1 De Yesu gama gye ntani guru mbo mu, e yuru a Kapanawu. 2 Anya ni bunwa totolo shoja Roma, de nsu gizi yi yaa so yi soseyi, yaa yi suwo yaa bila de muntu. 3 De totolo shoja Roma zi nabari Yesu e saka worosu su toree Yawudawa anya yi, su gye yi de e zo worikye bunwa yi. 4 De su zo anya Yesu, su ologba yi soseyi, <<nseminji mu e yi kyawu de ki sua yi to, 5 E so ntani amu nja e shi nkiya yi gini mu kolonwa.>> 6 Yesu te nja su. De e kusa ni gizi ni se totolo shoja mu saka nsu oboki e yi anya Yesu:<<Obagizi, kede ki dama kiya ke, ni deta de na sonka a lenda gizi na ba. 7 E shiya sa ni geni ni deta de ka zo anya na ba. Sede ki pala beta kede, bunwa na yaa worikye. 8 Eni nkiya na ni ma a nani ni yiko nseda la, niman shoja a nani na. Ni gye nse mu nkye,<Te,> se e te; nseda,<Zo,> se e zo. Ni gye bunwa na,<Yi mbo mu,> se yi. 9 De Yesu zi mbode e pala, e yi mamanki, e juyi kone ntani de sua biya yi e gye su nkye <<Na gye ku, a siki Izireyila ntaba geni beigaskye nsu sori yiri samu ba.>> 10 Worede su saka su juyi te a gizi totolo shoja su san bunwa e yi worikye.

11 E dede ba, Yesu ta geri daa sua sukwa yi Nayi, yayagizi e yi nja ntani nyowa su te nja shi. 12 De e kusa ni kopa geri ni, ntani worosu su su ma butu ni yaa daa de muntu e shi dandaa na amaa e yi yapu yi, amaa e yi ma mase makeyi na. Ntani nyowa dege siki geri asu ma nja shi. 13 De Obagizi geni mase ni, e zi toseyi e yi nkye, <<kede ki yi kuka.>>

14 Se Yesu kpa kyekpa ni nsu muntu, worede keyi kyekpa sakisi. Yesu nkye, <<Yaa sambari, Mma gye ke, dege a bisi!>> 15 Nsude muntu dege zuzunwa yaa yi beta, Yesu leyi ba amaa e yi. 16 Guru asu womba ka su, su yobo Mirikisi. <<Totolo anebi ma a siki ni amu, >> su nkye. <<Mirikisi zo de E sila ntani e yi.>> 17 Nabari mbode Yesu yi mu e zaga ko anga a siki ni Yawudiya nja kesa de ma kusa nja su.

18 De yayagizi Yaaya nsu tunkwasa gye yi guru mbo worosu mu. E sukwa yayagizi ntani bi, 19 Yaaya saka su ayan Obagizi de su minye yi, <<E ke na ki ma nsu de yaa zo, ko mu pekye nse daa mbo?>> 20 De menza worosu mu zo ayan Yesu, su nkye,<<Yaaya nsu tunkwasa saka mu ayake da mu minye ke, <Eke na ki ma nsu sila mu de yaa zo, ko mu pekye nse daa mbo mu?> >> 21 A kyakya kwanki ni na,Yesu worikye ntani nyowa dege siki suwo, shuwuta nja aworo mumungu, e ba makapi nyowa ndani de su geni anya. 22 Yesu gye yaya manki Yaaya nkye, <<Ku kuma mbayi ku gye Yaaya mbode ku geni ku kuma zi: Makapi su ma geni gurugu su ma yi tepiya, kputuru su worikye, kuruma ma zi, worede su muntu su dege leyi, su ma gye potoruwa nabari kyakyawu. 23 Anabirika ni Mirikisi e ma nja nsude su yi shaka ni beigaskye de su manshi a kiya na ba.>> 24 A beyi de yaya manki Yaaya te ma su, Yesu sa kutiri beta gye ntani a kiya Yaaya: <<Minana ku te geni a siki denka? Ku te geni sanwa de akusuka yaa wula yi la? 25 Gyeni, mina ku te kone a denka? Nseminji daa de saa keyi kyakyawu na? Yi, worede sua sa keyi kyakyawu mu su ma zunwa a gizi seleki na. 26 Sede minana ku te kone? Anebi na? Ee, mma gye ku, e pi anebi. 27 A kiya ni Yaaya na beta ni Mirikisi su rubuta nkye:<< <Na saka yaa manki na a geba ke, nsude yaa gyala turiki kapi de ka zo.> 28 Mma gye ku, a siki worede yapu su nseda pi Yaaya girima ba; nzun yomu nsude ma dende piri a siki solota Mirikisi e pi Yaaya girima.>> 29 Guru worede su zi beta mu, nsu keleba gendu osu na nsu zi doka Mirikisi ni gangasi, sobon Yaaya na yi su tunkwasa. 30 Sede Parisiyawa nja male kokoyi doka Musa su ki mbode Mirikisi shiriya su nshi, su yeda de Yaaya e yi su tunkwasa ba.

31 Yesu sigeba ni beta nkye, <<Ni mina, sua gwada ntani zamani mu nshi? Su ma woni yiri ntani? 32 Su ma kankye yaya dende na de su zuzunwa abije su ma sukwa nki asu:

<<<Mu pula ku tapire,

ku ki wasa;

mu yi ku wonka ni muntu,

ku ki de ku yi kuka.> 33 Yaaya nsu tunkwasa e zo e si mbosi ba e sha riki yaya ntasi ba, ku nkye, <E ma ni arizeni.> 34 Yaa Nsebeki e zo e ma si e ma sha, ku nkye, nsu mungu si ni nsu sha giya bugu, oboki ni nsu keleba gendu nja nsu <<Lepi.>> > 35 Sede simi Mirikisi a nana gaskye ba guru worede yeda nja shi>>.

36 Kuzukam nseminji parisiyawa daa sukwa Yesu ta a gizi yi de e te si mbosi, de Yesu zuzunwa de si mbosi. 37 A siki geri ni mase daa nsu yi lepi. E zi nkye Yesu ma si mbosi a gizi ni parisiyawa, e keyi tuni meyi kemeshi, 38 e zo e sakisi a keteri Yesu anya seni e yi yaa yi kuka, e ma juku seni Yesu ni angweyi. Se e shire yi seni Yesu gesa kiya yi, e kpa seni Yesu ni baki e yi, se shapa yi meyi kemeshi.

39 De nseminji parisiyawa mu geni mbode mase mu yi, e pala aleyi e yi, <<Nde nseminji mu ma anebi la, yaa shina waa ma mase de yaa kpa yi mu, sobon e ma nsu lepi na.>>

40 Yesu keleba parisiyawa mu, <<Sima, Ni mani mbode na gye ke.>>

<<gyeni, male,>>Sima E keleba.

41 <<Su yi nseda de yaa biya ntani bi bashi. Nseda yaa biya yi deri biyari, nseda yaa biya yi amsin. 42 Ba nseda a siki asu de man gyolo de yaa biya bashi mu ba, se e yape su ni gyolo ni guru asu. Kuzukam waana yaa so yi soseyi a siki ntani bi mu?>>

43 Sima keleba yi, <<Anyana nsude su yape gyolo nyowa ni na yaa so yi soseyi.>> Yesu nkye,

<<ki pala kyakya,>>

44 Yesu juyi kone mase ni e gye Sima nkye, <<Ki geni mase mu? Ni zo a siki gizi ake. Ki ba ni riki de ni wonkye seni na yiri ni alada mu ba, sede mase mu bila juku seni na ni anwe yi se e kwa shire seni na ni gesa kiya e yi. 45 De ni yuru a gizi ake ki keleba ni nina bi bi ba, sede mase mu, tun kwanki de ni yuru, e bila kpa seni na ni baki e yi ba. 46 Ki shapa ni meyi a kiya ba, sede mase mu shapa ni mayi kemeshi a seni na. 47 Sobon yomu, na gye ku, lepi e yi nyowa su yape yi nshi, sobon e nana so nyowa. Nsude su yape yi piri e nana so piri aka.>>

48 Se Yesu gye mase ni nkye, <<Su yape ke lepi ake.>>

49 Ntani de su ma si mbosi nja shi su mayi beta nki asu, <<waana ma nse mu ari e ma yape lepi.?>>

50 Yesu gye mase ni nkye, <<Beigaskye ke e sila ke; sonka ni selema.>>