1 A siki shekera gom sha biyari ni solota ni kesa Tiberiya de Buntu Bilatu yaa yi solota ni Yawudiya. Yiridu yaa yi solota ni Galili, yayiwa e yi Pilibu yaa yi solota ni Ituriya nja Tarakunita, nja Lisaniya yaa yi solota ni Abiliya, 2 Kwanki de Ananiya nja kayapa su ma toree ni pirisi, beta Mirikisi zo anya ni Yaaya yaa ni Zakariya a siki denka. 3 Yaaya te a siki guru geri de gyewe baki riki ni Wurudu, yaa beyi manki tunkwasa ni juyi bila lepi nja sobon yape ni lepi su. 4 E ma rubuta a siki takada Ishaya anebi Mirikisi:

<<Murinya daa nsu sukwa a siki denka,

<Gyala turiki ba Obagizi,

Ku munka turiki tiriri beyi.

5 Kowoni gbongbolo sua sika yi,

kowoni dunsi nja ogbo sua ku ma nshi kwana.

turiki de tonkori sua munka yi,

turiki de ma mumungu sua gyale yi.

6 Guru ntani beki sua geni sila Mirikisi.>>>

7 Yaaya gye ntani de su butu zo de yi su tunkwasa, <<Oku yaya ni ogbozi! Waa gila ku de ku yi gudu bila mungu mbode yaa san ku? 8 Ku yi mbode nana nkye ku juyi bila mbo mumungu. Kede ku nkye, <Kuma ni Abireyi e ma adaa ku.> Mma gye ku Mirikisi yaa yi yaa juyi dunsi de su ma yaya Abireyi. 9 Ko kuzukam gapiya Obagizi e ma kisi ririnya ntasi, kowoni ntasi de yaa yapu yaya kyakyawu ba, sua sala e yi kutiri a siki wuta.>> 10 <<Ntani minya yi nkye. Mina mua yi?>>

11 Yaaya keleba, <<Nsu de man riga bi e laba nja nsude e man shi ba, nsude mani mbosi e yi yomu du.>>

12 Nsu keleba gendu osu ma su zo de su yi tunkwasa. Su minya nkye, <<Male,>> <<Mina mua yi?>>

13 <<Kede ku keleba Nyowa pi yiride su sa ku,>> E gye su.

14 Se worosu su shoja su minya yi, <<Mina mua yi?>>

E keleba su nkye, <<Kede ku ka ntani nsori de su ba ku gyolo nja kede ku basi ntani nlepi de su yi ba, ku gbede ni mbode sua biya ku.>>

15 Ntani sua pekye se guru asu sua yi mamanki a dishiya asu su nkye ko Yaaya e shiya ma kiristi. 16 Yaaya keleba su guru, <<Na yi ku tunkwasa ni riki. Sede nse daa de ma totolo pi ni yaa zo, ni deta de na konse angwe takalami yi ba. E shi yaa yi ku tunkwasa ni Aworo Nsuseki nja wuta. 17 E keyi tengeri yi a nani de yaa dukwa saba a pita nja sheke nyanye butu a siki saba, Anya ni yaa tala saba arigogo yi, akweyi nyanye si wuta a wuta de yaa muntu ba.>> 18 A turiki nyowa Yaaya beyi nabari kyakyawu te nja ntani nja gila su de su juyi bila lepi. 19 Sede Yaaya kwabe gomuna Yiridu sobon e yi kyawu ba de ki bila Yirudiya mata yayiwa yi Pilibu, nja guru mungu mbode e yi, 20 Yiridu sa su kaa Yaaya kule laki jaru: da mu e shina ma mungu mbo de yi jaja.

21 De guru ntani su yi tunkwasa, Yesu e shi ma yi tunkwasa du. De yaa yi lepa, se bisi bure 22 Aworo nsuseki sonka a kiya e yi ni nki kankye nkurisha. Anya ni su zi murinya butu dege A bisi nkye, <<Ki ma Yaa na la, de E ni ma so; nja e ke na yi peri siki soseyi.>>

23 Kuzum Yesu nkiya e yi man shekera talatin kapi de e para ANKI ni kokoyi ntani. ntani yi tunani nkye e ma Yaa, ni Yusupu,

Yaa ni Heli, 24 Yusupu Yaa ni Mattat,

Mattat yaa ni Lawi, yaa ni Malki,

yaa ni Yanna, Yaa ni Yusupu,

25 Yusupu ma Yaa ni Matatiya, yaa ni Amosi,

yaa ni Nahu, yaa ni Asili,

yaa ni Najaya,

26 yaa ni Maata, yaa ni Matasiya, yaa ni Semina,

Semina yaa ni Yosiki, Yosiki yaa ni Yoda,

27 Yoda yaa ni Yowana,

Yowana yaa ni Resa,

Resa yaa ni Zerubabe,

Zerubabe yaa ni Sheyatiye,

Sheyatiye yaa ni Neri,

28 Neri yaa ni Maliki,

Maliki yaa ni Addi,

Addi yaa ni kosama,

Kosama yaa ni Elimadama,

Elimadama yaa ni Er,

29 Er yaa ni Yoshuwa,

Yoshuwa yaa ni Eliyaza,

Eliyaza yaa ni Yorim,

Yorim yaa ni Mattat,

Mattat yaa ni Lawi

30 Lawi yaa ni Simiyo,

Simiyo yaa ni Juda,

Juda yaa ni Yusupu,

Yusupu yaa ni Yonam,

Yonam yaa ni Eliyaki,

31 Eliyaki yaa ni Malaya,

Malaya yaa ni Mena,

Mena yaa ni Matata,

Matata yaa ni Nata,

Nata yaa ni Dowuda, 32 Dowuda Yaa ni Yesi,

yaa ni Obadiya, yaa ni Boaza,

yaa ni Salmon yaa ni Nashon,

33 Nashon yaa ni Aminada,

Aminada yaa ni Aram,

Aram yaa ni Yezron,

Yezron yaa ni Periza,

Periza yaa ni Yawuda, 34 Yawuda yaa ni Yakubu,

Yakubu yaa ni Ishaku,

Ishaku yaa ni Abireyi,

Abireyi yaa ni Tera,

Tera yaa ni Nahor, 35 Nahor yaa ni Serug,

Serugu yaa ni Reyu,

Reyu yaa ni Pelegi,

Pelegi yaa ni Eber,

Eber yaa ni Shela 36 Shela yaa ni Kena,

Kena yaa ni Apasha,

Apasha yaa ni Shem,

Shem yaa ni Nuwu,

Nuwu yaa ni Lame, 37 Lame yaa ni Metusela,

Metusela yaa ni Enoku,

Enoku yaa ni Yare,

Yare yaa ni Mahalalele,

Mahalale yaa ni Kena, 38 Kena yaa ni Enoshi,

Enoshi yaa ni Seti,

Seti yaa ni Adomu,

Adomu de Mirikisi alita e yi.