1 Duuchchi Woddik Gootti Muuse'e, 2 «Isira'eelike arda'n hitatto qici, ‹Galdine hossino'a uwwaanneke boga'n e'yitinee uduma, 3 Werreega ha'nooka muuxatika yookaan fedhi ifixxenni shiqilsatika yookaan ayyaanuwwa ha'nook wodda fishshe isixxi Duuchchi Woddika Gootta gammachchisaaka tolcha lalokenaa'n yookaan gedhebokenaa'n Duuchchi Woddike Gootti'a ciincatika tolcha, 4 konnee tolcha shiqisaak manji mitte leetiro zayitenni qushshendeexxa mitte kiilo eloxxa midhatixxa bulle Duuchchi Woddike Gootti'a shiqishowwaal. 5 Ciincatike yookaan duliinke tolchi'a shiqaake mitti mittengi gedhebiinke buruusinni welti mitte leetiro woyinetixxe bookanni qophpheessowwaal. 6 Gedhebiinke korbeesinni welti mitte leetironna gamisa zayitenni qushshendeexxa midhatixxa eloxxa lame kiilo bulle qophpheessowwaal. 7 Iittanni ha'watike tolchi'a kadaaxxa mitte leetironna gamisa woyinetixxa booka qophpheesse; tinninna Duuchchi Woddika Gootta gammachchissaaxxa fishshe afaashsha assitine shiqishshe.

8 « ‹Mitte jibichcha gargarti hedheeke werregi'a yookaan mittummatee shiqaake ciincatike tolchi'a yookaan duliinke tolchi'a Duuchchi Woddike Gootti'a shiqishshinaa wodda, 9 jibichchiki welti lame leetiro zayitenni qushshendeexxa shaqqaxxa sase kiilo bulle iyyedagge. 10 Iittanni lame leetiro woyinetixxa booka ha'watike tolchi'a shiqishshe; isinna giirate'n ciinceessemeexxi fishshe isixxi Duuchchi Woddika Gootta gammachchiisaake tolcha kadaan. 11 Yoona Mitti mittiing jibichchi yookaan gedhebiink korbees, mitti mittiinge gedhebiink buruus yookaan re'etik buruusi konne qicinni shiqowwaal. 12 Shiqishshineeke horike laakkosixxe qixxe'n, mitti mittinige'e tenneenni asse.

13 « ‹Mitti mittiingi Isira'eelichchoke kadeek manji duuchchi ciincessemeexxi fishshe Duuchchi Woddika Gootta gammachisaaka tolcha shiqisaa wodda tennee yaanuwwa konne qicinni assowwaal. 14 Daggaaxxe illa duuchcha'n alagi yookaan ha'noo giddo hedheek huunni manjinna ciincessemeexxi fishshe Duuchchi Woddika Gootta gammachiisaaka tolcha shiqisaa wodda ha'no assitinammashsha isinna assowwaal. 15 Tuutatenna kadi ha'noo giddo hedheeke alagi'a mitte bifake galduma kadowwaal; tinninna daggaaxxe ilake baro duuchcha'n jijjirendabaaxxe aadan; ha'nonna kadi alagi Duuchchi Woddike Gootti edo mitteken. 16 Ha'no'ninna kadi ha'no giddo hedheeke alaga'n kunni seerinna tinni aada qixxe muuxxendaan.› »✝

17 Duuchchi Woddik Gootti Muuse hiyyee qici, 18 «Isira'eelike arda'n hitatto qici: ‹Ha'noo iyyemaraanneke boga'n aaggineexxi, 19 ookkone bogixxa ita ittinaa wodda isenaa'ni aaxxine'e Duuchchi Woddike Gootti'a tolcha uwwe. 20 Tinninna edisse uxxendeexxe adda dayendebaaxxe bullenaa'n kebbo kebbisineexxi ooddetenaa'n aaxxine uutinammaxxe midhashsha uwwa shiqishshe. 21 Daggaaxxe illa duuchcha'n edisse uxxendeexxa adda dayendebaaxxa bulle Duuchchi Woddike Gootti'a uwwa shiqishshinaan.

22 « ‹Akimagaada haakitik Duuchchi Woddik Gootti Muuse'n uwwemake ajajuwwinaa'n mitte heqqedha gophphinoole, kunninna 23 Duuchchi Woddik Gootti ajajuwwa uwwemmaxxe barranaa'n edi'a daggaaxxe illa duuchcha'n Muuse darree'n ha'noo ajajemmaka konnee ajajuwwa muuxa gophphinoole, 24 tinninna kaddeek tuutatike haakitinaa'nite kaddoole, tuuta duuchchi mitte jibichcha shiqishsheexxi fishshe Duuchchi Woddika Gootta gamachiisashsha ciincesowaal; seerinshanni mitteba ifi ifika midhatika tolcha, ha'watike tolchi'anna iittanni cubbotike tolchi'a mitte labbaka recco shiqinsowwaal. 25 Qeesichchikinna Isira'eelixxe tuuta duuchchi cubbo birowwaal; cubbo insa'nexxinna gattowwaal hiyyendaan; gattowwaal hiyyendaachchinna balleessa hunjeeki haakitikite kaddeemmaxxeenna konnee assineeke dedhi'a ciincatika tolchanna cubbotike tolcha Duuchchi Woddike Gootti'a shiqinshemmaxxeeten. 26 Haakitik assemeeka dedha duuchchiing hujeeke kademmaxxee Isira'eelixxi tuuta duuchchinna insa'ne giddo hedheek alagi duuchchi gattowwaal hiyyemaan.

27 « ‹Yaane kinni mitti manji haakitik umo ifikenn cubbo hujoole kinni cubbotike tolchi'a mitte meyaxxa recco iyyedagowwaal. 28 Ookkoneechchi uduma qeesichchi haakitik cubbo hujemmake manji'a Duuchchi Woddike Gootti edo cubbo isi'a biraan; cubbo biratinna isi'a assendaa wodda manjichchikinna gattowwaal hiyyemaan.✝ 29 Isira'eelike boga'ni ilemeek manjonna kadi yookaan alagi cubbo haakitiki hujoole, hoone manjo'ninna adhdhemaak seer mittengen.

30 « ‹Isira'elke boga'ni ilemeeke manjonna kadi yookaan alagi mudhdheexxi cubbo hujeek huuni manjinna kinni Duuchchi Woddika Gootta shollisheemmaxxee iikki manji ifike ardi giddii'n fugussemowwaal. 31 Isi Duuchchi Woddike Goottika hiyyichcho tuffateemmaxxee seeruwwa isikanna sa'eemmaxxe'e eeti, iikki manji balleesa isixxe kaddemmaxxee fugussemowwaal.› »

32 Isira'eelito qiilla gammoojje giddo hexxemma wodda manjichchi mitti Edi Sanbatiixa barra haqqe qoceccate'n afeme. 33 Isi haqqe qocedhaa'naa isoo afeemmak manni ookkonee manjichcho Muuseba'aa Aarooniba'aanna duuchchiinxi Isira'eelitotixxi tuuta hexxeeba'aa iyyemare. 34 Manjichchoke'n maa assa hassissaaxxa ca'a hiteexxi yaane hedha gophpheemaxxe'e seeri hunda heqqemaashsha assine. 35 Ookkoneechchi uduma Duuchchi Woddik Gootti Muuse, «Manjichchi shiyemuun; Iisra'eelik tuuti duuchchinna isoo kaanbeti gadho kinjik cancaqowwaal» hiyye. 36 Tennexxee Duuchchi Woddik Gootti Muuse ajajemmashshanni tuuta duuchchi manjichcho kaanbeti gadho fulchiteexxi reyaa qico'n isoo kinjik cancaqqe.

37 Duuchchi Woddik Gootti Muuse'e, 38 «Isira'eelitote'n hitatto qici, ‹Daggaaxxe illa duuchcha'n ha'nooxxe seemmake kasa'n handaara giisse; mitti mittiing handaari iimatixxe bifake handaara kadowwaal.✝ 39 Qalbe ha'nooxxi yorteexxanna ille ha'nooxxi uuddeexxa duuchcha hordofine yabaabuldinabaashsha, konne handaaruwwa uuddina'n Duuchchi Woddike Goottika ajajuwwa qalli hitina'n ajajendino'a ha'noo kunni handaaruwwi qalli assaan. 40 Tennexxee ajajuwwa anka duuchcha muuxxino'a qaabbatinaan; Duuchchi Woddike Gootti'anna ifi woyyoonsitinaan. 41 Ani Duuchchi Woddike Gootta ha'nooke Mageno kadona'a Gibtsee'n ha'noo fulchennek ante Duuchchi Woddike Gootta ha'nooke Magenon.› »