1 Yesu gye yayagizi e yi nkye: <<Mbo de yaa sa nsebeki titimi e ma dole na e zo, sede gbotuma a kiya ni nsu de e shi na e sa yaa zo. 2 Yaa pi kyawu de su domuna e yi dunsi leda a wuya e yi de su la e yi kutiri te a siki andun riki nja de e sa yaya dende mu su yi lepi. 3 Sobon yomu ku kula nkiya ku.

<<Nde yayuwa ke yi ke lepi, ki kwabe yi, nde ologba ke, ki yape yi. 4 Nde e yi ke lepi sen bokwe a nana daa, se e kuma zo sen bokwe e zo ologba ke nkye, <Ni juyi,> ki yape yi>>,

5 Se yaya manki gye Obagizi nkye, <<Ki ja mu beigaskye amu!>>

6 Obagizi keleba, <<Nde ku man beigaskye dende kankye saba ni Mosta, <Kwa gye totolo ntasi mu, butu de ki sakisi a siki totolo riki,> yaa yi mbo de ku pala. ,

7 E yi kyawu daa a siki aku e mani bunwa de yaa yi noma ko yaa kone timshiya. Yaa te gye bunwa kwanki de e zo dege bikiya, <Zo kuzukam de ki zunwa ki si mbosi>? 8 Ko yaa gye yi nkye zo, ki shiriya ni mbosi nyema keyi ni de ni si nja sha; a beyi da mu e ke ma ka si ka sha>? 9 E shi yaa gbede ni bunwa sobon e yi mbode e gye yi nkye e yi? 10 Se oku ma du, nde ku yi guru mbo de su gye ku nkye ku yi, ku nkye, <Mu ma bunwa na mu deta ba; mu yi anki amu na kede.> >>

11 Yesu ma a turiki ni Wurishelima, e biya yanka de ma sisika Samariya nja Galili. 12 De Yesu ma a siki tepiya ta dende geri, menza gom de su man suwo kputuru su sa nshi. Su sakisi nyisa 13 Se su yi sukwa dege murinya nsori,<<Yesu, Tolense, ki zi toseyi amu!>>

14 De Yesu geni su, nkye, <<Ku te, de ku nana kiya a ku anya ni pirisi,>> Su ma a kiya tepiya, se su worikye.

15 Daa a siki kputuru gom, de e geni e worikye, e kuma beyi, e dege wurinya nsori yaa yobo Mirikisi. 16 E dure a geba ni Yesu, e gbede yi e ma nse minji Samariya la.

17 Yesu minya, <<Kuma gom na su worikye ku bo? Ririgye tera su ma angana? 18 Ba nse daa de e kuma zo de yobo Mirikisi ba sede bakwe mu?>> 19 Se Yesu gye yi nkye, <<Dege de ki te; beigaskye ake e sa ki samu worikye.>>

20 Parisiyawa worosu, su minya woshe na solota gizi Mirikisi yaa zo, Yesu keleba, << Solota Mirikisi yaa zo ta turuki de sua nya ndani kone ba, 21 Ba nsude yaa pala nkye, <E shi naka anya mu,> ko <E shina kaa anya ni,> Sobon solota gizi Mirikisi e ma a siki aku.>> 22 Se Yesu gye yayagizi e yi, <<Kwanki yaa zo de kwa bila de ku geni nana daa a siki nana ni yaa nsebeki, sede kwa geni ba. 23 Ntani sua gye ku nkye, <E shina kaa anya ni!> ko <E shina kaa anya mu!> Kede ku yi gudu te anya su ba. 24 Sobon Yaa Nsebeki yaa zo a siki nana yi yaama kankye asikye, de yaa yi waliwali a bisi yaa beyi asikye a kowon ni anya a durinya guru. 25 Sede yaa ma dole na de e Genbeki mbo nyowa se ntani ni kwanki mu sua ki yi.

26 <<Nta yiri de e paru a kwanki Nuwu, yomu na yaa te paru a kwanki de Yaa Nsebeki yaa kuma zo. 27 Ntani sua si, sua sha, sua yi amere sua kuma beyi yaya mata amere ari e zo a nana de Nuwu yuru a totolo kwanto. Se riki nsu sori zo si ntani guru. 28 <<E kwa ma yomuna a kwanki ni Lotu. Ntani su ma si su ma sha, su ma see su ma la see, sua nyunkwa sua yi gina. 29 Sede nana de Lotu bila Sodoma, wuta nja dunsi wuta butu a bisi zo suwuta ntani de su ma a geri ni kpataka.

30 <<Yomu na yaama a nana de Yaa Nsebeki yaa kuma zo. 31 A nana ni du nsude e ma a kiya lenda ni gizi, kede e sonka zo la mbodaa ba. Yomu na nsude e ma a bikiya kede e kuma ni beyi a kiya mbo daa. 32 Ku turunwa mbode paru Mata ni Lotu! 33 Du nsude yaa bila tele leyi yi yaa lesa yi, du nsude lesa leyi yi yaa samu yi. 34 Na gye ku, ndederi de mbo mu yaa paru ntani bi sua kwakwana a gbodo daa sede sua la daa sua bila daa. 35 Mata bi sua yi leda adunsi daa; sede sua la daa sua bila daa. 36 Ntani bi sua ma a bikiya sede sua la daa sua bila daa.>>

37 Yayagizi Yesu minya.<<Angana, Obagizi?>>

Yesu keleba su, <<Anya de nki gan ma anya ni onguru sua tala.>>