Neemias 1

Nehimiya Iyyerussaalemixxee’e Quuqemee qico

1 Hakaaliyake beltika Nehimiyaka hiyyichcho.

Ani lame tomme wogga’n Kaasilu hinaake agenjo’n Suusake qachchi giddo hedhee’na’a, 2 anke dayyuwwi giddii’ni mitti Hanaani, wele henooke manninni welti Yihudaan ke’e dage; aninna Iyyerusaalemixxanna booji’emebaaki gateeke Yihudiinke mannixxa insa’nee qorenneni.

3 Insa’nenna ani’a, «Booji’otenaa’n hafe gate’e ifike bogiba’a higeeki mann jabaaxxe rakko’ni ibe’e salphate hedheeni; Iyyerusaalemiki dalla’i diigeme lugge’eni; hulatike cufanuwa’ninna giira worreeni» hine.

4 Ani tenne duuchcha laqennexxa yanna ofo’le oodhenneni; iimike Mageni edo heddo barra yaadenneni, agabo goddo soodatenneni. 5 Ookkoneechchi uduma hiyyenne qici:

«Ee iimike Duuchchi Woddike Gootta Mageno! Ati lumoken, no’onna ati edo soda’ati ati edo uurrinaannen; atinna ate’e eeyyaakenna ajaja atika ulfeessaake duuchchinn welti aaggettaxxa kako heqqexxatton, 6 ani erganji atiki ergataameeyye atixxee Isira’eelike ardixxee hashshanna barra ati edo soodataneexxa soodachcho laqi; ille atixxi anibaa uuddowwaali; no’o Isra’eelito cubbo hunje ate’e balleessineennaxxe’e aadde aangaanneni. 7 No’o ate’n hara elobaaxxa fuggoxxa huje hunjeenneni; erganjo atike Muuse’a uutetteka ajaja, aadanna seera heqe’neebo’noni.

8 «Erganjo atike Muuse’a hitetteka hiyyichcho kassi hiyyi, ‹ha’no addatendineeke kada gophphinoole gosa gosake ard giddo ha’no xeerannoni, 9 anibaa higginolenna ajaja anika muuxxinoole shorremeemmaka arda ha’nooka buttatixxe gabala qico’n midde xeeremmoolenna, ookko’ninni insa’nee bukki assannoni; anike summinni ye’emo’a fi’lenneke boonchibaa insa’nee iyyedagannoni.›

10 «Kunni lumoxxe atixxe hunnanninna jabaxxe anga atixxenni anjirtetteke eriganjuwwaa atikenna arda atikenni. 11 Ee, Dada Duuchchike Gootta atike erganjixxa soodachcho; summa atika soodata’ni gammada’neeke erganjuwwi atikixxa soodachcho laqi. Konne manjichchi edo elle alfannoshsha telcho ani garbichchi atiki hujonnaa hedennexxi muuxxendaashsha assi.»

Ookkone wodda ani woyinetixxa booka moyanjoke ibisanakemani.