1 Nana asibi daa Yesu ma bisi a bikiya ni alikama. se yayagizi yi su yenkye kiya ni alikama su murushe a nani asu su ma suku, 2 Se worosu su parisiyawa su minya Yesu nkye, <<Mina sa de kwa yi mbode doka Musa yaa so de su yi ba a nana asibi?>>

3 Yesu keleba su nkye, <<Ku taba karanta mbode Dowuda yi de e shi nja oboki tepiya yi su yi de sua zi nyunwa bo? 4 E yuru a gizi Mirikisi, e la buredi de su sa a keteri su nkye kede nseda e kpa mbode su kyebe ba, e suku mbode doka ki nkye kede su suku ba se pirisi. Se e kwa la worosu su ba oboki tepiya e yi.>>

5 Se Yesu keleba nkye, <<Yaa nsebeki e shiya ma Obagizi ni nana asibi.>>

6 A nana asibi daa Yesu te a siki kolonwa yaa kokoyi su, nseminji daa ma anya ni de nani e yi e sha riki. 7 Parisiyawa nja male ni doka Musa sua bila turiki de su ka Yesu nlepi, sua kone yi ko yaa te worikye nsu suwo a nana asibi. 8 Sede Yesu shina tunani mbode sua yi e gye nseminji de nani e yi sha riki nkye, <<Dege de ki te sakisi a geba asu.>> E dege te sakisi a geba asu.

9 Se Yesu gye su nkye, <<Na minya ku, a mina na doka pala de sua yi a nana asibi: Su yi kyakyawu ko mungu? Su sila leyi ko su kisa la?>>

10 E kone su gyewe guru, se e gye nseminji ni nkye, <<Munka nani ake.>> E munka, se nani e yi kuma munka. 11 Sede su zi anwashi soseyi su sa kutiri beta nja nki asu mbode sua yi Yesu.

12 A siki kwanki ni Yesu te a bisi dunsi de e yi lepa. E kwana dederi yaa yi lepa te nja Mirikisi. 13 De anya kwa yi, e sukwa yayagizi yi e zabi gom sha bi, de su ma yaya manki:

14 Sima de sua sukwa yi nkye Biturusu,

de ma yayiwa Anduru,

Yakubu.

Yaaya,

Pilibu,

Batalomi,

15 Matiyu,

Tomasi, Yakubu yaa ni Alipasu, Sima de sua sukwa yi nsu so kesa e yi,

16 Yawuda yaa ni Yakubu, nja

Yawuda Isikariyoti, de butu Yesu a beyi.

17 Yesu sonka a kisi nja su e sakisi anya de ma pili. Yowa yayagizi e yi su ma anya ni nja yowa ntani guru de su butu yiri Yawudiya, nja Wurishelima, nja guduma ni Taya nja Sidon, 18 su zo de su zi nja de su worikye suwo asu. Nsu worosu de sua sha wuya ni mumungu aworo su samu worikye. 19 se ntani guru sua so de su kpa Yesu, sobon sori ma butu anki yi se e worikye su guru.

20 Yesu kone yayagizi e yi, nkye:

<<Anabirika ma nja worede su ma potoruwa a siki Aworo,

solota gizi Mirikisi maana su la.

21 Anabirika ma nja ku de kwa zi nyunwa kuzukam,

kwa koshi.

Anabirika ma nja ku de kwa yi kuka kuzukam,

kwa yi dala.

22 Anabirika ma nja ku de ntani sua ki ku,

su ja ku te a keteri su ma basi ku

su ki seni aku su nkye kuma mungu, sobon Yaa nsebeki.

23 <<Ku yi peri siki nja dala a nana ni, sobon nani wuta aku e ma totolo na a siki bisi. Sobon yiri de adaatolo asu su yi anebi de rigye ku zo naka.

24 <<Sede gbotu aku oku de ku mani mbo nani kuzum,

dun ku rigye keleba sori guyam ku.

25 Gbotu aku oku de ku rigye koshi kuzukam,

kwa zunwa ni nyunwa.

gbotu aku oku de kwa yi dala kuzukam,

kwa yi beki siki nja kuka

26 Gbotu aku de ntani sua yi beta kyakyawu a kiya aku,

yomu na adaa asu su yi anebi nsu yi yaruwa aka.

27 <<Sede Na gye ku oku de kwa zini: Ku so obokigeba ku, nsude sua so de su geni ndani aku ba ku yi su mbo kyakyawu, 28 worede sua basi ku ku sa su anabirika, ku yi lepa ba worede sua ba ku geni beki. 29 Nde nseda ma ke akumatu daa, juyi ni bi beyi du. Nde nseda la keyi ake, kede ki nana e yi ba, 30 Guru nsude minya ake ki beyi, ko nse daa la mbode ma na ke nsori, kede ki keleba gagaba. 31 Yi ba ntani yiri de ka so de su yi ba ke.

32 <<Nde kwa so worede sua so ku, mina kwa samu anya ni? Ko nsu yi lepi sua so worede ma so su na! 33 Nde kwa yi kyakyawu ba worede sua yi ku kyakyawu, mina ma riba de kwa samu ko nsu lepi osu ma sua yi yomu du. 34 Nde kwa lemese ba worede kwa sadishiya sua kuma nshi ba ku, mina ma riba de kwa samu? ko nsu yi lepi sua lemese anya nsu yi lepi de su biya su kyakya. 35 Sede ku so obokigeba aku, yi su kyakyawu, ku lemese su kede kusa dishiya de sua biya ku ba. Se nani wuta aku yaama totolo, nja de kama yaya ni nsude ma pi girima, sobon e shi e ma dishiya din ni nsu worede sua gbede ba nja mungu ntani. 36 Kuman nsu toseyi, yiride adaa ku e ma nsu toseyi.

37 <<Kede ku yi nseda shiriya, sobon kede su yi ku shiriya ba. Kede ku bebeta nse daa sobon kede su bebeta ku du. Ku yape ntani lepi asu sobon oku ma Mirikisi yaa yape ku lepi aku. 38 Ku beyi sobon oku ma sua ba ku. agongo gwadaa kyakyawu, sika ari yaa nya, gongo de ki gwadaa ntani nshi e shi na Mirikisi yaa gwadaa ke nshi.>> 39 Yesu kwa gye su abenshi nkye: <<Makapi yaa jaa makapi gwala ba? Guru asu sua puari a romu? 40 Yaa makaranta yaa pi male yi ba, sede du nsu de su kokoyi yaa ma kankye male yi.

41 <<Mina sa de ka kone dola de ma a siki ndani yayiwa ake dun mina ka kone ongbomu de ma a siki ndani eke ba? 42 Mina sa de ka gye yayiwa ake nkye, <Zo de butu ke dola de e ma andani e ke,> De ki bila ongbomu ma a siki andani eke? E ke munabuki, pari butu ongbomu de ma ndani ake tuku, de ki geni sere tuku de ki butu dola de ma ndani yayiwa ake.

43 <<Ntasi nsu kyawu yaa yapu yaya mumungu ba, mumungu ntasi yaa yapu yaya nsu kyawu ba. 44 Sobon yomu kwa shina ntasi a yiri yaya de yaa yi. Ntani sua nweyi yaya bori a nki na ankwanya ba, ko yaya kera a nki ankwanya ba. 45 Nse kyakyawu yaa yi mbode kyawu butu a siki mbode e tala a rigogo dishiya yi, nse mumungu yaa butu mumungu mbo de tala a siki dishiya yi. Mbode sika a siki dishiya e shiya na baki yaa pala e yi.

46 Mina sa kwa sukwa ni, <Obagizi, Obagizi> Se kwa yi mbode Na so ba? 47 Guru nsude zo anya na e zi mbode ni pala ari e yi ANKI nshi ba, Na gye ku woni yiri nse ni ma. 48 Yaa ma kankye nseminji de yi gina gizi e yi, e yanka kisi tukuna e kapa kutiri laki e yi a siki dunsi. De su yi riki Nyowa, e dukwa gizi ni sede gizi ni eya zizika ba, sobon su kapa yi a kiya dunsi. 49 Sede nsude zi beta na se e yi ANKI nshi ba, e ma kankye nsu de kapa gini yi a kiya nyashi de e kapa kutiri yi kyakyawu ba. De su yi riki totolo, a buga gizi ni se e puari guru puari yi ma mumungu.>