1 Na daa de Yesu sakisi a keteri riki ni Janisarat, ntani Nyowa gyowe yi sua kiri nkiasu de su zi kokoyi ni kelima ni Mirikisi, 2 Yesu geni kwanto bi a karishe riki, de nsu kaa gunda bila, sua wonkye eya asu. 3 Yesu yuru a siki kwanto daa, de mani Biturusu, se e gye yi nkye kiri kwanto piri ta siki riki. se e zunwa yaa kokoyi ntani a siki kwanto.

4 De Yesu gama beta, e gye Biturusu, <<Ki Kiri kwanto te anya ondum riki, de ku sa eya de ku ka gunda.>>

5 Biturusu keleba nkye, <<Nsugizi, mua pama ANKI tun dederi mu ka mbodaa ba. Sede tunde ki pala yomu, Na kutiri eya a siki riki.>>

6 De su yi mbo de Yesu gye su, se su kaa gunda nyowa de sa eya asu e para saga. 7 De su geni yomu, se su sukwa oboki ANKI asu de su ma siki kwanto daa de su zo sua su nto, se su sika kwanto guru bi ni gunda de saa yaa so de yuru a siki riki sobon loni gunda.

8 De Biturusu geni mbo de paru, e puari a geba Yesu nkye, <<Te ma ke bila ni, Obagizi; Ni ma nsu lepi la!>> 9 E shi nja guru nsu de su ma gabada su yi mamanki ni gunda de su kaa butu nshi, 10 yomu na Yakubu nja Yaaya, yaya ni Zabedi, de su ma oboki anki ni Biturusu.

Se Yesu gye Biturusu nkye, <<Kede ki zi womba; dege kuzukam ta geba ka kaa ntani na ba gunda ba.>> 11 Se su jaa kwanto asu ta keteri baki riki, su bila mbode sua yi guru su biya Yesu.

12 De Yesu ma a siki geri daa, nseminji daa de nki e yi guru ma kputuru. De e geni Yesu, e dure a kisi a geba Yesu e bayi kadishiya nkye, <<Obagizi, nde ki yeda, kisa de ni worikye.>>

13 Yesu munka nani e yi kpa nseminji. <<Nkye E ni ni yeda,>> Ki worikye! dandani kputuru e yi worikye bila e yi.

14 Se Yesu ja yi kuni kede ki gye nseda ba, sede ki te nana nki ke ba pirisi de ki ba su sedeka de kputuru ake worikye, nta yiri de Musa beyi doka de e ma sheeda ba su.>>

15 Sede nabari Yesu ma a kiya sigeba anya guru, ntani zo yowa de su zi yi nja de su worikye suwo asu. 16 Sede Yesu ma kuku jaa nki e yi ta anya de nse daa ma siki e yi ba de yi lepa.

17 Nana daa de Yesu ma kokoyi, parisiyawa nja male ni doka Musa, worede zo dege kowoni geri ni Galili nja Yawudiya nja Wurishelima, su zunwa anya ni. Se sori ni Mirikisi zo beyi de worikye nsu suwo. 18 Worosu su menza la nsu nki sha riki zo a siki kalanga sua so de su keyi yi te a siki gizi a geba Yesu. 19 De su samu turiki de sua keyi te ba sobon yowa ntani, su biya nshi a kiya lenda keyi ta kisi a kalanga yi su sa yi a sisika yowa ntani, a geba Yesu.

20 De Yesu geni beigaskye asu, nkye, <<Oboki, Mirikisi yape lepi ake.>>

21 Parisiyawa nja male ni doka Musa su ma gye nkiasu nkye, <<Waa ma nse mu de yaa yi beta ni saba mu? Waa yaa yape lepi mba Mirikisi e shi dandaa e yi aba?>>

22 Yesu shina mbode sua yi tunani a kiya e minya nkye, <<Mina sa de kwa tunani mu a siki dishiya aku? 23 De su pala nkye, <Su yape lepi ake,> ko su nkye, <Dege de ki yi tepiya wona pi>? 24 Sede mma so de ku shina nkye Yaa nsebeki e man yiko de yaa yape lepi a durinya.>> gye nsu nki sha riki, <<Na gye ke, dege a bisi, la kalanga ake de ki te a gizi.>> 25 Dandani e dege a bisi a geba asu, e la kalanga e yi de e kwakwana a kiya e yi e te a gizi yaa yobo Mirikisi. 26 Guru ntani sua yi mamanki nja yobo Mirikisi. Su zi womba su nkye, <<Mu geni mbo beyi mamanki yawu.>>

27 A beyi nsu mu, Yesu butu a woze e geni Nsu keleba gendu nsu keleba gendu de seni yi ma Lawi zunwa kingbolo keleba gendu. Yesu gye yi nkye, <<Biya ni>> 28 Se Lawi dege a bisi, bila guru mbode yaa yi e biya Yesu.

29 Se Lawi shiriya totolo buki ba Yesu a gizi e yi, se nsu keleba gendu Nyowa nja worosu ntani su ma si mbosi nja su. 30 Sede parisiyawa nja male ni doka Musa de ma nja su su yi mungu beta su gye yayagizi e yi nkye, <<Mina sa de kwa si nja sha nja nsu keleba gendu nja nsu lepi>?>>

31 Yesu keleba asu, <<Ba worede su man lapiya na sua bila nsu megeni ba, sede worede sua yi suwo. 32 Ni zo de ni sukwa nsu yi mbo gangasi aba, sede worede sua yi lepi de su juyi bila lepi asu.>>

33 Su gye Yesu nkye, <<Yayagizi Yaaya sua yi azimi nja lepa, yomu na yayagizi parisiyawa osu ma du sua yi azimi, sede yayagizi ake sua sigeba ni si nja sha.>>

34 Yesu keleba gye su nkye, <<kwa yi yaa sa de bakwe a buki amere ni ango su yi azimi tunde ango ma nja su? ayi yaama yomu ba! 35 Sede kwanki yaa zo de sua la ango bila su; kwanki ni sua yi azimi.>>

36 Yesu gye su abenshi nkye: <<Ba nsude yaa saga sabuwa keyi de pashi nja wuri keyi. Nde e yaa saga sabuwa keyi ni, anya de dumki a sabuwa keyi yaa yi kyakya nja wuri ni ba. 37 Ba nsude yaala riki janki yi nya a siki gwala de e man riki musha ba. Nde e yi yomu sabuwa abure yaa wokye gwala ni, riki janki de ma gwala yaala yowa nya. 38 Yi, sabuwa riki janki sua nya a siki sabuwa gwala na. 39 Ba nsude yaa bila sha sabuwa riki inebi a beyi de e sha anko ni inebi, yaa nkye, <<Anko pi kyawu.>>>