1 A beyi da mu, Yesu nja yayagizi sua gyewe totore geri nja geri dende, e ma yi kokoyi ntani nabari kyakyawu a kiya solota Mirikisi. Yayagizi e yi gom sha bi man nja shi, 2 se worosu mata worede su worikye su dege aworo mumungu nja ni shuwuta asu: A siki asu Meremu dege Magadaliya, nsude su butu mungu aworo bokwe a nki yi; 3 Yuwana mata ni Kuza, tolense ni gizi Yiridu ma a siki asu, nja Suzana, nja worosu mata nyowa de su ma sua Yesu nto ni a nki ni mbo asu de su manshi.

4 De ntani nyowa su tala dege geri bombom su ma zo anya Yesu, Yesu gye su abenshi mu: 5 <<Su yi nsu bikiya daa de e ta bikiya eya nyunkwa yiri. De eya nyunkwa yiri, worosu asu puari a kiya turiki; su tataka su, nsunsuwa bisi zabi su sherenka. 6 Worosu yiri puari a kiya dunsi, de su butu, se su kyekeri sede riki ma anya ni ba. 7 Worosu yiri puari a siki ankwanya, su dege gabada se ankwanya sukwa saba de butu. 8 Worosu su saba puari a kesa kyakyawu. su butu su yi girima su yi yaya, deri deri pi saba de su nyunkwa su.>>

De Yesu gye su beta mu, se e yi sukwa, <<Nsude man kuni zi bila de e zi!>>

9 Yayagizi Yesu minya yi nkye mina ma abenshi mu, 10 Yesu keleba nkye, <<Su yeda ku de ku shina mbode ma a boyi ni solota Mirikisi, yiri de gye ntani na gye su beta ni abenshi na sobon,

<<<Ko su kone sua geni ba,

Ko su zi sua gane ba>.

11 <<Maana abenshi mu aka: Saba ni e shina ma kelima ni Mirikisi. 12 Yiri worede e puari a kiya turiki ni osu na su ma worede zi kelima ni Mirikisi, se obiri zo la kelima ni butu a siki dishiya asu, sobon kede su beigaskye de su samu sila. 13 Saba worede puari a kiya ni dunsi osu na su ma worede keleba kelima beta ni Mirikisi ni perisiki kwanki de su zi, sede a ririnya samu yuru te akisi kyakyawu ba. Su yeda kwanki piri na, sede gwada zo su se su puari. 14 Yiri de puari a siki ankwanya osu na ntani de zi kelima beta Mirikisi, bayi kwana bi, mbo durinya nja bila mbo nani, nja zunwa bila mbo durinya mu, sa su su yi girima ba. 15 Sede yiri de puari a kiya ni kesa kyakyawu ni osu na su ma worede keleba beta ni Mirikisi, su keleba ni dishiya daa, su sakisi nsori ari su beyi yaya.

16 <<Ba nsude yaa sa wuta pitila e la obubu ripe yi ko e la yi sa a kisi gbodo. De yaa yi yomu, yaa la yi sa a kiya ni gwala lete pitila, sobon ni ntani de ma yuru su geni asikye. 17 Ba mbode ma riripe, de sua pelesa yi ba, kuma yomu na ba mbode ma riripe de sua bure yi a woze ba. 18 Sobon yomu ku nyunkwa kuni nkyawu yiride kwa zi beta. Nsude mani mbo e shiya sua kwa ja yi nshi; nsude mani mbo ba, mbode e manshi ma sua la keleba bila e yi.>>

19 Kuzukam amaa ni Yesu nja yayuwa e yi su zo anya Yesu de su geni yi, sede su yi yaa te anya e yi ba sobon ni yowa ntani. 20 Nse daa gye Yesu nkye, <<Amaa ake nja yayuwa ake su sakisi a woze, su ma so de su geni ke.>>

21 Yesu keleba nkye, <<Amaa na nja yayuwa na osu na worede su ma zi beta ni Mirikisi, su la beta ni ma yi ANKI nshi.>>

22 Nana daa Yesu gye yayagizi e yi nkye, <<Mu nyenteri riki te a keteri.>> Su yuru a siki kwanto se su nyenteri te a woze. 23 De su ma a siki tepiya, Yesu yi kwana. Su shina ba a gidagida yi beki akusuka nsu sori dege a siki riki. Su yuru a siki totolo aseri, sobon riki wula ma yuru a siki kwanto.

24 Yayagizi e yi dege yi a kwana, su nkye, <<Tolense, Tolense, mwa muntu!>>

Yesu dege a bisi kwabe akusuka nja agaguwa riki de ma somiya; akusuka nja riki sakisi ship. 25 Yesu minya yayagizi e yi nkye. <<Beigaskye aku manga?>>

Su zi womba soseyi su yi mamanki su ma minya nkya su, <<Waa ma nse mu? E kobe akusuka nja riki, su kwa zi yi.>>

26 Yesu nja yayagizi e yi su yi tepiya a siki kwanto ari su keyi kesa ni garasinawa, de ma a keteri totolo riki Galili. 27 De Yesu ma sonka a siki kwanto, e gom nja nseda dege geri ni de man arizeni. E dede de nse ni sa riga ba ko e zunwa a gizi, konana yaa zunwa kumsha. 28 De nsu so minya ni geni Yesu, e puari a kisi a geba e yi, e yi kuruwa nsori nkye, <<Yesu, mina ka bila nja ni, Yaa ni Mirikisi? Mma ologba ke, kede ki ba ni wuya ba!>> 29 Yesu rigye kula mumungu aworo butu bila nki nseminji ni. Sobon kowoni kwanki mumungu aworo ma leyi buga a kisi, ko de su domuna yi seni nja nani nzun yomu yaa kukunshe serika de su domuna e yi nshi mumungu aworo ma kule yi te kumsha.

30 Yesu minya nseminji, <<Seni ake ma waa?>>

Nseminji ni keleba, <<Seni na ma nyowa,>> sobon mumungu aworo nyowa na ma nki e yi. 31 Mungu aworo ologba Yesu kede e kiri su te a siki romu anya de sua ba mungu aworo poro ba.

32 Anya asu alede nyowa su ma si mbosi a kiya ogbo. Arizeni ologba Yesu de bila su de su yuru a siki alede woroni, Yesu yeda su. 33 De arizeni butu bila nseminji ni, su yuru a siki alede, guru alede ni dege ngudu yuru a siki totolo riki se riki te nsu. 34 De worede ma kone alede ni su geni mbode paru, su yi gudu te a siki totolo geri nja dende geri su beyi nabari mbode paru, 35 ntani butu te a woze de su geni mbode paru. De su zo anya Yesu, su zo sani nseminji de arizeni butu a nki e yi, zuzunwa a keteri Yesu, e sa riga e kuma ma a siki ankeli e yi; su zi womba. 36 Worede ma anya ni kwanki ni gye ntani yiride nsu arizeni worikye. 37 Ntani worede ma gyowe kusa ni garasinawa su ologba Yesu de bila kesa asu, sobon su zi womba. Se Yesu yuru a siki kwanto te meyi.

38 Anya ni nseminji de arizeni butu a nki e yi ni zo yaa ologba Yesu de e te nja shi, sede Yesu gye yi de kuma beyi, nkye, 39 <<Kuma te a gizi de ki gye ntani totolo mbode Mirikisi yi ke nshi.>>Nseminji ni kuma mbayi te a siki geri gye su mbode Yesu yi nshi.

40 Konwawa ma pekye Yesu de e zo, su yi yi nnaba, dun su ma pekye yi la. 41 Anya ni nseminji daa sua sukwa seni yi Yayirus, e shiya ma tolense kolonwa, e zo dure a geba Yesu, yaa ologba e yi de te a gizi e yi, 42 sobon yaa e yi ndandaa kede ni mase, yaa shekera gom sha bi, yaa so de muntu.

De Yesu ma kiya turiki, ntani ma biya yi su ma kpa nki e yi a kowoni keteri. 43 A siki asu mase daa de yaa Genbeki dege suwo ni nya zini shekera gom sha bi, a kisa guru mbode manshi a nani nsu megeni, ba nsude eya worikye yi ba. 44 E zo a beyi Yesu e kpa kuni riga yi, anya ni zini de ma nya sakisi.

45 Yesu minya <<Waa kpa ni?>> .

Kowon nse nkye e shina ba, Biturusu nkye, <<Tolense, ntani su yi yowa kowoni nse ma kpa ke.>>

46 Sede Yesu nkye, <<Nse daa kpa ni; Sobon Ni zi sori butu a nki na.>>

47 Se mase ni, geni su shina yaa yi yaa boyi gagaba, e butu nki e yi ma kakada e puari a geba Yesu. A ndani ntani guru, e pala mbode saa e kpa Yesu nja yiri de e worikye. 48 Yesu gye yi nkye,<<Yaa mase, beigaskye ake worikye ke. Sonka ni selema.>>

49 De Yesu tuku ma kiya beta, nse daa zo dege gizi ni Yaa yuru, tolense ni kolonwa. <<Yaa ake muntu>> e pala. <<kede ki dama male gagaba.>>

50 De Yesu zi yomu, E gye Yarisu nkye, <<Kede ki zi womba; beigaskye ake, yaa sa yaa ake yaa worikye jaja.>>

51 De Yesu keyi gizi ni Yarisu, Yesu saa nse daa yuru nja shi ba se Biturusu, nja Yaaya nja Yakubu, nja adaa nja amaa ni yaa ni. 52 A kiya yomu ntani de su ma a gizi ni su mayi kuka nja beki siki sobon yaa mase de muntu. Yesu nkye. <<Kede ku yi kuka,>> <<E muntu ba yaa yi kwana na.>>

53 Su yi Yesu dala ni nene, sobon su shina yaa mase ni e muntu. 54 Sede Yesu ka nani yaa mase ni nkye, <<Yaa mase, dege a bisi!>> 55 Se aworo yi kuma, dandani e dege a bisi. Se e gye su de su beyi mbosi de si. 56 Adaa e yi nja amaa e yi su ma yi mamanki, sede Yesu gye su nkye kede su gye nse daa mbode paru.