1 Naa daa de Yesu ma kokoyi ntani a siki Laki Mirikisi nja beyi manki nabari kyakyawu, se nsu kamkiya pirisi nja male kokoyi doka Musa, gabada nja toree, su zo anya e yi. 2 Su nkye.<<Gye mu woni sori na ka yi mbo worosu mu,>> <<Waa ba ke sori mu?>>

3 Yesu keleba, <<E ni ma naa minya ku. Ku gyeni, 4 Tunkwasa ni Yaaya e ma dege bisi, ko dege anya ntani?>

5 Su yi shewura nja nki asu nkye, <<Nde mu nkye, <Dege bisi yaa minya mu, < mina sa de ku yeda nshi ba?> 6 Sede nde mu nkye, <Dege ntani,> guru ntani sua kutiri mu dunsi, sobon su yeda nkye Yaaya ma anebi la.>>

7 Se su keleba, <<Mu shina angana e butu ba.>>

8 Yesu nkye, Eni ma Na taba gye ku ko woni sori na mma yi mbo woromu ba.

9 Yesu sigeba gye ntani abenshi mu: << Yaa minzi daa mani bikiya, e la beyi aya nja worede su ma yi bikiya se e te a tepiya e la kwanki Nyowa. 10 De kwanki tala keyi bikiya se e saka bunwa e yi de e te anya worede keleba bikiya aya de su beyi lobo keyi bikiya yi. Sede nsu keleba aya bikiya dukwa e yi se su kule yi te su beyi nnani kwakwani. 11 E kwa saka bunwa e yi daa, sede nsu keleba aya sukwa dukwa e yi su beyi kumnya se su kule yi te su ba yi ba mbodaa. 12 E sakye saka nse daa ni wuku se su zi yi suwo su leyi kutiri a woze.

13 <<Se nsu bikiya ni nkye, <Mina Naa yi? Na saka yaa na, de ni ma so; ni shina sua beyi girima.>

14 <<Sede de nsude keleba aya geni yaa ni ma zo, su gye nki asu nkye. <Da mu e shina ma nsu si gado,> <Mu kisa e yi, de gado e ma namu.> 15 Se su la yi kutiri te a bayi woze ni bikiya ni se su kisa e yi.

<<Mina nsu bikiya mu yaa yi worede keleba bikiya aya ni? 16 Yaa zo kisa worede keleba bikiya yi aya ni e la bikiya yi ba worosu mu.>>

De ntani zi mbo mu, su nkye, <<Kede yiri mbo mu e taba paru mu kankye ntani mumungu!>>

17 Yesu kone su tiriri e minya, <<Mina ma maana mbode su rubuta?

<<<Dunsi de nsu gini ki

e shina yaa zo ma dunsi de sua la yi sa a keteri ni gini kyakyawu.>

18 Guru nsude puari a kiya dunsi ni yaa watala piripiri, sede nsude dunsi mu puari a kiya e yi yaa leda yi kankye busi.>>

19 Se male ni doka Musa nja nsu kamkiya ni pirisi bila turiki de su keyi dandani, sobon su shina Yesu yi abenshi mu a kiya asu la. sede sua zi womba ntani.

20 Se su sa Yesu ndani, su saka ntani worosu a boyi de su kone Yesu kankye ntani kyakyawu, su sa dishiya de su kaa yi ni mbodaa de yaa pala de su samu sori nja dama de su la yi ba toree. 21 Nsu kone a boyi minya e yi: <<Male, mu shina nkye ka pala nja kokoyi mbode ma kyakya, ka nana sokiya ba sede ka kokoyi turiki ni Mirikisi a siki gaskye 22 E ma dede na de mu biya gendu ba keisa ko yi?>>

23 Yesu shina wayo asu e gye su nkye, 24 <<Nana ni gyolo. Seni waa nja woto ni waa ma a gyolo mu?>>

25 Su keleba nkye, <<Keisa,>>

Yesu gye su, <<Ku ba keisa mbode ma ni keisa, ku ba Mirikisi mbode ma ni Mirikisi.>>

26 Su yi yaa de su ka Yesu a kiya beta de e pala a geba ni ntani ba. Su zi mamanki ni mbode e ma keleba su, su kuma yi shuru.

27 Worosu su Sadokiyawa, de su nkye dege a kumsha ma ba, su te anya Yesu su minya yi. 28 Su nkye, <<Male,>> Musa rubuta mu nshi nkye nde yayiwa ake ni minzi muntu se e bila mata e yi sede e man yaya nja shi ba, nseminji dole yaala mase de minji yi muntu de e yapu yaya ba yayiwa e yi. 29 Kuzukam su yi woron su yayuwa bokwe, ni pari yi amere e muntu ba yaa. 30 Ni bi e shi ma e yi amere e muntu ba yaa 31 nja ni wuku amere e yi, yomu na guru asu ntani bokwe mu muntu, ba yaya ba. 32 A karishe e yi, mase ni muntu du. 33 Kuzukam, e dege ni kumsha waa mase mu yaama mata e yi, tun de guru asu bokwe ni su amere yi?

34 Yesu keleba, <<Ntani durinya mu su ma yi amere nja beyi yaya asu mata amere. 35 Sede worede su deta de sua zunwa nleyi siki sana nsu zo ni nja dege a kumsha osu sua yi amere ba sua la su beyi amere ba, 36 sobon sua sakye muntu gagaba, sua ma kankye meleku Mirikisi. Sua ma yaya ni Mirikisi, tun de su ma yaya ni dege a kumsha la 37 Sede Musa ma nana a pili a kwanki sanwa suwuta a denka nkye, worede su muntu sua dege a kumsha, e shi e sukwa Obagizi <Mirikisi ni Abireyi, nja Mirikisi ni Ishaku, nja Mirikisi ni Yakubu,> 38 E ma Mirikisi muntu na ba, sede e ma ni leyi la, sobon nshi guru ma ni leyi.>>

39 Worosu su male ni doka Musa su keleba nkye <<Male ki pala kyakya!>> 40 Nse daa sakye yi dishiya minya yi beta daa gagaba.

41 Se Yesu gye su nkye, yaya sua nkye Kiristi ma Yaa ni dowuda? 42 Dowuda nkiya e yi pala a siki takada ni Zabura:

<<<Obagizi gye Obagizi na:

<<Zunwa a nani dama na

43 ari na saa obokigeba ake

a kisi tapi seni ake.>>>

44 Dowuda sukwa yi <Obagizi.> Yaya na yaama yaa ni Dowuda?>>

45 De guru ntani su zi, Yesu gye yayagizi e yi, 46 <<Ku yi ankeli ni male ni kokoyi doka Musa, sua zaga ni angwe dololo nja sua so de ntani su geshe su abije nja de su samu kingbolo zunwa ni girima a kolonwa nja anya zunwa kyakyawu anya buki. 47 Osu na su ma nsu geni dama mata makeyi de su kwa yi keyi a gizi su nja sua yi yaruwa ni yi lepa nyisa. Yiri ntani ni sua yi su poro soseyi.>>