1 Nana daa Yesu sukwa gom sha bi ni gabada, e ba su sori de su butu arizeni nja su worikye suwo guru, 2 se Yesu saka su te a woze de su pala manki solota Mirikisi nja su worikye nsu suwo. 3 Yesu gye su nkye: <<kede kula mbodaa sobon tepiya aku ko gwala, ko Angala, ko mbosi, ko gyolo, ko riga bi. 4 Guru gizi de ku yuru a siki e yi, ku zunwa anya ni ari de kwa bila geri ni. 5 Nde ntani ki keleba ku, ku kekebe kulaa ni seni aku nde kwa te butu bilaa geri ni, e shiya yaa ma sheeda a kiya asu.>>

6 Se su butu te su ma gyowe geri, geri, su ma pala nabari kyakyawu nja worikye ntani de su ma yi suwo guru.

7 De Yiridu seleki Galili zi nabari ni guru mbode a paru. E rikishe soseyi, sobon worosu su ntani ma nkye su dege Yaaya nsu tunkwasa dege kumsha, 8 worosu su ma nkye anebi Iliya na e kwa dege, worosu su ma nkye daa a siki anebi na sakye dege nleyi. 9 Sede Yiridu nkye, <<Yaaya de Ni butu yi kiya. Waa, daa mu de ni ma zi mbo mu a kiya e yi?>> Hiridu yi kokori de e geni Yesu.

10 De yaya manki Yesu kuma mbayi, su gye Yesu guru mbode su yi. Yesu la su nja shi su te a geri de sua sukwa e yi Beseda, 11 sede de ntani zi nkye Yesu ma anya ni su biya yi. E yi su naba nzo se e yi su beta a kiya solota Mirikisi, e kwa worikye worede su ma so su worikye su.

12 De nyema yi se yayagizi e yi zo anya e yi su nkye, <<Bila ntani de su te a siki dende geri nja beyi geri de su bila mbosi nja anya de sua kwana, anya de mu ma mu mani ntani de la mbosi see ba.>>

13 Yesu gye su nkye, <<Oku ku ba su mbosi de su si.>>

Su keleba, <<Mu man buredi biyari nja gunda bi na kin sede mua te sa yi ntani mu guru mbosi.>> 14 Menza de ma ayan sua keyi ntani dupu biyari.

Yesu gye yayagizi e yi nkye, <<Gye su de su zuzunwa ntani amisin.>> 15 Yayagizi Yesu su yi mbode Yesu gye su, su saa ntani zuzunwa. 16 Yesu la buredi biyari nja gunda bi mu e kone bisi, e gbede Mirikisi se e lalaba ba su. E ba yayagizi e yi su laba ba ntani. 17 Guru asu su si koshi, yayagizi e yi su kwa yi daa de rigye sika obubu gom sha bi.

18 Naa daa Yesu mayi lepa e shi dandaa e yi, yayagizi yi su zo anya yi, e minya su, <<Ntani su ma pala nkye ni ma waa?>>

19 Yayagizi yi keleba, <<Worosu su nkye ki ma Yaaya nsu tunkwasa; worosu su nkye Iliya; worosu su kuma su nkye, daa a siki anebi na dege nleyi.>>

20 Yesu minya su. <<Oku pa?>> << Ku nkye ni ma waa?>>

Biturusu keleba nkye, <<Ki ma Kiristi Yaa Mirikisi.>>

21 Yesu jaa su kuni kede su gye nse daa beta mu ba. 22 Yesu pala nkye, <<Dole na e ni Yaa Nsebeki ni sha wuya yiri yiri a nani toree ntani, nja pirisi nja Male kokoyi doka Musa su ki ni, ari su kisa ni a nana ni wuku sua kwa dege ni nleyi.>>

23 Se Yesu gye ntani guru nkye: <<Guru nsude ma so de biya ni, se ki kiya e yi e la gidiri e yi kowon nana de biya ni. 24 Guru nsude yaa sila ni leyi yi yaa lesa e yi, sede nsude lesa leyi e yi sobon eni yaa samu yi. 25 Mina yi nsebeki kyawu nde e samu durinya mu guru, se e lesa leyi e yi? 26 Du nsude zi kumnya naa nja beta na, Yaa Nsebeki ma yaa zi kumnya e yi kwanki de e zo a siki girima e yi nja girima ni Adaa e yi nja ni meleku nsuseki. 27 Na gye ku gaskye, worosu a siki aku de sakisi anya mu sua taba muntu ba se su geni solota Mirikisi.>>

28 A beyi kwana takusi de Yesu yi beta mu, Yesu la Biturusu, Yaaya nja Yakubu su te a kiya dunsi de su yi lepa. 29 De Yesu ma kiya lepa, pisika e yi shenja, keyi de e sa a nki juyi peri sere ari yaa kisa ndani. 30 Dandani ntani bi, Musa nja Iliya, 31 Su pelesa a siki dereja, sua yi beta nja Yesu. Su ma yi beta a kiya ni muntu e yi, de yaa sika beta ni Mirikisi a Wurishelima. 32 Biturusu nja oboki tepiya e yi su ma yi kwana, de su dege a kwana, su geni girima Yesu nja ntani bi sakisi nja shi. 33 De ntani bi mu sua bila Yesu, Biturusu gye e yi nkye, <<Nsugizi, e man kyawu de mu ma anya mu. Bila mu yi rugwa wuku daa ma na ke, daa mani Musa daa mani Iliya.>> E shina mbode yaa pala ba.

34 De Biturusu ma a kiya beta, se gidagida zo ripe su, su yi womba de su ma a siki ni gidagida. 35 Murinya butu a siki gidagida, nkye, <<Daa mu ma Yaa naa, daa de Ni zabi yi; ku zi beta de yaa gye ku.>> 36 De murinya ni yi shuru, se su geni Yesu e shi ndandaa na. Yayagizi e yi su keyi beta ni a dishiya asu, su gye nse daa mbode su geni a kwanki ni ba.

37 De anya kwa yi, Yesu nja yayagizi e yi su sonka a kiya dunsi, ntani nyowa zo sa Yesu. 38 Nseminji daa a siki ntani ni sukwa sori, nkye, <<Male, mma ologba ke ki zi toseyi ni yaa na mu, e shi ndandaa na ma yaa na. 39 Mumungu aworo ma nyunwa ari yaa sayi yi kuruwa de man kiya ba; aworo ni ma dukwa e yi ari nki e yi ma kakada kumpa yaa butu a baki e yi. Yaa bila yi ba se e zi yi suwo. 40 Ni ologba yayagizi ake de su butu yi, su yi yaba.>> 41 Yesu keleba nkye, <<Oku ntani sana mere beigaskye nja nsu mungu mbo,>> Ari woni kwanki na, Na ma nja ku? Zo ni yaa ke ni anya mu.>>

42 De yaa ni ma zo se arizeni ni la yi te a bisi buga a kisi, nki e yi ma kakada. Se Yesu kwabe mumungu aworo ni, Yesu worikye yaa ni la yi ba adaa e yi. 43 Guru asu su yi mamanki ni totolo mbode Mirikisi yi.

Kowon nse yi mamanki ni guru mbode Yesu yi, de e gye Yayagizi yi nkye, 44 <<Kede ku musi mbode ma bila de ni gye ku: Sua la yaa nsebeki beyi a nani ntani.>> 45 Yayagizi e yi su gane beta de Yesu ma gye su ba. Su boyi su nshi, de kede su shina ba, su yi womba de su minya yi a kiya beta yi.

46 Musu dege a sisika ni yaya gizi e yi a kiya waa ma totolo. 47 Yesu, shina dishiya asu, e la yaa dende sayi sakisi a keteri e yi. 48 Se Yesu gye su, <<Guru nsu de keleba yaa dende mu a siki seni na e keleba ni na ka; nsude keleba ni e keleba nsude saka ni na. Sobon yomu nsu de ma yaa dende a siki aku e shiya ma totolo.>>

49 Yaaya nkye, <<Tolense>> <<Mu geni nse daa yaa butu arizeni a siki seni ake mu nana e yi, sobon e ma nja mu ba.>>

50 Yesu nkye, <<Kede ku nana e yi ba,>><<Guru nsu de yaa yi geba nja ku ba e ma na ku na.>>

51 De kwanki Yesu yi de sua leyi te a bisi, Yesu dege te a Wurishelima. 52 Yesu saka yaya manki ta geba e yi, osu kwa su te a dende geri ni Samariya de su gyala mbo yi pekye yi; 53 sede ntani geri ni keleba e yi ba, sobon de sa kiya yaa te a Wurishelima. 54 De yayagizi e yi Yakubu nja Yaaya geni yomu, su minya e yi, <<Obagizi, ka so de mu sukwa wuta dege bisi de suwuta su?>> 55 Sede Yesu juyi ni kwabe su, 56 Su kuma biya turiki te a geri daa mbo.

57 De su ma yi tepiya a kiya turiki, nse daa gye Yesu nkye, <<Eni ma biya ke guru anya de ka te.>>

58 Yesu keleba yi nkye, <<Kere bikiya man romu asu nja nsunsuwa bisi su mani anya kwana su, sede Yaa nsebeki mani anya kwana ba.>>

59 Yesu kwa gye nseminji daa, <<Biya ni.>>

Sede nseminji ni keleba yi, <<Obagizi, bila ni de ni te bishina adaa na tuku de ni zo biya ke.>>

60 Yesu gye yi nkye, <<Bila worede su shina Mirikisi ba de su bishina nkiya su, eke ki te pala manki ni solota Mirikisi.>>

61 Nseminji daa kwa gye Yesu nkye, <<Na biya ke, Obagizi, bila de ni te seleme ntani gizi na.>>

62 Yesu keleba nkye, Guru nsude kaa barinya yaa yi noma nde e juyi kone beyi e yi kyawu de yi anki a siki solota ni Mirikisi ba.>>