1 Se guru ntani dege la Yesu te nshi anya Bilatu 2 Se su para sua yaruwa ja Yesu, <<Mu geni nseminji mu yaa dege a ankeli ni ntani kesa mu, yaa nana su beyi gendu ba Kesar nja yaruwa nkye e ma kiristi, seleki.>>

3 Se Bilatu minya Yesu nkye, <<E ke na ki ma seleki ni ntani yawudawa?>>

Yesu keleba nkye <<Yomuna, yiride ki pala,>>. 4 Se Bilatu gye tolense pirisi nja guru ntani, <<Ni geni mbo da de ma ni lepi nja ni mungu anya e yi ba.>>

5 Sede su masa soseyi, <<E shi yaa rikishe ntani guru ni Yawudiya ni mbo de yaa kokoyi. E para yiri Galili ari samu turiki zo anya mu.>>

6 De Bilatu zi yomu, e minya nkye yaa minji mu ma Galiliya na.? 7 De Bilatu shina nkye Yesu ma gunduma kesa ni Yiridu, e kiri Yesu te ba seleki Yiridu, de ma a Wurishelima a kwanki ni.

8 De seleki Yiridu geni Yesu, se e jima yi soseyi, sobon e la kwanki yaa pekye de e geni Yesu de shina ko waa ma e shi. Sobon mbode yaa zi a kiya yi, yaa sadishiya de geni alama daa anya yi. 9 Yiridu minya yi mbo nyowa, sede Yesu keleba e yi ba. 10 Se Tolense ni pirisi nja male ni doka Musa su sakisi anya ni, sua pala yaruwa a kiya e yi. 11 Se Yiridu nja shoja e yi su wulakanshi yi se su yi siya. su sayi totolo riga seleki, su sa yi kuma te aya ni Bilatu. 12 A nana ni Yiridu nja Bilatu su kuma ma oboki, kapi mbo mu paru su ma oboki geba la.

13 Bilatu sukwa toree pirisi gomu, salaki nja ntani, 14 Se Bilatu minya su nkye, <<Ku zo ni nseminji mu a kiya de ku nkye yaa rikishe ntani. Ni gwada a geba aku sede ni sa nshi ni lepi de kwa pala a kiya yi ba. 15 Ko Yiridu ma, de kuma nshi zo anya mu, yiri de ku geni, e yi mbode deta de muntu ba. 16 nkaa yomu, Na poro yi de ni shika yi.>> 17 Akwanki buki nyenteri dole na Bilatu e butu nseda yiri jaru ba su. 18 Ni murinya daa su yi kuruwa, <<Ku te nseminji mu! suwo yi! ku shika mu baraba!>> 19 <Baraba e shina ma nsu de su sayi a jaru ni lepi rikishi de su yi a kesa, nja kisa nse de su yi.> 20 Se Bilatu sakye yi su beta de e shika Yesu. 21 Sede su sigeba ni kuruwa, <<Gidiri e yi! Gidiri e yi!>>

22 Bilatu yi beta nja su ni sen wuku nkye: <<Yaya? Lepi mina nseminji mu yi? Ni sa nshi ni lepi daa de deta muntu ba. nkaa yomu Na poro yi de ni shika yi.>>

23 Sede su sakisi nsori su dama Bilatu de e bila Yesu ba su de su gidiri yi, a karishe su yi nasara. 24 Se Bilatu yeda de yi mbode su ologba yi de yi su nshi. 25 Se Bilatu shika baraba de su sayi a jaru ni lepi rikishe geri ni reshi zi nja kisa ntani. Sede e shika su Yesu de su yi mbode sua bila de su yi.

26 De su la Yesu te nshi, se su gomu nja sima nseminji Sayiri, e butu dege dende geri daa, se su sayi la gidiri de biya Yesu a beyi.

27 *Se ntani nyowa biya yi, nja mata worede sua yi kuka ni beki siki a kiya Yesu. 28 Yesu juyi gye su nkye, yaya mata ni Wurishelima, kede ku yi ni kuka; ku yi kuka sobon kiya ku nja yaya ku. 29 Sede kwanki yaa zo de kwa nkye, <Anabirika ma nja mata de su taba yapu ba, nja nsude taba ka yi siki ba, nja worede su taba ba yaya nono ba!> 30 Sede a kwanki mu na,

<< <Ntani sua gye dunsi, <<Ku puari ja mu a kiya!>>

Sua kwa gye ogbo nkye, <<Ripe mu!>> >

31 Nde ntani su ma yi yomu nja ntasi de ma nyala, mina yaa paru nde e kyekeri?>>

32 Su keyi worosu ntani bi bolowa, te de su kisa su nja Yesu. 33 De su zo anya de sua sukwa yi kwankwa kiya, anya ni su gidiri Yesu, nja nsu lepi bi mu daa ma a nani dama daa ma a nani guni. 34 Se Yesu nkye, <<Adaa na yape su, sobon su shina mbode su ma yi ba.>> Se su laba riga yi ba nkiasu de su kutiri kuriya

35 Ntani sakisi su ma kone yi, toree geri su yi siya. Su nkye <<E sila worosu; bila de e sila nkiya yi nde e shi na ma kiristi de Mirikisi zabi.>>

36 shoja ma su zo yi siya. Su ma mika yi riki ni inebi de musha 37 Su ma nkye,<<Nde ki ma seleki Yawudawa, sila kiya ke.>> 38 A bisi kiya yi su rubuta, karatu nkye,<<DAMU NA MA SELEKI YAWUDAWA>>

39 daa siki nsu lepi de su gidiri yi nja Yesu, yi Yesu beta nene nkye: <<Eke na ki ma kiristi bo? sila kiya ke nja mu maana!>>

40 Sede nseminji ni bi kwabe yi nkye, <<ka yi womba Mirikisi bo? >> <<Eke de ki sa mu poro lepi kyakya na yi? 41 Omu de kyakya na su yi mu, Sobon mu ma keleba nani wuta mbode mu yi na. Sede yaa minji mu yi lepi mbodaa ba.>>

42 Se nkye,<<Yesu turunwa ni, nde ki zo kingbolo solota ake.

43 Yesu keleba yi nkye, <<Mma gye ke gaskye yawumu ka ma nja ni a siki solota gizi bisi.

44 Sede kyakya keripi gomu sha bi dopuwa ripe guru kesa ari keripi wuku ni nyema; 45 nana bila asikye. Na labile de ma a siki gizi Mirikisi laba bi.

46 Se Yesu dege murinya nsori yi kuruwa nkye, << Adaa na! A siki nani ke na ni munka aworo na.>> De Yesu pala yomu se e muntu.

47 De totolo shoja Roma de ma anya ni geni mbode paru, e yobo Mirikisi nkye, <<Gaskye nseminji mu ma nse gangasi la!>> 48 De ntani de su tala anya ni de kone su geni mbode paru, se guru asu su kuma te a gizi su ma buga geba ni bekisiki. 49 Guru worede su shina Yesu, nja mata de su biya yi dege Galili, su sakisi nyisa su ma kone.

50 Nseminji daa nsu seni Yusupu, dege geri ni Arimatiya ni yawudawa, ema kiriki nja ema nse gangasi la, de ma pekye zo ni solota Mirikisi. 51 Nseminji daa seni ma Yusupu dege Arimatiya, a kesa Yawuda. E ma nse kyakyawu la, ema a siki nsu pekye solota ni Mirikisi. Kode ema daa na a siki toree ni kunji yawudawa, sede E yeda ni mbode toree su shiriya de su yi ba. 52 Se e te nja Bilatu, de e minya yi de su beyi nki Yesu. 53 Se e sonka ni nki Yesu, e ripe yi ni woriki, e la yi sa a kumsha de su yanka a nki dunsi de su taba sa nseda asiki yi ba. 54 Ema nana asibi na, e rigye piri de a yuru a nana pushe, de nana asibi.

55 Mata de su zo nja Yesu dege Galili biya Yusupu de su geni anya de kumsha nja anya de su sa nki Yesu. 56 Se su te gizi de su shiriya meyi kemeshi nja keyi kemeshi sobon nki Yesu. Su pushe a nana asibi kankye yiride doka Musa pala.