1 A kwanki de Seleki Keisa Agustu e beyi doka nkye su kiriga ntani de su ma kesa Roma. 2 Da mu e shiya na ma kiriga ni pari de su yi a kwanki de Kiriniyasu yaa yi solota ni kesa Suriya. 3 Se konse kuma ta geri e yi de su kiriga yi.

4 Se Yusupu e shi ma te a geri Nazere a siki Galili ni Yawudiya, ta Batalami geri ni Dowuda, sobon e ma juriya ni Dowuda. 5 Yusupu te anya ni de su kiriga yi nja Meremu mase sari, de su yi anikowori ni amere nja kiya su, kwanki ni Meremu e man siki yaa bila de yapu yaa. 6 De su ma a Batalami, kwanki yi de yaa yapu Yaa yi, 7 se e yapu yaa yi ni pari, yaa minji. E ripe yi ni woriki, e la yi kwakwana a mbode sua ba daba mbosi a siki yi, sobon su samu laki de sua sonka a siki yi ba.

8 Anya ni worosu nsu kiwo su ma pili kusa ni anya ni, sua kpanku timshiya asu ndederi. 9 Se meleku ni Mirikisi zo anya asu, se girima ni Obagizi yi asikye gyewe su, se su zi womba soseyi. 10 Sede meleku Mirikisi gye su nkye, <<Kede ku zi womba. Ni keyi ku nabari kyakyawu ni totolo perisiki anya ni ntani guru. 11 Yawu a siki geri ni Dowuda su yapu nsu sila ku; e ma Kiristi Obagizi. 12 Da mu e shiya ma alama ba ku: Kwa san yaa dende su lende yi ni keyi su leyi kwakwana a kiya mbode sua baa daba mbosi.>>

13 Dandani se kunji shoja ni meleku bisi nyowa butu nja meleku sua yobo Mirikisi nkye,

14 <<Girima ta anya Mirikisi de ma siki bisi,

a durinya selema nja aniyeri ma ba worede Mirikisi yaa zi dadi asu>>.

15 De meleku Mirikisi bila su te a siki bisi, nsu yi kiwo su gye nkyasu, <<Mu te Batalami de mu te geni mbode paru, de Mirikisi yi mu beta a kiya yi.>>

16 Su yi seberi te geni meremu nja Yusupu, ni yaa dende, de kwakwana a kiya anya de sua ba daba mbosi. 17 De nsu kiwo geni yaa dende ni se su pala nabari de meleku Mirikisi gye su a kiya ni yaa mu, 18 guru nsu worede zi su yi mamanki ni mbode nsu kiwo gye su. 19 Sede Meremu keyi guru mbo de su pala yaa yi tunani a siki dishiya yi. 20 Nsu kiwo kuma, su beyi girima nja yobo Mirikisi sobon guru mbode su zi sukwa geni, yiri de ntani gye su.

21 Nana takusi, de kwanki yi ni yanka, su sa yi seni Yesu, seni de meleku beyi kapi de sua yapu yi.

22 De kwanki yi de su wonka rebi yiri de doka ni Musa pala de su yi, Yusupu nja Meremu su la Yesu ta Wurishelima de su munka yi ba Mirikisi 23 E ma meyi yomu na yiri de e rubuta a siki takada doka ni Obagizi, <<Kowoni yaa Minji ni pari de su yapu sua leyi saa keteri ni seki ba Obagizi>>, 24 se su beyi sedeka de ema kyakya nja mbode ma a siki doka Mirikisi: <<Nkurisha bi ko yaya ni tatambiri.>>

25 Kuzukam nseminji daa a Wurishelima sua sukwa seni nkye Simiyo, ema nse de yaa yi zunwa gangasi anya Mirikisi nja beyi nki yi ba ANKI Mirikisi. E kwa pekye nana de sua yi takuwa Izireyila, Aworo Nsuseki ma a kiya yi. 26 Aworo Nsuseki pelesa gye yi nkye yaa muntu ba se e geni Obagizi Yesu Kiristi. 27 De e sika nja Aworo ni Mirikisi, e dege te a laki Mirikisi a kwanki de su keyi Yesu te de su yi yiri de alada doka Musa pala nkye su yi, 28 Simiyo leyi nana yi e yobo Mirikisi, nkye:

29 <<Mirikisi nsu girima, yiri de ki yi anikowori,

ki seleme bunwa ke a siki selema.

30 Sobon ndani na geni sila ake,

31 de ki gyala ba ntani guru,

32 asikye de yaa pelesa ake ba ntani worede su ma Yawudawa ba

nja girima ba ntani ake Izireyila.>>

33 Adaa nja Amaa ni Yesu su ka nani a baki, su yi mamanki ni mbode Simiyo pala a kiya ni Yesu. 34 Se Simiyo sa su anabirika e gye Meremu Amaa yi nkye: <<Mirikisi zabi Yaa mu de ma puari ni woron su nja dege ni woron su a Izireyila, nja de yaama alama de ntani sua yi geba nja shi, 35 de tunani dishiya asu yaa pelesa asu. Mbo mu yaa suwo ke a dishiya kankye su sukwa ke tokopi dishiya.>>

36 Anya ni anebi ni mase, sua sukwa yi Anatu, ema yaa mase Adaa yi ma Panuwe, e ma juriya ni Asha. E sopa soseyi; E yi zunwa ni amere shekera bokwe kya, 37 Anya ni mase makeyi ma de e yi shekera tamani ni wuru de ma laki Mirikisi e butu ba, yaa bowuta Mirikisi kowon nana ndederi nja nnana, yaa yi azimi nja lepa. 38 Anatu zo anya su kwanki ni, yaa gbede Mirikisi yi beta a kiya ni yaa ni nja guru worede sua san ndani sigeba ni sila Wurishelima.

39 De Yusupu nja Meremu su yi guru mbo de doka Mirikisi nkye su yi, su kuma ma su ta Galili geri asu ni Nazere. 40 Yesu yi girima e kwa yi; e sika nja shina, nja aniyeri ni Mirikisi e ma a kiya yi.

41 Kowoni shekera Adaa nja Amaa ni Yesu sua ta Wurishelima de su yi buki ni nyenteri. 42 De Yesu yi shekera gom sha bi ni girima, su te ayan buki, yiri alada de su saba yi. 43 A beyi de buki yaa, de nsu adaa yi sua kuma ta gizi, Yesu Amaa yi a Wurishelima, sede su shina de sakisi ba. 44 Sua geni kankye ema nja su yi tepiya ni nana daa. Se su para bila yi a siki yayuwa su nja nsu oboki asu. 45 De su geni yi ba, su kuma mbayi te a Wurishelima te Bele yi. 46 A beyi nana wuku su geni yi a siki laki Mirikisi, zunwa a sisika nsu male, yaa zi su e kwa minya su beta. 47 Guru nsude zi yi su yi mamanki ni yiri shina ni Yesu nja keleba de yaa yi su. 48 De nsu Adaa yi su geni yi, su yi mamanki. Amaa yi gye yi nkye, <<Yaa na, mina sa de ki yi mu yomu? Adaa ake nja Ni mu rikishe de mu geni ke ba.>>

49 <<Yesu minya su nkye, Mina sa de kwa bilani?>> Ku shina nkye e yi kyawu de Ni ma gizi Adaa na bo?>> 50 Sede su shina mbode yaa gye su ba.

51 E beyi girima e te a Nazere nja su. Amaa yi keyi beta mu a siki dishiya yi yaa yi tunani. 52 Se Yesu yi girima a nki nja a siki simi, e kuma man peri zini anya Mirikisi nja ntani.