1 A bayi da mu Obagizi zabi worosu su ntani Sebeyii ni bi e saka su bi bi su la geba te a geri geri nja anya de yaa yi shiri de yaa te. 2 Yesu gye su nkye, <<Anki ma nyowa, sede nsu ANKI ma Nyowa ba. sobon yomu, ku yi lepa de Obagizi nsu bikiya, de e saka nsu ANKI de su yi ANKI. 3 Ku te! Na saka ku kankye timshiya a sisika kere bikiya. 4 Kede ku keyi gyolo ko Angala ko takalami; kede ku geshe nse daa a turiki.

5 <<Guru gizi de ku yuru, ku para nkye, <Selema gizi mu.> 6 Nde nsu selema ma gizi ni, selema aku e ma nja shi; nde nsu selema ma ba, selema aku yaa kuma biya aku. 7 Ku zuzunwa a gizi ni, ku si ku sha guru mbode su ba ku, sobon e yi kyawu de su ba nsude yi ANKI lobo ANKI e yi de e yi. Kede ku biya gizi gizi.

8 <<Guru geri de ku yuru nsu keleba ku, ku si guru mbode su keikei zo ba ku. 9 Ku worikye worede sua yi suwo a geri ni nja ku gye su nkye, <Solota ni Mirikisi e ma kusa nku.> 10 Sede ku te yuru a geri de su keleba ku ba, ku biya turiki turiki de ku pala nkye, 11 Ko kula geri a ku de mala mu a seni mu, zizika yi ba ku. Sede ku shina nta solota ni Mirikisi e ma kusa nku.> 12 Mma gye ku, a nana karishe sua pi zi toseyi Sodoma pi ntani geri ni.

13 <<Gbotuma aku, Korasin! Gbotuma ake, Betseda! nde mbo mamanki de su yi a siki aku nda su yi a Taya nja Sidon de sua bila mungu mbo asu, sua sa keyi sasa de su zuzunwa a siki busi. 14 Sua pi zi toseyi ni Taya nja Sidon a nana shiriya pi ku. 15 E ke, Kapanawu, ki ma geni nta sua ba ke girima ari ki te a bisi na? Yi, sua keyi ke ta kisi na ari siki kumsha anya de nsu muntu sua ma.

16 <<Nsu de zi ku e zi ni; nsu de ki ku e ki ni aka; nsude ki ni kwa e ki nsude saka ni.>>

17 Ntani Sebeyii ni bi ni su kuma ni perisiki su nkye, <<Obagizi, nzun arizeni e ma zi mu nde mu sukwa seni ake.>>

18 Yesu keleba nkye, <<Ni geni obiri puari dege bisi kankye asikye wuta butu dege bisi. 19 Ku geni! Ni ba ku yiko de ku taka mesi nja kunama nja kwa si nasara a kiya guru sori ni obokigeba ku; mbodaa mumungu kpa ku ba. 20 Nzun yomu kede ku yi perisiki sobon mumungu aworo ma zi ku, sede ku yi perisiki de su rubuta seni aku a bisi.>>

21 A kwanki ni Yesu, sika ni peri siki dege ayan Aworo Mirikisi, nkye, <<Ni gbede Nke, Adaa, Obagizi ni bisi nja kisi, sobon ki boyi mbo worosu mu anya nsu wayo nja nsu shina, ki pelesa su ba worede su ma mbodaa ba. Ee, Adaa, da mu ma mbo de jima ke aka.

22 <<Mbo guru Adaa na la ba ni. Nse daa shina waa ma Yaa ni ba se Adaa e yi e shi dandaa, nse daa shina Adaa ba se Yaa ni nja worede Yaa so de e pelesa ba su.>>

23 Se Yesu juyi kone yayagizi e yi e pala gye su a boyi nkye, <<Ku ma nsu anabirika na de ku geni mbode ndani aku yaa geni mu. 24 Mma pala gye ku anebi nja seleki Nyowa su so de su geni mbo de kwa geni mu su geni ba, nja su zi mbode kwa zi mu su zi ba.>>

25 Male daa nsu kokoyi doka Musa dege a bisi de e gwada Yesu. E minya yi nkye, <<Male,>> <<Mina na yi de na man leyi ni dindindin?>>

26 Yesu keleba e yi nkye.<<Mina doka Musa pala gye ku?>> <<Ku ma karanta yi nkye kona?>>

27 Nseminji ni keleba: <<<Ki so Obagizi Mirikisi ake nja guru la yi ake nja guru dishiya ake nja guru sori ake guru ankeli ake>; nja, <Ki so dengeri ake yiri de ka so kiya ake.>>>

28 Yesu keleba nkye. <<Ki keleba kyakya,>>Yi yomu ka man leyi ni gbogbo.>>

29 Sede male ni kokoyi doka Musa yaa so de a nana kiya e yi nkye e shina mbode yaa pala, se e minya Yesu nkye, <<Waa ma dengeri na?>>

30 Yesu keleba nkye: <<Su yi nseminji daa de butu dege Wurishelima yaa te a Yeriko, se e puari a nani ni bolowa a turiki. Sukwa yi ka yi e yi, su dukwa yi soseyi se su bila e yi a baki muntu na su te ma su. 31 Se Pirisi daa biya turiki ni, de e geni nse minzi mu, e biya a keteri te mayi. 32 Yomu du, nseminji Lawi, de e zo anya ni e geni yi, e shi ma e biya keteri daa e te mayi. 33 Sede nseminji ni Samariya daa, ma te atepiya, de e keyi anya de nse ni ma; de e geni yi, e zi toseyi e yi. 34 E te anya yi se e domuna yi anya de su zi yi suwo, e nya e yi mayi nja riki anebi. e la yi lete kiya ni janki e yi, keyi te a laki bakwe. 35 De geri shekeri nsasape e la gyolo de yaama ni anki kwana bi e ba nsude yaa kula ni shi, Nkye, <Kula nseminji mu,> Nde ni kuma mbayi, na biya ake guru mbode ki kisa a kiya yi a beyi da mu.>

36 <<Yesu minya nsu male kokoyi doka Musa nkye, a siki ntani wuku mu waa ma dengeri ni nseminji de bolowa dukwa mu?>>

37 Male kokoyi doka Musa nkye, <<Nsu de zi toseyi yi.>>

Yesu gye su nkye, <<Eke ma te de ki yi yomu.>>

38 De Yesu nja yayagizi yi su ma a siki tepiya a kiya turiki, su keyi geri daa anya de mase nsu seni Mata keleba yi a gizi yi. 39 Mata man yayiwa mase de seni yi ma Meremu, de zuzunwa a keteri Obagizi yaa zi mbode Yesu pala. 40 Sede Mata la dishiya e yi saa anya ANKI mbosi. E zo anya Yesu e minya nkye, <<Obagizi, ki ma kone yayiwa na bila ni e ni dandani ema yi anki ni mbosi? Gye yi de e zo sua nto!>>

41 Obagizi keleba nkye, <<Mata, Mata,>> leyi ake basi nja e dege a kiya mbo Nyowa, 42 sede mbo daa kede sua bila, Meremu rigye zabi mbo nsu kyawu, ba nsu de yaa keleba yi nshi.>>