1 De Yesu kone bisi, E geni nsu mbo nani sua saa sedeka a siki mbo beiko sa sedeka a laki Mirikisi. 2 Yesu kwa geni potoruwa mase makeyi e zo de sa gyolo bi piri de keyi toro kobo. 3 Yesu nkye <<Na gye ku gaskye,>> Sedeka de Potoruwa makeyi mu beyi e pi ni guru ntani. 4 Guru ntani mu su beyi sedeka asu a siki mbo nani asu de su ma shi la; sede e shi mase makeyi mu e beyi a siki reshi mbo de e manshi de yaa zunwa ni leyi yi.>>

5 Worosu yaya gizi e yi su para yi beta a kiya laki Mirikisi de su yi gyaga nja dunsi kyakyawu nja kyawuta de su beyi ba Mirikisi. Sede Yesu gye su nkye, 6 <<Mbo de kwa geni anya mu, kwanki yaa zo de ba dunsi daa de zunwa a bisi ni daa, kowoni daa a siki asu sua la kutiri a kisi.>>

7 Worosu su ntani minya Yesu nkye, <<Male,>> <<Woni kwanki na mbo mu yaa paru? Nja mina ma alama de mwa geni kwanki de mbo worosu mu sua paru?>>

8 Yesu keleba su nkye: <<Ku kone kede nse daa e shishirigye ku. Ntani Nyowa sua zo a siki seni na, sua nkye, <E ni na ni ma e shi,> nja, <Kwanki e yi kusa.> Kede ku biya su. 9 Nde ku zi nabari yanki nja dege ankeli, kede ku zi womba. Mbo woromu dole na su paru mpari, sede karishe tuku zowo ba.>>

10 Se Yesu gye su: <<Arishiya daa sua yi geba nja arishiya daa, nja solota geri daa sua yi geba nja solota geri daa, 11 Sua yi mumungu zizika kesa, sua yi nyunwa nja aloba a kowoni anga, Mbo womba yaa paru nja totore alama yaa butu a bisi.

12 <<Sede kapi guru mbo mu, sua ka ku nja ba ku Genbeki. Sua la ku beyi a kolonwa nja jaru, sua zo ku a geba seleki nja kamkiya, guru sobon ni seni na. 13 Damu yaama dama ba ku de kwa beyi sheeda nabari kyakyawu. 14 Sede ku saa dishiya aku kede ku da mu yiri de kwa tele kiya ku. 15 Na gye ku beta de kwa pala nja shina de nse daa a siki oboki geba aku sua yi yaa ki ko su yi musu ni mbode ku pala. 16 Sua butu ku a beyi ko nsu adaa aku, yayuwa aku, nsu gizi aku nja oboki aku, nja sua kisa worosu su aku. 17 Guru ntani sua ki ku sobon seni na. 18 Sede ba gesa ni kiya aku daa de yaa beta ba. 19 Ku sakisi nsori kwa sila nkiya ke.

20 <<Nde ku geni Wurishelima gyowe ni shoja, kwa shina nkye juru e yi kusa. 21 Se worede su ma Yawudiya su yi gudu ta kiya ogbo, worede su ma totolo geri su butu a woze, nja worede su ma kesa daa kede su yuru atotolo geri. 22 Da mu ma kwanki ni poro, sobon dole guru mbode e ma rubuta a siki takada Mirikisi e sika . 23 Gbotuma aku mata nsu siki nja mata nsu goyi yaya a kwanki ni! sua yi mumungu wuya a kesa nja anwashi ni Mirikisi a kiya ni ntani. 24 Sua kisa ntani worosu ayanki sua kaa worosu nta yaya jaru te bowuta a guru worosu kesa. Worede su shina Mirikisi ba sua taka Wurishelima kapi de kwanki worede shina Mirikisi ba e sika.

25 <<Mwa kwa geni alama yaa nana a siki naana, wonta nja kemu. A siki durinya, worede su shina Mirikisi ba sua sha Genbeki nja rikishe sobon womba zizika ni tonsa totolo riki nja dege mbo de riki mma yi. 26 Ntani sua lense muntu sobon womba ni mbode yaa paru a durinya, sori ni agida gida bisi yaa zizika. 27 A kwanki ni sua geni yaa nsebeki yaa zo dege a gidagida ni sori nja totolo girima e yi. 28 Nde mbo woromu para paru, dege kiya aku a bisi, sobon pushe aku e yi kusa.>>

29 Yesu gye su abenshi mu nkye: <<Ku kone ntasi bori nja guru ntasi. 30 Nde su para butu genya, oku nkiya aku ku shina ndamina yi kusa. 31 Nzun yomu, nde ku geni mbo worosu mu sua paru, ku shina nkye solota ni gizi Mirikisi e yi kusa.

32 <<Na gye ku gaskye, ntani kuzum kam sua taba muntu ba se guru mbo worosu mu paru. 33 Bisi nja kisi sua bise, sede beta na yaa taba bise ba.

34 <<Ku zunwa ni shiri, kede kusa dishiya aku a kiya mbosi si nja sha nja damuwa ni durinya su dama dishiya aku, mba yomu ba, nana ni yaa zo de ku shina ba kankye toroko. 35 Yaa zo a kiya guru ntani durinya kankye toroko. 36 Ku sa ndani kone kowon nana nja yi lepa sobon de ku sila dege guru mbode yaa paru, nja de ku sakisi a geba ni yaa nsebeki.>> 37 Kowoni nana Yesu yaa kokoyi a laki Mirikisi, se kowoni nyema yaa te kwana a kiya totolo dunsi de sua sukwa zetu, 38 se guru ntani sua zo anya e yi nsasape de su zi yi a laki Mirikisi.