki ni gwada ba.> >>

5 Se Yesu gye yayagizi e yi nkye, <<Nde nse a siki aku mani oboki, e te ayayi sisika ndederi e gye yi nkye, <Oboki, lemese ni buredi wuku, 6 sobon oboki na daa butu atepiya e zo anyana kuzukam, ni ma ni mbode na beyi ba.>

7 <<Se oboki de su te anya yi te bila lemese ni buredi mu e keleba yiri a siki laki nkye, kede ki dama ni, ni rigye kule kopa laki na wo, e ni nja yaya na guru mu rigye kwakwana. na yi yaa dege de ni ba ke mbodaa ba.> 8 Mua gye ku, ko nkye yaa dege de beyi mbo daa ba sobon e ma oboki e yi na, nzun yomu sobon dama de oboki yaa dama e yi yaa dege de e beyi ko buredi kwana e ologba e yi.

9 <<Mua pala gye ku: Ku minya sua ba ku; ku bila kwa samu; ku te kwala kopa, kopa yaa bure ba ku. 10 Guru nsude minya yaa keleba; nsude bila yaa samu; nja nsude kwala kopa, kopa yaa bure ba e yi.

11 <<Waa a siki aku, nde yaa e yi minya e yi gunda, yaa beyi mesi? 12 Ko e minya yi kwoyi, yaa ba yi kunama? 13 Nsu oku, de ku ma mungu ntani, ku shina yiri de kwa ba yaya aku mbo kyakyawu, birishi Adaa ku ni bisi e man shiri de yaba worede su ologba e yi Aworo Nsuseki!>>

14 Yesu yaa kula arizeni daa de mayi beta ba butu. De arizeni butu, nseminji de yaa yi shuru yi beta, ntani su yi mamanki. 15 Sede worosu su ntani su nkye, <<Baazabu, seleki arizeni, na ba Yesu sori de yaa butu arizeni.>> 16 Worosu so de su gwada e yi su gye yi nkye e yi su alama daa a bisi de yaa nana sori e yi.

17 Yesu shina tunani asu de su mayi e gye su nkye: <<Guru solota de laba bii su mayi geba nja nkiya su yaa taba sakisi ba, yomu na gizi de laba bi yaa puari. 18 Nde Obiri laba kiya yi bi e mayi geba nja nki e yi, solota e yi yaa sakisi? Na pala yomu na sobon ku nkye ni ma butu arizeni ni sori ni Baazabu na. 19 Nde ni sori Baazabu na ni ma butu arizeni, ni sori waa yayagizi aku sua butu arizeni? Sobon yomu, osu na sua yi ku shiriya a kiya daa mu. 20 Sede nde ni ma butu arizeni ni sori ni Mirikisi na, solota ni Mirikisi zo anya aku aka. 21 Nsu nsu sori, sika ni ka yi yanki soseyi ma kone gizi e yi, ka yi gizi e yi yaa ma a siki selema. 22 Sede nde nsu de ma sori pi yi shakiya yi ni dukwa, yaa keleba guru keyi yanki de nsu shi sadishiya yi shi yaa lalaba guru keyi kwa yi nbolowa.

23 <<Nsude ma nja ni ba yaa yi geba nja ni naka, nsude tala nja ni ba, yaa zizila la.

24 <<Nde mumungu aworo butu nki nsebeki, yaa te anya de man denka ba eya bila anya de yaa pushe nde e samu ba. Se yaa nkye, <Na kuma te a gizi na de ni bila.> 25 Nde e kuma te a gizi de e butu, na e san gizi ni su shire yi kyakyawu su gyala e yi. 26 Yaa kuma beyi te kwa yi worosu su mumungu aworo gunda bokwe de su pi yi mungu, sua te zuzunwa anya ni. Bebeta ni nseminji ni yaa pi ni pari e yi mungu.>>

27 De Yesu ma gye su yomu, manshi daa a siki ntani ni dege ni murinya nkye, <<Mirikisi e sa manshi de yapu ke anabirika nja de goyi ke.>>

28 Yesu keleba nkye, <<Anabirika pi ma a kiya worede su zi beta Mirikisi su kwa biya betayi.>>

29 De ntani ma ja yowa, Yesu nkye, <<Daa mu ma mumungu zamani na. Su ma bila de su nana su alama, ba nseda de yaa nana su nshi sede alama ni Yunusa. 30 Yiride de Yunusa ma alama anya ntani Neneba, yomu na yaa nsebeki yaa ma alama ni ntani sana mu. 31 A nana Shiriya mata seleki kudu yaa dege nja ntani sana mu e gye su nkye su yi kyakya ba; sobon e zo dege kesa nsu nyisa e zo de zi kokoyi simi ni seleki Sulemanu, nsude pi Sulemanu ma anya mu. 32 A nana shiriya, ntani Neneba sua dege nja ntani zamani mu su gye su nkye su yi dede ba; sobon su bila lepi asu a manki Yunusa, kuzukam nsude pi Yunusa aka anya mu.

33 <<Ba nsu de yaa sa wuta a pitila de yaa la yi boyi ko e ripe yi ni terebi, sede e la yi lete a kiya ni ntasi de sua lete pitila, sobon worede su ma yuru a gizi sua geni asikye. 34 Ndani ake ma pitila ni nki ake la. Nsu ndani ake ma kyakyawu, nki ake guru yaa sika ni asikye. Sede nde ndani ake su yi mungu, yomu na nki ake ma yaa ma beki na kiri. 35 Ki kone yi, ko asikye de ki man shi e ma dopuwa na ba. 36 Nkayomu, nde nki ake guru sika ni asikye, ba anya daa de ma dopuwa, guru nki ake yaa ma asikye, yiride de asikye pitila ma yi asikye ANKI ake.>>

37 De Yesu gama beta, nseminji Parisiyawa sukwa Yesu te a gizi e yi de su si mbosi; Yesu te zuzunwa a kingbolo de si mbosi. 38 De nseminji ni Parisiyawa mu, geni Yesu wonkye nani kapi de e si mbosi ba, e zi mamanki.

39 Se Obagizi gye yi nkye, <<Kuzukam, oku Parisiyawa kwa wonkye sere beyi ni koshiya nja koriya, sede siki aku sika ni opu nja mungu. 40 Oku Odundu ni ntani! Mirikisi de yi woze ni e shiya yi siki ni ma du bo? 41 Sede ku beyi mbode ma a siki koshiya nja pereti ba potoruwa, se guru mbo yaa ma sere ba ku. 42 <<Gbotuma aku Parisiyawa, sobon kuma beyi daa a siki gom aku ni akpoko nja genya ni miya ni ririgye keyi bikiya aku guru, sede ku ki yi mbo gangasi nja so ni Mirikisi. E kamata de ku yi woromu na ba de ku bila ririgye ba. 43 Gbotuma aku Parisiyawa, sobon kuma so kyakyawu kingbolo a siki kolonwa aku nja gesuwa abije. 44 <<Gbotuma aku, sobon kuma kankye kumsha de ntani shina yi ba, de ntani mayi tepiya a kiya yi sobon su shina ba.>> 45 Daa a siki ni male kokoyi doka Musa keleba Yesu, <<Male, de ki pala mbo worosu mu, ki bashi mu aka.>>

46 Yesu keleba nkye, <<Gbotuma aku, male ni kokoyi doka Musa, sobon ku domuna ntani ka yi wato doka nsu loni la, oku nkiaku ku taba kpa ka yi ni nja yaa nani aku ba de ku sua su nto.

47 <<Gbotuma aku, sobon ku gina kumsha nsu kyawu nyowa ni anebi Mirikisi, de nsu adaatolo aku kisa su. 48 Oku nkiyaku ku sheeda nja mbode nsu adaatolo aku su yi; su kisa anebi nyowa, oku kwa ku gina kumsha su. 49 Sobon yomu na, Mirikisi a siki simi yi nkye, <Na saka su anebi nja yaya manki, worosu su sua kisa su worosu su asu sua Genbeki.> 50 Sobon yomu sua ba ntani kuzukam Genbeki sobon kisa ni anebi nyowa de su yi tun yiri pari durinya, 51 yiri zini ni Abila ta ni Zakariya, de su kisa sisika bagadi nja anya de man dola ba ni siki laki Mirikisi. Ee, Na gye ku, sua poro ntani kuzukam sobon loni mbom guru.

52 <<Gbotuma aku male kokoyi doka Musa, sobon ku keyi mukuli ni ilimi. Oku nkiya ku, ku yuru ba, ku bila worosu de su yuru ba.>>

53 De Yesu bila anya ni, se Parisiyawa nja male kokoyi doka Musa su para sayi a geba su ma bila turiki de sua keyi ni lepi su ma minya beta a kiya mbo nyowa de su dege yi dishiya, 54 sua pekye de su ka yi ni mbo daa de yaa pala.